Ireland móngdàn Davelin myuq taq vsvngrì lvpat kaq svng kupgvr lvm shúnshì we vzi vrùng tvyø taq vsvngrì àngkíng, àngmùn gø cvmré dvjáò we

Ireland móngdàn Davelin myuq taq vsvngrì lvpat kaq svng kupgvr lvm shúnshì we vzi vrùng tvyø taq vsvngrì àngkíng, àngmùn gø cvmré dvjáò we dangrì svng vgámwe ínø vsvng lvpat rì svng kupgvrwe tvrà svng vtoò we tvyø svng July 1 ni Davilin myuq taq wà bøà wegø íe.

We lvmang taq vbáwe vsvngrì nø cvmré góng dvjá shìwe tvrà vháng mvnshì we  ínø wedø cvmré góng shini mà dvjáshì ke 3 ni calvm vsúyaq kaq svng shokshún bøà wegø íe.

Ya lìpùng lvmang taq vsvng 3000 rvzé gø kømngømnø wáshì lún bøà wegø íe. We shvrà taq móng lvmvng bvnlì àngkàngrì íwe Peadar Toibin၊ TD Mattie McGrath maq taqkèní gø mòngkà dvshvng bøà.

Cvmré góng dvjá ò we tvrà svng caò we rvtø vdòng cvmré góng íwe svmarérì taqkèní cvmré shøqlvm tán dvgá tvrà rvcvngshì lúnlvm dvpat wedø tvyø svng wáshì wegø íe.

Vle á:mìwe nøng vdòng wedø cvmré góng dvjá ò we vsvngrì 22% høqshaq vháng bøì we íe. Wedang svng chvkwa gùndvtøp we taq 8156 boq bøn bøì we ínø 2021 nøng vdòng 6700 boq høq shaq vháng bøì wegø íe. Yalòng nø vtang kèní svre dvké we tiq tvrà gø íráì.
 
Cvmré góng dvjá lvm vsvngrì kaq 3 nø ca dvzvrā we àng mvtú nø 2019-2022 nøng vdòng wedø cvmré góng dvjá lvm tuqráì we cvmré góng àngmèrì 4000 gø rvzé nø wedø 3 ni ca nø nøt dvtøpshì dvzvr we vdòng taq vrá tikvt mvtuq rawe dangrì svng yvng nø wáshì ráì wegø íe.

Ireland móngzøng cèrìò cvmré góng dvjá shìwe Uqbvdi dvrá lòng svng 2019 nøng taq vrá dvcøp shvnvp bøà wegø íe.