Vmvngam we vyvngce kashvbong

Friday, June 28, 2019

Mongka Tiq Ezekiel 34:11-16

Vlǿmshì nø:tní nø, nøt tøn vnǿn mèdèzá:rì, kadø íe wani nøngmaq svng èzí daqshà we Shànshér Pvlàcèí nøngmaq nøt vdòng svng Gvray Ang shóngnøt èshúra daqshà we sháìe. Pàwálv́m wani nøngmaq shīnī shaq nònggùn mvà:lì dvgvp, vgv̄nshaq rvtø̀ taq Kristu Ang nø Gvray dvrá màpǿòrì dvpvt shì yà:ngì. Vsvng shvlá tiq gǿ dvpvt shí kvmshi we vsvng tiq gǿgǿ ladv́ng vl nìgø, døngman vsvng dvpvt shí kvmshi we vsvng nø tvné tiq gǿ gø màvl. Wedø ínìgø nøngmaq nø mvrà vl vsvng shīnī íshà dvgvp, Kristu nøngmaq dvpvt shì daqì lòng kèní, Gvray Ang shóngnøt nø, nøngmaq svng dètan daqshà. Nøngmaq nø Ang shvwií døngman dvdutna we lún bǿshà rvt, Ang taq kèní téwa Gvray shv̀mná høpnøt kèní shvlut we lún lú:ngìe. Kadø íe wani nøngmaq nø Gvrayó shīnī ngv̀nshà íshà dvgvp, Angcè pè shì daqì yv́ng kèní Gvray nvng shvrv́m shvrá we nøngmaqí lú:nì kvt nø, Ang nvng shvrv́m shvrá we lún bǿshà rvtnø, Ang cúnshì we gø̀nshaq taq kèní téwa chv́ng we lún lú:ngìe. Vrá yadø wa mvtaq, nøngmaq svng shèrv́m shèrá bǿshà pè nøngmaq Vkàngpè Yesu Kristu taq kèní, nøngmaq nø Gvray vdòng taq shaqshaqwa dvbùìe

Chat conversation end

Type a message...

Mongka vni Roma 5:5-11

Pàwálv́m wani Vkàngpè Yehowa yadø wae. Eyv̀ngnøng, Ngà vdèí ni Ngà vyv̀ngré svng gùn nø lálv́m íe. Vyv̀ng roqshúí vshiná:mì we angò vyv̀ngré dvhø̀ø̄ vl dvgvp, a:ngí ang vyv̀ngré svng mvku:kngò padø, Ngàí Ngà vyv̀ngrì svng mvkokngò nø, rvmøt vkǿn nø dø̄dv̀ng wa we angni taq, angmaq vshiná:mì zàng vrv̀m taqkèní Ngàí angmaq svng shvlutlv́m íe. Vsvng dvcìrì vdòngkèní Ngàí angmaq vtv̀ngò nø, móngdànri taqkèní Ngàí angmaq svng dvkø̀mò dá:ngí, angmaq vdè móng svng dvtv̀nglv́m íe. Israel shìgùngrì taq gø, tìwàng tv̀ngri taq gø, móngdàn vdòngø vsvng v̄l zàngrì í dv́ngte taq gø Ngàí angmaq svng shàv́mlv́m íe. Ngàí angmaq svng nìnà shvv́mrà shvlá taq shàv́mò nø, angmaq shø̄n v́mrà nø, Israel shìgùngrì vháng yv́ngyv́ng í longe. Shø̄n v́mrà shvlá zàng taq angmaq bø̄m nø, Israel shìgùngrì taqò nìnà shàv́mrà shvlári yv́ng angmaqí shø̄n v́m lún lú:ngòe. Ngà vyv̀ngré svng nø Ngàí ni shàv́mò nø, bø̄m dvzv́rlv́m íe, wa Nvkangpè Yehowa Ngà shø̀ne.Vmàná:mìrì svng nø Ngàí lá:ngò nø vshiná:mìrì svng gø Ngàí vrá dvkø̀mlv́m íe. Dvláshìá:mìrì dv̄mmá svng gø Ngàí døpmāngò nø, shaq cv̀mrì svng gø nonggùn dvkv́nglv́m íe. Iwe kvp rì nvng nònggùn kv́ngrì svng nø Ngàí gvyaqlv́m íe. Ngà vyv̀ngré svng nø Ngàí dvrá dø shvv́mlv́m íe.

Luka 15:3-7

Wekvt Yesuí angmaq svng kàshvbóng yalòng shø̀:nòe. “Namaq dvhø̀ø̄ vsvng tiq gǿ nø vyv̀ng tiqyá vdá we tiq go lādv́ng vmvngv̄m nìnø, wá dvgø̀cé dvgø̀ gō nø zømwàngø la:ngò dá:ngí, vmv́ngá:mì go svng lá lún høq mvláò we kagǿ v̄le ma?. Wegō yv̀ng bǿò kvt wepè nø dvbù sórí ang raqpù taq baqò nø chø̀m svng lòe. Ang chø̀m svng tuq rā kvt, ang shóngshì rv̀mnvng rì nvng tiqdv́ng vsvngrì svng a:ngí dvkø̀:mò nø, ‘Ngà vyv̀ng vmv́ngá:mì gō yv̀ng bǿngà rvtnø, ngà nvng tiqdø dvbùì,’ vl lú:ngòe. Ngàí v̄la:tnìni, welòng dø tiqdvchá muqlàng taqlapmø gø, nøt língshì mvrà we døngmān vsvng dvgø̀cé dvgø̀ gǿ rvtnø dvbù we mvdv̀m nø, mvrà vl vsvng tiq gǿ nøt língshì rā lòng svng téwa dvbùlv́m v̄l longe.