Zong nvng Shvlēba kàshvbóng

Saturday, July 27, 2019

Gvray Mongka Tiq Tut

BÚNGÁM 24:3-8

Wekvt Moshi vtv́ng daqì nø, Yehowaí dvká:mò we kàrì nvng øplv́m vgv̄nshaq dvrárì shvngbe bashà rì svng dvtá bǿà kvt bashà rì shvngbe tiqshaq wáshì nø, “Yehowaí shø̀n daqà kàrì dø tiqdvchá, nøngmaqí shvngbe wàlv́m íe,” wa vtá:nòe. Wekvt Moshií Yehowa Ang shø̀nkà shvngbe kàru taq vrūòe. Ang sháng mvgágá kūngshì nø shìgùng lv̀ngpvngø, Israel tiqcé vní dvgø̀ng í dø tiqdvchá, tvróng tiqcé vní gù:ngí núngpà shvrúngrà tiq lòng vra:ngòe. Wekvt a:ngí Israel dvcì cèrì taqkèní gùchàngrérì svng dvzá:rò nø, angmaqí nø Yehowa svng wv́r núngpà nvng shvrv́m núngpà wàlv́m nungwà ngvlácèrì shvrúngāòe. Wekvt Moshií shvwi tiq wál nø kūng taq tāò nø, tiq wá:lí nø shvrúngrà mvdv̀m vpø:pmòe. Wemèpvng a:ngí Kàgvp Kàru Bok lùò nø bashà rì mv́rdv̀ngø rø̄ bǿà kvt angmaq nø, “Yehowaí shø̀n daqì kàrì dø tiqdvchá nøngmaqí shvngbe wàlv́m íe,” wae. Wervt Moshií shvwi lùò nø bashà rì svng vpø:pmò nø, “Èyv̀ng nǿng, yalòng nø Yehowaí namaq svng dèkv́m bǿshà we kà yarì shvngbe svng shvdø̄:ngò we kàgvp shvwi íe,” a:lòe.

Mati 13:24-30

Yesuí angmaq svng kàshvbóng vrá tiq lòng shø̀:nò nø yadø a:lòe. “Muqlàng móngdàn nø, vsvng tiq gǿí ang rvmá taq dvyø̀ shvlá wø:nò lòng nvng vbónge. Iwe, vsvngrì yøp dvgvp ngv̀nshà pè dì ráì weí, zōng dvhø̀ taq shvlēba wø̄:nò dá:ngí loá:mì. Zōng yó lú:ngì nø, shírùng vyv́ng lú:ngà kvt nø, shvlēba gø yv́ngshì lú:ngì. Rvmá angkàng pè vshuqrì dì ráì nø ang svng, ‘Vkàngpèá, nà rvmá taq nø dvyø̀ shvlá dvchǿng èwø̄na:pmà we mø̀í ma? I nìnø shvlēba nø kayv́ng kèní vbá ráì?’ a:lòe. Wekvt a:ngí angmaq svng, ‘Yalòng nø ngv̀nshà tiq pèí wàò we íe,’ a:lòe. Ang vshuqrìí vrá ang svng, ‘Ini nøngmaq dìì nø, put dvzv́r mèyǿe ma?’ a:lòe. Iwe a:ngí, ‘Mø̀í; namaqí shvlēba svng èput daqnø̀ng ke, zōng gø werì nvngnvng vput long we màshá. Ya vní pv̀npv̀n nø shvrvt rvtø̀ høq tiqrárá laq yō. Wekvt shvrvt rvtø̀ taq ngàí shvrvtshúrì svng v̄lò nø, shvlēba rì vzv̀ng rèkulnøng nø, wv́rlv́m dvpvt angrvnàm rènàmnøng. Zōngrì mv̀ng nø, ngà vzá taq kutwa dèkø̄m bǿnøng, v̀llv́m íe,’ wae,” a:lòe.