Saduki rìí zunlv́m lòng dang vlø:tnò we

Mako 12:18-27

Wemèpvng, shì yv́ng kèní zūn lōng we màvl, wa kv́m we Saduki mvdò Ang yv́ng svng dì ráì nø rø:tnò we nø, h 19 “Svra pèá, Moshií nøngmaq dvpvt yadø nàrua yv̀ngshà. Lvngàré tiq pè nø svma vdávm mèpvng cv̀mré màdá ke la shìvm nìnø, angnv̄m pèí angmvt mè svng rvtø̄ò nø, angnv̄m pè dvtut lvvl dø wá ràe, wa vrū yà:ngà. i 20 Vzv̀ng dvgvp Angnø̄ngnv̄m shvngøt pè v̄le. Vlat pè nø zvmì lūshì dá:ngí, angcè màdá shìá:mì. 21 Vdǿ gø wemè svng rvtø̄shi dá:ngí, angcè màdá shìá:mì. Vkwin gø wedø tiqdvchá shìá:mì. 22 Angnø̄ngnv̄m shvngøt pèpèí rvtø̄ò dá:ngí, angcè màdáshaq shì yà:ngì. Shvngbe mèpvng nø svmaré mè gø shì yà:ngì. 23 Angnø̄ngnv̄m shvngøtpèí wemè svng gv̀lv́m yà:ngà we í rvtnø, zūn lōng kvt wemè nø ka pè chø̀mmè í longe ma?” a:lòe. 24 Yesuí angmaq svng, “Namaqí nàlénøng we nø, Shànshér Kàru rì svng gø, Gvray jórnònggùn svng gø, mècíngnøng rvtnø íe. j 25 Kadø íe wani shì yv́ng kèní zūn long dvgvp angmaq nø svma gø mvlūshi long, zvmì gø màshvrúngvm long; angmaq nø muqlàng dvzv́rrì dø í longe. 26 Shì yv́ng kèní zun long dang èshø̀:nò nìnø, Moshií svmi gwā we shǿng póng dang vrūò zàng taq, Gvrayí Moshi svng, ‘Ngà nø Abraham ang Gvray gø, Isak ang Gvray gø, Yaku ang Gvray gø ǿngàe’ wa nø vrū yà:ngà we namaqí mèrø dv́rnø̀ng ma? k 27 Namaqí nø gvzà dvdv̄m nàlé dv́rshà, kadø íe wani, Gvray nø shì rìò Gvray mø̀í. Cúnshi rìò Gvray mv̀ng íe,” a:lòe.