Kv́m vsvngrì nø Yesu angrì angrvp í we

Wekvt tìnúng mvdv̀m Moshi ang wur hángshì bǿì nìnø, Yehowaí weyaq nv̀msvr nv̀mbø̀ng mvrùmè mut dvzá:rò weí, tìnúng svng takaq rvwi:tnò nø tì vwál bǿà kvt bv̀ngshú rvgaq vpoá:mì.  Wekvt Israel dvcì cèrì nø tìnúng dvhø̀hø̀ bv̀ngshú rvgaq taq léshìe. Tìrì nø angmaq vgwé pā vbàng pā mvgø̀r dø vdø̄ná:mì.  Wekvt Ejip vsvng rìí angmaq svng wedøni yera:tnà nø, Farao ang gø̀mrangrì, ang cìlgàrìrì nvng ang cìlgø̀mrang zún shvrē mvdò shvngbe nø, Israel vsvng rì svng cà:nò nø tìnúng vdòng svng gòng ráì.  Sháng gá zà:mí svmi nvng rvmøt tvróng lòng taqkèní, Yehowaí Ejip cìldø̀ngrì svng yà:ngò nø angmaq cìldø̀ngrì svng réshà ré dvzá:ròe. Yehowaí angmaq cìlgàrì híkwv̄ngrì vchutnā dvzá:rò nø dí màshvla dø wáāòe. Wervt Ejip vsvng rì nø, “Có, Israel vsvng rì yv́ng kèní vtshàì. Pàwálv́m wani Yehowa nø angmaq svng wáshì nø Ejip vsvng rì svng èsha:tnìe,” wae.  Wekvt Yehowaí Moshi svng, “Ejip vsvng rì angmaq cìlgàrì rì nvng angmaq cìlgø̀mrang zún shvrē mvdò mvdv̀m taq tì bat vtv́ng nø lā vpaqke bǿò dø, nà wur nø tìnúng mvdv̀m èhángshì,” a:lòe.  Wervt gá daqì chàng Moshi ang wur tìnúng mvdv̀m svng hángshì bǿì nìnø, tìnúng nø ngvnì dø bat vtv́ng daqì kvt, Ejip vsvng rì nø tì vdòng kèní vtshìlv́m dvkv́ngshìe. Inìgø Yehowaí angmaq svng tìnúng vdòng cōng vløp dvzv́r bǿà.  Wekvt tì bat vtv́ngá:mì weí, Israel dvcì cèrì svng yē:rò nø tìnúng vdòng svng gòng ráì we cìl gàrìrì nvng cìl gø̀mrang zún shvrērì gø Farao ang cìl dø̀ng rì shvngbe nø, tiq gǿ gø mvlutshì dø cōng vløpmá:mì.  Wedø ínìgø Israel dvcì cèrì nø angmaq vgwé pa vbàng pā tì nø mvgø̀r dø vdø̄n dvhø̀hø̀, bv̀ngshú mvdv̀mdv̀m léshìá:mì. Weni taq Yehowaí Israel vsvng rì svng Ejip vsvng rì wur kèní wedøni shvlu:tnòe. Ejip vsvng rì shì vnàng nø tìnúng vdàmø̄ vhúl we svng Israel vsvng rìí yà:ngòe.  Yehowaí Ejip vsvng rì svng shvmv́ng bǿà we jórnònggùn vtv̄ng yalòng svng Israel vsvng rìí yv̀ng bǿà kvt, bashà rì nø Yehowa svng vpǿ svre nø, Yehowa svng gø, Ang vshuqpè Moshi svng gø kv́m lú:ngì.