Svrabin Koqkvm Pe Francis keni Wuhan Virus Zari dvpvt vju rxtno long

Svrabin Koqkvmpe Francisi, Wuhan Corona Virus nvng zari dvpvt vju rxtno we shvngka

Svrabin Koqkvmpe Francisi, Miwa Mongdan keni bunshi we Wuhan Virus nvng za nx, dvsha we ri dvpvt tiqkvt ra vju rxtno we svng talun shie. Vra nx, shvngxmre ri keni gx, Virus nvng za nx dvsha mvhxt vhxmri shvngbe dvpvt vju rxt nv lvm, February 12, niq taq Svrabin i Vatican keni dvnuoe.

Wuhan Virus rvt nx, Miwa Mongdan, Gxrwvng meme yvng, Pazi Zong ri gx, February lvngdxm ni hxq Zong ri bik lvm dvpvt Vsuya rii dvnuo long svng gx Vatican shvngka keni shalun shie.

Corona Virus nvng zari dvpvt vju rxtno nx Shvngxmre ri svng dvnuo long kaq vlevm mi we January 26 niq taq gx Svrabin Francisi tvnu yvnga. Vra nx, Virus yoga svng gvgoi lvm dvpvt Vatican keni Miwa Mongdan vsvng ri svng Masks (600000) gx zio tvra vle.

Ya rvtx hxq Virus nx, Mongdan vrvm keni 20 jvn Mongdan svng hxq bxa we svng gx, Vatican Shvngka keni shalun shie.

Vra nx, February 13 niqo DVB Shvngka keni tvnuo we Nvpshvng shvngka yvng, Wuhan Virus nvng shivm mi we vsvng shvngbe (1357) gx i we svng shalun shie. Virus nvng za we vsvng shvngbe nx (60017) gx i yvmmi wa nx, DVB Shvngka keni shalun shie.

Vde Myen Mongdan yvng nx, Virus nvng za we dx lvno vsvng (16) gx vle wa nx DVB Shvngka keni shalun shie.