Gvray Mongka Nx Galong ie

Wedá:ngí wepèla nø weyv́ng kèní búng nø Sodom wamà svng pōshì nø dvjaqòe. Abraham gø angmaq svng tiqrām sháò sórí tiqdø dìá:mì. Wekvt Yehowa yadø wae: “Abraham nø nònggùn jòr nø ring we tiq dvcì jø̀ngjǿng í nø, rvgaq tø̀m vsvng dvcì í dv́ngteí gø ang taqkèní ìshøt ìgv̀n lúnlv́m í rvt, Ngàí wàlv́m wv̀ngò long Abraham yv́ng kèní mālv́m í ma? Mø̀í; Yehowaí ang svng zílv́m dv́n yà:ngà rì shvngbe nø A:ngí Abraham svng wá dvgø̄mā lúnlv́m dvpvt, angcèrì nvng ang mèpvng kaq vl lōng we ang chø̀msvng rìí nø døngman we nvng vdū vbóng we wàò yv́ng kèní, Yehowa Ang tvrà svng cv́n dvdønglv́m dvpvt angmaq svng Abrahamí dvkv́m lúnlv́m rvt ni, Ngàí ang svng rvcv́ngshaq íe,” wae. Wekvt rá Yehowa shø̀n we nø, “Sodom nvng Gomora wamàní rvt vkiq we shaq nø gvzà luq nø, angmaq vléshì we mvrà gø vtvngkèní rvnaq we í rvt;  Ngà akvt yøtshø̀ngv̄m nø, Ngà yv́ng svng tuq lú:ngì we kàshaq dø tiqdvchá, angmaqí wà mvwàò we yv̀nglv́m íe. Lā mvwàò we ínìgø, Ngàí sháng bǿngòe,” wae.  Weyv́ng kèní wepèní nø Sodom kaq svng dìá:mì. Iwe Abraham nø, Yehowa mv́rdv̀ngø shini ripdv̀ng wae. Wekvt Abraham tvp dī nø yadø a:lòe. “Døngman vsvng kaq nø mvgv̄m vsvng rì nvng tiqdø jø̀ngjǿngni shèmá:ngò ni ma?  Wamà vdòng taq døngman vsvng púngwàcé gǿ lādv́ng vl nìnø, døngman vsvng we pùngwàcé gǿ rvtnø, wamà svng màshvlutshaq, jø̀ngjǿng shèmá:ngò ni ma?  Døngman vsvng rì svng vsvng mvgv́mrì nvng tiqdø shvtlv́m lòng nø kadø ínìgø Nàí mèwàò. Kadø ínìgø yadø wàlv́m nø Nà kèní laq vsar! Rvgaq tø̀m kàngéshú rìí gø dvrá dø wa wàò we mø̀í ma?” a:lòe. Wekvt Yehowaí, “Sodom wamà vdòng taq døngman vsvng pùngwàcé gǿ Ngàí lā lálún bǿngònøng nø, werì rvtnø Ngàí wervgaq køp svng shvlutlv́m íe,” wae.Abrahamí, “Eyà:ngò, ngà nø dvtø̀l nvng waqpú wā ǿngànø̀ng gø, Vkàngpè Nà svng mvshø̀nlvm dv́ng shø̀n bǿngà we í nø;  døngman vsvng we pùngwàcé gǿ taq pùngwà gǿ lā mvgø̄m nìnø, wamà welòng svng Nàí wedøni shèmá:ngò ni ma?” a:lòe. Vkàngpèí rá, “Ngàí vbìcé pùngwà gǿ lá lún bǿngònøng nø, màshvmv́nglv́m íe,” a:lòe.  Abrahamí Ang svng vrá tiq kvt, “Weyv́ng vbìcé gǿ wa lā v̄l dā nìnø, kadø íe?” wa rø:tnòe. A:ngí rá, “Vbìcé gǿ rvt gø Ngàí màshvmv́ngò,” a:lòe.  Abrahamí rá, “Ngà Vkàngpèá, shv̀mná nø mèríni; vrá shø̀nvtnøng. Weyv́ng vshø̀mcé gǿ wa lā v̄l dā nìnø kadø íe?” a:lòe. A:ngí rá, “Vshø̀mcé gǿ wa lálún bǿngònøng gø, màshvmv́nglv́m íe,” a:lòe.  Vrá a:ngí, “Eyà:ngò akvt, Vkàngpè Nà svng mvshø̀nlvm dv́ng shø̀n bǿngà we í nø; weyv́ng vnícé gǿ wa lā v̄l dā nìnø kadø íe?” a:lòe. Wekvt A:ngí rá, “We vnícé gǿ rvt gø, Ngàí màshvmv́ngò,” a:lòe. Wekvt rá Abrahamí, “Ngà Vkàngpèá, shv̀mná nø mèrí dānīé, ngà akvt tiq kvtcè wā rá shø̀nvtnøng: weyv́ng tiqcé gǿ wā lā v̄l dā nìnø kadø íe?” a:lòe. Wekvt A:ngí, “We tiqcé gǿ rvtnø gø Ngàí màshvmv́nglv́m íe,” a:lòe.  Wekvt Yehowa nø Abraham nvng kàshǿn dv́ngshi bǿì weó búngá:mì; Abraham gø ang v́lrà svng vtv́ngá:mì.