Vmyø̀ wø̄n kàshvbóng

" Nár (15 ) lvban Kàngpè àngni " (1). Isaiah 55:10-11 (2). Roma 8:18-23 (3). Mati 13: 1-23

Shvngbeí Gvray mongzøl lòng vtoshì laqlúnì. Pàmvrà. Vpø íwe pèmè vnvmchvngmaq, Yà lvban nø tiqnøng vdòng àngwa Nár (34) lvban vl yv'ngkèní (15) pvngwa lvban wà lvban svng gòng bø'shà.Rvtø vrvm Gvray gvsang jèjú vdòng taqø pàmvràce mongzøl dø cúnshì lúnì wè mvdvm cúnshì we Gvray gvsang Mongkà rì taqkèní vrá nònggùn vzíkelvm rvtø tiqlòngce vtoshì lúnì rvt gø gvzà oqā wàlvm ra íe.

Vmyø̀ wø̄n kàshvbóng; Vpø íwe pèmè vnvmchvngmaq, Dèni Gvray gvsang mongkà (Isaiah 55:10-11)taq, Muqlàng kèní shø zaq nø tvwv̀n wa daq lòng nø vwadø wà dàq we mø-í , rvgaq svng dvshaqò nø  mvzí dvyø rì angshí angwvt rì svng gong dvzvrò we íe, wàe. Wè pàdø Gvray gvsang àng nònggøp kèní bung we kà gø kadvgvp gø vhúng mø-í nø, Gvray àng Nønt ídø bø'nlúnè, shvmánà lúnè wā dvkv'm we svng yv'nglún shìe. Mati dvbùshang mongkà taq nø, Muqlang móngdàn tvrà téwa Cíng ràl lúnlvm dvpvt Vkangpè Yesuí nø Kà shvbóng angpvnpvn taqkèní shvngøt dètú ì dang svng yv'nglún shìe.

( Mati 10:1-23 )ciq vdòng taq dvyø wø:nò we kashvbóng taqkèní shvngøt dvtúe. Dvyørì nø àngmaq vja we vbá rvgaq angshvra rì taqø mvdøng ínø angshí rì shí lúngì. Angshí mvshí, shìá:mì we dvyø rì gø vl pàdø, vshømcé dvtvng, vchuqcé dvtvng àng-yá dvtvng mvzí dvyø rì shóngbøì wàdang svng gø yv'nglún shìe. Shø'n mvyø we taq, Gvray gvsangò nònggùp taqkèní bung we Mongkà nø dvyø rì nvng vbóngè wàkà íe. Gvray gvsangò Mongkà Dvyø vjà we rvgaq vbá nø nøngmaqò mvsøn nvrøm rì íē. Nøngmaqò Nønt mvsøn nvrøm rì nø kadø íwe rvgaq vbá pvnrì íe, wàdang svng shvdø'mè. (1) Nøngmaqò Shagóng nø mònggvn byō lvm tvrà rì taq wā øpshì we pvnrì í shàe mà?.(2) Mà:pnønt, dvgo'q nønt , ma-shvla we vjang laqya rì taqkèní wā øpshì we pvnrì í shàe mà?(3) Kvmnønt , shóngnønt, dvshá zā Nønt mà-vl we pvnrì í shàe mà ? 
(4) Vtù vre dvløt ra dvgvp Dìngman we Kvmnønt tvrà taqkèní rálshì we, shaqcvm lvwan we pvnrì í shàe mà?. (5) Cúnshì we Mongkà tashì lvm vzing we, vjúrøt shì lvm dang taq shaqcvm we pvnrì í shàe mà?. wàdang taq mvdøng ínø, Nà,Ngàò Nønt mvsøn vdòng taqkèní kadø wā Gvray gvsang Mongkà mvzí dvyø rì svng kadvngte angshí shónglvm íe, wàdang svng dvdvm dvshvt we, shvdøm we Mongkà íē.

Lóngheq rvgaq nvng Bv̀nghǿ póng taq wø̄n bǿà we vmyø̀ lòng nø mòngkà táò dá:ngí, rvgaq yabànò gónggilv́m nvng mvgàmlv́m lù:ngí yùm rā weí lúmke bǿò nø, angshí mvshí long we, vsvng wegǿ íe, wàe. Nønt høp lvwvn we mvsøn nvrøm, ma-shvla we nvng dvn zøng we nønt mvsøn rì nø Gvray gvsangò àng Nønt ílòng svng cvndvgøm lvm dvpvt gvzà rvzaqe wàe.Vbá so vl we shvra rvgaq taqø vjà nø yor we mvzí dvyø rì nø mvmè shóngè . Wè pàdø Kvmnønt tvrà taq cìpshì nønt, shóngnønt, dvshá zā Nønt rì dvnzøng kvtwa, Pvlàcè Kvmnønt angshí shílúnlvm vlē walòng svng yv'nglún shìe. Dvkvme.

Gvray gvsangò cúnshì we Mongkà svng tá lúnì dvgvp nøngmaq kadø wā Nønt mvsøn vdòng kèní vtoshà ì mà?. Àng rø mvwáshì we, mvzømshì we angshí mvnshí we Nønt mvsøn nvrøm rì í mà?. Vshømcé dvtvng , vchuqcé dvtvng , àng-yá dvtvng angshí shí we Nønt mvsøn rì í mà?. Gvray gvsangò cúnshì we Mongkà nø kadvgvp gø vhúng mø-í, walòng svng yv'nglún shìe. Ká:m ra íe.Nøngmaq vtoshàì we Kvmnønt, shóngnønt mvsøn nvrøm taqkèní wā mvdøng ínø, vlømshàì we dang svng vtoshì lúnlvm Jø'ngjø'ngni vlē. 

Wervt vpø íwe pèmè vnvmchvngmaq Cìpshì we Kvmnøntní cúnshì nø Gvray gvsang Mongkà taqkèní shagóng Pvlàcè kvmnønt angshí shí we, Gvray kaq dvbú dvzvr we rvzvngcerì mvng wáshì laqlúni wvng dvshat mvyøngè. Shvngbe svng oqā.