" Svrabín Koqkvmpè Francisò kønmvng nvng Russia shvngømré vgorì vhøm we "

" Svrabín Koqkvmpè Francisò kønmvng nvng Russia shvngømré vgorì vhøm we "

Svrabín Koqkvmpè Francisò kønmvng cardinal Metteo Zuppi nø vlē á:mì we Nár vbíni Russia móngdànò myoqdō Moscow kaq dvzvrò nø Russia Odatox shvngømré vgorì nvng vhøm bø'ì.

Cardinal nø Itali Catholic Svrado mvdòò àngké Vgo pè gø íe. Cardinal nø Moscow yv'ngø (3) ni vllvm ínø Svrabín Koqkvmpè tvle ' Mongzøl lvm dang nvng Dvrá rīn vrá vtoshì lúnlvm dang rì svng vjáng nø vrashì lvm ínø Russia nvng Ukraine móngdàn vdòng mvjvn dàm vhø'mō we shvrà vl vsvngrì kaq svng gø dvshá zā tùbùm dvbàng weí móngdàn sømsaq lvm bvnlìrì svng nvmlat pv'ngshì lvm rvt mvdøng vrashì lvm rvt dvkv'm bø'à.

Russia móngdàn tuq Svrabín Koqkvmpè ò kønmvng nø cvmrérìò vlún vkvng dang nvng singdø vbong vshong wà gø' Maria Alekseyevna Lvova-Belova nvng gø vhøm weí Ukraine móngdànò cvmré (19000) gø' Russia móngdàn kaq shøl lúngà we dang gø vrashì lvm íbø'ì. Yalòng banchvk nvng singdø pvra:nà lvm rvt May shvlá taq Svrabín Koqkvmpè nvng vhøm bø'ì dvgvp Ukraine Dvmmvdaq taqkèní røtnímshì dang gø íe.

Moscow taqø tuq bø'ì we Svrabín Koqkvmpèò kønmvng nø nár vbíni taqø Gvray angmè Medō Noqngøm zong yv'ng Missa Kàgvp núng nø rvtø shøl weí shvring shvta bø'à.

Nár vshøm ni cardinal nø Russia Dvmmvdaq Putin ò kønī móng v-toq v-tìp kønmvng pè Yuri Ushakov nvng gø vhøm bø'ì. Wèni taqø Ukraine móngdàn taq Subiyet í øpmō dvgvp shvt yangà we Svrē Vsvng rì kaq svng gø dvdvm nø lìpong me wàò taqsórí vkvt Russia mvjvn dàm rvt cø'má:mì we Ukraine cil rì dvpvt gø Nønt yór we dang dvtan nø vjúrøt dvbàng bøā.

Jun shvlá (26) niò Noqngøm rvtø svng gø Lviv taq vl Gvray angmè vjúrøt tøm me Stradch yv'ng àng vtóng dvla vl dø rvtø mvmè vjúrøt we wà bøā. Vjúrøt Noqngøm we taq gaichuk Svrado Sviatoslav Shevchuk í shøl nø dvnung bøā. Gaichuk Svrado gvbapè ínø móngdàn tøngtang taq vl Ukraine Greece Catholic sasvnaò Vgo pè gø íe.

Missa Noqngøm we svng (1944) Stradch Sasvna Ukzuqò shvrúngshú Pongøp íwe Fr.Mykola Konrad nvng Gwàya bvnlì àngkang rvzvngce Volodymyr Pryima maqí shvdún màdá Supiyet Russia cildvp bvngvm Wūr rì Kàgvp vtoshì bø'ì mèpvng lo tvrà yv'ng wà:pm nø shvt bøā. Wè gø ní kaq svng svrabín Koqkvmpè John Paul ll Ukraine móngdàn kaq svng tuq lúngì dvgvp Kvmnønt svrē ku Shànshér vsvng wā dv'ngò we (30) gø taqø wè vní pè gø vbá we íe.