Tima na:ro we

Nv̀m gá daqì dvgvp muqlàng dvzv́r wepè níí Lot svng shvná:ngò nø, “Ebúngnøng, nvchø̀m mè nvng yayv́ng vl we nvcè mèní svng èshøl bǿò; mø̀í nìnø wamà yalòng angmaq vléshì we mvrà rvt shø̄:nò long taq namaq gø nànùngke bǿnø̀nge,” a:lòe.  Inìgø Lot nø vtǿne. Iwe, Yehowaí ang kaq dvsházāò rvt, wepè níí ang svng gø, ang chø̀mmè svng gø, angcè mèní svng gø wur kèní shv̀l bǿà nø wamà vtv́nglap svng dvtuq bǿà.  Wekvt angmaq svng wepè níí vtv́nglap svng shøl daqà dá:ngí tiq pèí nø, “Namaq gø̀nshaq lutshilv́m èvtshìv́mnøng; namaq mèpv̄ngkaq gø mèdèjaqnøngni, vdv́m rvyang taq gø mènārshìnøngni. Namaq mvlúmkélv́m rvt, shìgùng svng èvtshìv́mnøng,” a:lòe.  Iwe Lotní angní svng, “Ngà Vkàngpè níá, wedø nø laq mø̀í!  Eyv̀ngshò, nàní vshuqpè ngàí nø, nàní mv́rdv̀ngø jejú lún bǿngà nø, ngà gø̀nshaq shèlutshà weí nàní mvkok dvdínøt vtv̄ng gø dètánā bǿshà. Iwen ngà nø, shìgùng yv́ng høq vtshì mvjòr ke, vcatlv́m yalù:ngí èzǿngkēng dak nø ngà shø̀ngvm we màshá. Ku, yarvwá nø vtshì vmø høq, ní gø níshì nø cv́m gø cv̀me. Ngà cúnshì lúnlvm, weyv́ng svng vtshì dèzv́rshà. Yamvrìng nø gvzà cv̀m we mø̀í ma?” a:lòe.  Wekvt wepèí, “Eyà:ngò, nà èrøtkà svng ngàí zø̄ngānge; nàí èshø̀:nò rvwá svng nø màshvmv́nglv́m íe. Iwe tiqdvshaqí èvtshìvm; nà weyv́ng svng mètuq dv́ngte nø ngàí pàgø wá màshvla,” a:lòe. Wervtnø̀ wervwá nø Zoar* tǿ yà:ngà. o 23 Zoar rvwá svng Lot tuqlvm zà:mí nø, nv̀mjàng íá:mì.  Wekvt muqlàng taqlap kèní Sodom nvng Gomora wamàní mvdv̀m svng Yehowaí gàn nvng svmī dvzaq daqà nø, wamà werì svng gø, vdv́m rvyang shvngbe svng gø, mvrìng wamà rì taq vl we vsvngrì shvngbe nvng rvgaq taq yō pv̀n shvngbe svng gø, a:ngí tø̀m dvdø̄m bǿà. Iwe Lot ang chø̀mmè mv̀ng nø mèpvngpvng di ke, mèpvng kaq wv́l pōshì nø dvjaqò yv́ng kèní, shvlaq tiqtùng vpoá:mì.  Sháng mvgágá Abraham búng nø, Yehowa mv́rdv̀ng taq ang ripma:pmì yv́ng svng dìá:mì. s 28 Sodom ó Gomora nvng vdv́m rvyang rvgaq shvngbe kaq dvjaqò nìnø, kū, wemóng køp kèní mvyǿ nø, svmi póngràng mvyǿ padø dǿ we svng yà:ngòe.  Gvrayí we vdv́m rvyang wamà rì svng shvmá:ngò dvgvp, Abraham røtshì kà svng Gvrayí dvdv̄m rǿnāò nø, Lot v̀l yà:ngì we wamà rì svng tø̀m dvdø̄:mò we angni taq, A:ngí vrø̀l vcat dvzá:rò long taqkèní A:ngí Lot svng shvlé yà:ngà.