Moshií Israelrì dvpvt vrá røtnāò we

Gvray Mongka Tiq Tut

BÚNGÁM 32:15-24,30-34

Wekvt Moshi wv́l pōshì nø, Shvksekàrì vrū we lóngkø̀m gø̀mní ang wur taq lá:ngò sórí shigùng kèní yøtshì daqì. Lóngkø̀m we vní gø̀m taq nø vní laplap vrūshaq íe.  Lóngkø̀m wegø̀mní nø Gvray A:ngí ni wàò nø, lóngkø̀m gø̀mní mvdv̀m taq gø, Gvray A:ngí ni chuqò nø vrūò we íe.  Bashàrì vhaqshì we shaq svng Yoshuyaí tá bǿà kvt a:ngí Moshi svng, “Zóngdap yv́ng cìl vshvt we shaq lvtáshìni,” a:lòe.  Wedø ínìgø Moshií, “Yalòng nø jòrvm vsvng vkiq we shaq mø̀í; sǿmv̄m vsvng vkiq we shaq gø mø̀í; ngàí tángò we nø zàywà wa we shaq mv̀ng íe,” a:lòe.  Moshi nø zóngdap shvnvng tuq ráì weó zv̄ngwā nungwà hāng nvng bashàrì lv̀m we svng yv̀ng bǿà kvt, ang shv̀mná vcōr lú:ngì weí, lóngkø̀m gø̀mní nø ang wū:rí shigùng lv̀ngpvng svng hø̄m vrø̀m dvsv̄ng bǿà.  Wekvt angmaqí shvlèa:pmà we nungwà hāng welòng a:ngí rit lùò nø svmi taq dupwa wá:rò nø, waqcì jø:kngò dá:ngí tì svng bv̀ng shī:nò nø, Israel cèrì svng mvdø̀ng mvdaq aq dvzá:ròe. Wekvt Moshií Aron svng, “Bashà yarìí nà svng kadø èwàa:tnì rvtnø, nàí angmaq svng yadv́ngte rvnaq we mvrà vdòng svng èshøl bǿà ma?” a:lòe.  Aroní, “Vkàng pèé, wedv́ngte nø shv̀mná mèríni. Pàwálv́m wani bashà yarì nø, mvgv̄m we wá mūn bǿà vsvng rì í we nàí vsháshaq íe. Kadø íe wani angmaqí ngà svng, ‘Nøngmaq svng shøllv́m nøngmaq dvpvt pvràhang èwáāshà. Ejip móng kèní nøngmaq svng èshølvtshà we Moshi yapè nø kadø íá:mì we nøngmaqí mvsháì,’ wae.  Wervtnø̀ ngàí angmaq svng, ‘Shé nàbv́n nàdánø̀ngrì kagǿ ínìgø èchutnvtnøng,’ vl bǿngà nøngnø, angmaqí shé werì ngà yv́ng svng lv́nga:tnà nø, ngàí werì svmi taq wv́r bǿngà nøngnø, nungwà yalòng vpō lú:ngì,” a:lòe.Mèpvng ni taq Moshi nø bashàrì svng, “Namaqí nø rvnaq we mvrà èwà bǿshà. Wervt ngà nø Yehowa svng rvlv̀ngv̄me. Ngàí namaq mvrà shvmāā lún daq we màshá,” a:lòe.  Wekvt Moshi nø Yehowa yv́ng svng vtv́ngá:mì nø yadø a:lòe. “Ó, Yehowaé, bashà yarìí nø vtv̄ngshaq rvnaq we mvrà wà bǿà. Angmaq vdè dvpvt shé pvràhang shūrshi bǿì.  Inìgø Nàí angmaq mvrà svng èchutnāò. Iwe, mèchutnāò kvt kèní nø Nà kàru bok taq nàrū bǿà we ngà bø̀ng svng èshøkngangà, wvng nø Nà svng røtshø̀nge,” a:lòe.  Wervtnø̀ Yehowaí Moshi svng yadø a:lòe. “Kagǿí Ngà svng nàléng bǿngà nìnø, wegǿ bø̀ng svng Ngà kàru bok taqkèní shøqālv́m íe. Iwe akvt nà nàtv́ngv̄m nø, Ngàí nà svng vshǿnshaq móng svng Nà bashàrì èshø̄l bǿò. Eyà:ngò Ngà dvzv́r nø nà vzv̀ngzv̀ng di dāe. Iwe Ngàí angmaq mvrà rvt shøn rà long ni taq nø Ngàí shø̄n dakngòe,” a:lòe.
 
Yohan 11:19-27 
Yuda vsvng mvme nø angnv̄m pè rvtnø Marta nvng Mari svng nøt shvlø̀mlv́m dvpvt di dá:rì.  Yesu dì ráì we svng Martaí tá bǿà kvt, ang búngá:mì nø Yesu svng vtoá:mà. Mari nø chø̀mø̄ rúngdv̀ng wae.  Wekvt Martaí Yesu svng, “Vkàngpèá, Nà ya yv́ng èvlvp pa í nìnø, vnvmpè nø mvshì ni we íe.  Iwe Gvray kaq Nàí kapà èrø:tnò nìnø, wepà Gvrayí Nà svng akvt ínìgø èzi daq we ngàí shángòe,” a:lòe.Yesuí ang svng, “Nvnvmpè nø vrá zun longe,” a:lòe.  Martaí Ang svng, “Tìsi lv̀ngdø̀m zunlong ni taq ang vrá zun long we nø ngàí shángòe,” a:lòe. Yesuí ang svng, “Zunlòng nvng gø̀nshaq nø Ngà ǿngàe. Ngà kaq kv́m gǿ ang nø, shì nìgø wedøni zun longe. Vrá, cúnshi nø Ngà kaq kv́m we kagǿ gø, kadvgvp gø mvshivm. Yalòng svng èkv́m ma?” a:lòe.  Martaí Ang svng, “Íe, Vkàngpèá, Nà nø rvgaq tø̀m svng èdi daqì pè, Gvray Angcè Kristu wepè ni èí we svng ngà kv́m bǿngà,” a:lòe.

Add new comment

4 + 3 =