St.Peter nvng St.Paul ní dø Vkangpè Yesu kaq èdì we tvra taq nàtōshì wā Svrabín Koqkvm Francis dvkv'm we 

St.Peter nvng St.Paul ní dø Vkangpè Yesu kaq èdì we tvra taq nàtōshì wā Svrabín Koqkvm Francis dvkv'm we 

Svrabín Koqkvm Francis nø St.Peter nvng St.Paul níò bóy ni Missa  gaichuk Svrado ku àngshvr dv'ng we vtoshì lún bøā we mònggvn tøngtang kèní Svrado gvba rì dvgùng zí nø shvringòè.

Gaichuk Svrado àngshvr (30) rvzé svng dv'ng bø'à. Vya dv'ng bø'à we rvtø nø vlē á:mì we rvtø ínø vkvtwa covid zønli ubvde cvt bø'à kvtwa gaichuk Svrado rìò dvgùng muq lòng kaq dì nø vtōshì dang íe.

Missa Kàgvp Noqngøm rvtø vdòng ' Seises ' Spain zilàngré pèò Gwàya mvdò nvng Svrabín rìò Noqngøm zong wā Vsvng mvmè í shá vrá we Sistin Noqngøm chøm ceò Gwàya mvdò nvng  ‘Coro Guida’ maqí Missa Noqngøm rvtø vdòng taqø mvkún zaywa rì taqkèní shvring shvta bø'à.

Mongkà vdòng taq Svrabín Koqkvmì St.Peter 'tvlú vlē ' wàwe Kà svng shøn dv'ngbø'à mèpvng Àng nø Vkangpè Yesu mèpvng tiqdvshaqí Kà shvdiq dìng dø cvn bø'ì dang, tiqgø'gø'ò v-maqkvmà lòng gø røtshì we mà-vl we dang, St.Paul nvng vbóng dø vjang laqya vlíng yangì dang, St.Paul nø Gvray dvbùshang mongkà dvsher we taq Sasvna me dvpvt dvgùng muq vpø shvring gø' íwe dang shøn bø'à.

Missa Kàgvp núng nø Noqngøm we taq Ukraine móngdàn Shvngkà kønmvng rìò døngku me la tiqmaq gø lúm bø'ì. Missa Kàgvp Noqngøm rvtø lvngdøm taq Svrabín Koqkvmpè Francisí Odatox shvngømré Vgo Bartholomew kèní dvzvr daqa we kønmvng mvdò kaq gø oqā wà Kà shøn bø'ì we dang shálún shìe.