St. Bruno

St. Bruno (Oct 6)

St. Bruno nø dvgùng vlwe dø̀ngku tiqrvp kèní shøqyv̀ngà nø Rheims myu ò bø̀ngshv̀ng we noqngø̀m tø̀ngnø taq vl yv̀ngì we íe. Àng vsvk 25 nǿng taq shvrúngshú vya svng kámshì lúnyv̀ngà nø Colon myuq taq Gvray bv̀nlì wanø rúng yv̀ngì we tiqgǿ íe.

We shvrà taq rungwe tiqnǿng vle bǿì mèpvng nø St. Bruno Rheims shvrúngshú gø̀rwang ò shølshú vgo ku bv̀nlì døngjá ri we mvtaq shvngø̀mré paqzí dvp svng gø shølshú tiqgǿ shvrà kèní vcùng ráà we íe.

St. Bruno taqkèní wedø íwe bv̀nlì gvbà døngjá rì svng 20 nǿng naqhøq rí bǿà mèpvng nø àngò Svrado pè taqkèní dvtú we vdòng Svrado zùng taq shvngøt shú svra tiqgǿ ku vrá dvzømshì vdu yv̀ngì.

AD 1075 nǿng taq Cannon uqbvdi nvng singwe University ò shølshú vgo tiqgǿ ku bv̀nlì dvtú yv̀ngà we íe. St. Bruno àngò svrado pè lvpat bébǿì mèpvng nø we móng taq shvngø̀mré svng vtù gvsat we vsv̀ngrì bung ráì nø Mamasses wa tǿshì we tiq mvdò taqkèní we rvgaq svng vtøl ráà we rvt vtshì vdu yv̀ngì wegø íe.

we dvgvp kèní St. Bruno nø àngò rv̀mnvng 6 gǿ nø kàciq gv́lshì nø AD 1084 nǿng kèní paqzí tvrà àngshv́r tiq tvrà svng mv́n pv̀ngò nø̀ vjúrøt dvzaqshì we tvrà kèní lvpat àngshv́r svng vrang pv̀ng yv̀ngà.

Àngmaq nø dvshà mvhøt we tvrà vdòng vjúrøt shìwe, dvrá shvdøk shìwe í pvlàcè tvrà taq dvzaq dvkángshì ráì we íe. We rvtø̀ kèní Catuisian mvdò svng poqpv̀ng ráà nø Yesu àngmè Mari kaq svng gø vlǿmshì nø̀ dvgùng shvring we dang rì wá pv́ngshì ráì wegø íe.

St. Bruno nø Chartres myuq taq 6 nǿng rvzé rúng bǿì mèpvng Svrabín koqkám Urban II ò paqzí zí shú vya rúngtàng taq rúng vdu yv̀ngì. We dvgvp Svrabín koqkámpè ò àng manggá nø Svrabín koqkám St. Gregory 7 bat taq pv̀ng ráà we shvrúngshú rì ò lvpat vlíng vpo shìwe tvrà svng dvtut dvzømā lúnlv́m dvpvt íe.

We rvtø̀ taq St. Bruno svng Italy móng tìbo lvp kèní cìl dvp nvng gv̀mzø̀ koqkám pè Henry maq kèní vtù gvsat we gø vhǿm yv̀ngà. St. Bruno taqkèní Calabria taq shvrúngshú zùng tiqlòng svng gø vrang ráà we íe. Àngnø we shvrà taqø ni vsvng 72 nǿng taq lvpat bé yv̀ngì.

St. Bruno àngtaq kèní ngànshà rì ò gvsat vtù we dvhø̀ taq shvrúngshú zùng 250 zùng svng mvkok nø vcùng yv̀ngà wegø íe. St. Bruno àngkaqsvng cáng zángshì we vsv̀ng rì kaq shvlut shúpè wanø̀ mvsat shì yv̀ngì wegø íe.