Mvjòr rì svng go we

Wekvt Moshií Gvray kaq, “Eyà:ngò, ngà nø Israel cèrì yv́ng svng tokngv̄m nø, ‘Nvkop nvkàng maq Gvrayí namaq yv́ng svng dèzv́rvtnà we íe,’ wa vl bǿngò dvgvp, angmaqí ngà svng, ‘Ang bø̀ng nø kapà íe?’ wa lā røt ra nìnø, ngàí kadø la vtv̀ngònøng?” a:lòe. Gvrayí rá Moshi svng, “NGÀ NØ I DV̀NGWA PÈ NGÀ ǾNGÀE,” a:lòe. “Nàí Israel cèrì svng yadø èa:lò, ‘“NGÀ ǾNGÀE,” wa pèí namaq yv́ng svng dèzv́rvtnà we íe’ èa:lò,” a:lòe.  Gvrayí Moshi svng rá yadø a:lòe. “Israel cèrì svng nàí yadø èa:lò, ‘Nvkop nvkàng maqò Gvray, Abraham ang Gvray, Isak ang Gvray, Yaku ang Gvray, Yehowaí namaq yv́ng svng dèzv́rvtnà,’ èa:lò. Yehowa bø̀ng yalòng nø dvciq lvpat Ngà bø̀ng í nø, tiq mvril nø tiq mvril taq dvdv̄m rǿnlvm màná dø̀mrø̄ íe.  Ediv̄m nø Israel shaqré shaqtvngri dèkø̀:mò nø angmaq svng yadø èa:lò. Nvkop nvkàng maqò Gvray Abraham ang Gvray, Isak ang Gvray nvng Yaku ang Gvray Yehowa nø ngà svng dvtánshì daqì nø yadø wae: ‘Ejip vsvng rìí namaq svng dèkīnøng we svng Ngàí yv̀ng bǿngà rvt, Ngàí namaq svng jø̀ngjǿngni nøtnāìe.  Wedø í rvtnø Ngàí namaq svng, Ejip móng taq dvshà mvhøt nàhǿmnøngrì kèní vgùngì nø, nōngtì nvng kwátì vyø̄ we tiq móng: Kanan vsvng, Hiti vsvng, Hiwi vsvng Amori vsvng Perizi vsvng nvng Yebusi vsvng rì vl móng svng shø̄nlv́m íe, wa nø vdv́nshaq íe,’ wae,” èa:lò. Wekvt angmaqí nà kà svng ètáā dae. Wekvt nà nø Israel shaqré shaqtvngri nvng tiqdø, Ejip móng koqkv́m mv́rdv̀ng svng èdìnøng nø ang svng yadø èv̄lnøng. “Nøngmaq Hebru dvcìò Gvray Yehowaí nøngmaq svng nàhǿm daqshà. Wedø í rvtnø, nøngmaq Gvray Yehowa kaq núngpà shvrúngālv́m, zømwàng kaq vshø̀m ni dí tvràhøq dí dèzv́rshà, wàì nø nà svng røtshàìe, èv̄lnøng. Wedø ínìgø, Ngà jórnònggùn wu:rí màshvnv́ngò dv́ngte nø Ejip koqkv́m pèí namaq svng mèshèlang lóngnøng we Ngàí shángòe.  Wedø í rvtnø, Ngà wur zóngshø̀ng nø Ejip vsvng rì dvhø̀ taq Ngàí dvdv̄m vtiqlv́m wàlv́m dv́nò rìí Ejip móng svng shø̄nlv́m íe. Wemèpvng wa a:ngí namaq svng shèlàngvtnønge.

 

 

Mati 11:28-30