Vkangpè Yesu Hkristu shì yv'ngkèní Zunámì mepvnt Lvban (4) lvban

21 April 24, (Dvzvr 4:8-12 /
1Yohan 3:1-2 / Yohan 10:11-18)

Vpø' íwe pèmè vnvmchvngmaq ya lvban nø Vkangpè Yesu Hkristu shì yv'ngkèní Zunámì mepvnt Lvban (4) lvban wà lvban svng gòng bø'shà.

Yà lvban nø " Shvla vtv'ng Vyvngroqshú Nár"  lvban àngni tiqni gø íe. Dèni rø v-du we Yohan 10:11-18 vdòng taq, Vkangpè Yesu ínø vyvngroqshú kashvbong taqkèní shvngøt we dang tálúnshìe.

(1) Ngà nø namaqò yvngroqshúpè øngàe, wàe.
(2) Namaq nø Ngàò vyvngrérì èínø:ngè, wàe.

Vpø' íwe pèmè vnvmchvngmaq Vkangpè Yesu lvpat, Palastai taq vl we vyvngrérì nvng vyvngroqshú rìò lvpat mvshøl svng eyvng lúngò dvgvp Palastai taq vl we vdá mvgamrì nø vyvngrì mvmè vdáè. Àngwa rimà:m we vsvngrì nø (50) go kèní (100) go høq vdáè, wàe .Àngmaq nø àng shvlá ku mvring nvng vcár we kurwang yv'ng vl nø rī:m we vtong vlē.

Dørøm lvp taqø vyvngroqshú mvdò nø àngmaqò vyvngrérì svng 4',5' vháng we lúngrì í vrvngshaq wáng rì yv'ng dvkømōè. Yadøng lvp taqø vkø' nvng vyit rìò Wūr taqkèní gø roqgar lúnlvm  tā tvle vsùngòe. 

Vrá nø, Bvngka chit tiqlòng wā vlē. Vsháng gá rà dvgvp vyvngroqshúrí gø' vrvm nø àngdeò vyvngrérì svng mvshvl lúnlvm rvt goò dvgvp vyvngrérì nø àng kangpèò Kà svng táò nø mvshøng we kurwang vrvm kaq svng dì nø cvnòe, wàe.

Yadang nø vlē yangì we pvn, Vkangpè Yesu lvpat pvn, Palastai móngdàn rvgaq taqø Vyit nvng Kàng luq rvt vyvngrérì wā mvtaq vyvngroqshúrìò lvpat gø gvzà shvre dvké we vdòng taqkèní vpnóngshì yangì we mvshøl íe. Yalòng mvshøl mvbøn taqkèní téwa síngràl lúnlvm Vkangpè Yesu ínø kashvbong lu nø shóngnøntní shvngøt dvtú we mongkà íe.

Yohan 10:11 ciq taq; Ngà nø shvla we vyv̀ng roqshú pè ǿngàe. Shvla we vyv̀ng roqshú pè nø, vyv̀ngrì dvpvt Ang gø̀nshaq zíshìe. wàe.

Vpø' íwe pèmè vnvmchvngmaq, Vkangpè Yesu nø shvla we Vyvngroqshú øngàe wàwe taq.. Vyvngroqshú rì taqkèní shvlá vtv'ng tiqgø' øngàe wàwe nø mø-í. Shø'n mvyø' we taq ídv'ngte shvngbe mvdvm shvlá vtv'ng vyvngroqshú tiqpè øngàe,  wa Kà íe. Vrá nø, Vkangpè Yesu Hkristu nø rvgaqtøm mvdvmtaqø àngò vyvngrérì íshà we, nøngmaq gø' vrvm kaq svng gvzà shú:ngshì we, mvkok dvdí nønt, dvshá zā shóngnønt danzøng we shvlá vtv'ng vyvngroqshú íe.

1. Shvla we vyvngroqshú pè ínø, àngdeò vyvngrérì kaq svng sháò pàdø àngdeò vyvngrérì kaq svng shøl lúnòe.

2. Shvla we vyvngroqshú ínø, vyvngrérì kaq svng shvá:m shv-aqò pàdø àngdeò vyvngrérì kaq svng roqgar lúnè, gønshaq chutchvng lúnè wàdang svng yv'nglún shìe.

Vpø' íwe pèmè vnvmchvngmaq,
Nøngmaq gø' vrvm taqkèní shøni we taq, Nøngmaq nø Vkangpè Yesuò vyvngrérì íshàe, wàìe.

Nøngmaq ínø wè Kà svng angboq angboq vnvn nø shønìe. Íwe Vkangpè Yesu nø  mvkok dvdí nønt,mvré zā nønt dan zøng we vyvngroqshú ínø, nøngmaqí dvdvm rà we nø..
- Nøngmaq nø Vkangpè Yesuò vyvngrérì íshàe. Íwe Kadø íwe vyvngrérì íshà e mà? Kà ta we, v-rvm v-rá we vyvngrérì íshà e mà? Vkangpè Yesu Hkristuí Coqcvnrì mvdvmø vrvngò we vyvngré wáng taqø mongzøl dø vl lún we vyvngrérì íshà e mà?dvdvm shì rà íe.

Shvla we Vyvngí nø àngdeò àng Kàng svng sháòe wàe.
Nøngmaqí dvdvm ra we dang..

- Nøngmaq gø' vrvm kèní Vkangpè Yesu kaq svng vjúrøt shài we, cúnshì we Gvray gvsang mongkà svng rø nø vjúrøt tvleshì taqsórí Pvlàcè kvmnønt nònggùn kūnga lùshàì we , Vkangpè Yesu Hkristuò Missa Kàgvp svng vpø' shvring íwe, Dvrá Mongkà svng cvndvgøm nø shvngømré svng vpø' shvring Kvmnønt shvdøng shvngvng shàì lòng nø Vkangpè Yesu kaq svng shá ì lòng, shóngshàì lòng íe.
- Vkangpè Yesu Hkristu nø shvlá vtv'ng vyvngroqshúpè í pàdø,  nøngmaq gø' vrvm gø Vkangpè Yesuò shvlá vtv'ng Kà ta we vyvngce,rvzvngce, Vkangpè Yesuò vyvngré wáng taqø shøtshú dv'nglúnce, gønshaq lún we,mongzøl lòng lún we rvzvngce wáshì laqlúni....wvng dvshat sórí nònggùn zi Kà shøn we yayvng nà:ròe.

Mongkà ètashì nøng we Shvngbeí Hkristuò mongzøl lòng vtoshì laqlúnì.

Yalvban rø v-du we Gvray móngkà nø;
(1)Dvzvr 4:8-12
(2)1Yohan 3:1-2
(3)Yohan 10:11-18, 
Yà Mongkà ciq rì taqkèní Nár nīò Noqngøm rvtø svng shøl nø Noqngøm lvm wàì.Shvngbe oqā.