Kam shiwe

Catechism

Yesu Wulgang lvjum

Wulgang Sumla lvjum svng sha dezvr we tvra.

Wulgang sumla wawe taq vni pvn vlnx bxngzi shiwe svng shalu:n shie.

 

Wulgang taq Yesu Sumla ma-zaq shiwe shxngtxng long nvng Yesu Sumla vzaq shiwe Wulgang ie. Yesu Sumla ma-zaq shiwe wulgang kaq nx “Cross” txo nx Yesu Sumla vzaq long svng nx “Crucifix” txoe. Crucifix wawe nx crucifixion wawe lvjum ie. Crucifixion wawe nx, Yesu kaq jxng jxng wulgang yvng shvto tvra, Yesu Ango gxnshaq dvbxm shiwe tvra kaq dvdvmo long mvng ie.

 

Tiqciq yang, Yesu nx jxng jxng wulgang yvng Ango gxnshaq dvbxm shi nx vsvng dvciq shvngbe kaq chuto long ie. Yesu nx, dvga tvrari taq keni nxngmaq kaq chuto mv-i nx Wulgang taq keni Ango chutchvngwe mongzxl ezi shawe ie. Longdxng mvdvmx shinx, ti yvng shinx nxngmaq kaq chuto mv-i. Wulgang yvng Ang gxnshaq dvbxm shinx echut yvng sha. Wervt nx, nxngmaq dvpvt tvciq gxnshaq mongzxl nvng chut chvngwe mongzxl nx wulgang tvra tiqme keni wa ezi shawe ie.

 

Vniciq yvngnx, Wulgang wawe nx, Akvng pe, Ance pe, Shvnsher Gvray nvng tiqdx vle wame kaq dvdvmo long ie. Yesu Ango chut chvng bvnli wawe rvtx, Akvng pe, Ance pe, Shvnsher Gvray nvng tiqtx chutchvng bvnli wawe long ie. Wervt nx, nxngmaq vju rxt shiwe rvtx; Akvng pe, Ancepe, Shvnsher Gvray bxng taq keni wulgang sumla wanx vju rxt shiwe long nx Vsumgyoq tiqgx Gvray bxng taq keni emano jeju lu:n shiwe tvra ie. Wervt nx, kvmshiri dvpat Wulgang nx jxng jxng vpxwe long ie.

 

Vsumciq yvng nx, Wulgang nx kvmshiri shvngbe dvpat shvrlvm gumla mvng ie.  Ka shvbong nx, Mynamar Mondvno gumla mvng mongdvn sumlvng ie. We mongdvn sumlvng lu:n shi lvm dvpat vgo washiri meme nx angmaqo gxnshaq dvbxm shiwe tvra vle. Wedxni tiqdvcha, vsvng dvciq shvngpe Gvray Mongdvn lu:nlvm dvpvt Yesu nx  Wulgang yvng Ango gxnshaq dvbxm shiwe ie. Wervt nx Wulgang nx nxngmaq shvngbei vbx rawe ie.

Nxngmaq vju rxt we rvtx, noqgu we rvtxri taq, wulgang sumla wa nx, wulgang gvlo nx vju rxt shiwe ie. Wulgang kaq nx Satvn pei nx jxng jxng shvrewe ie. Satvn kaq dango long nx wulgang long mvng i nx nxngmaq kaq chutchvng mongzxl ezi shaq mvng ie.

Wulgang kaq vbx we tvra nx;

1, Yesu o chutchvng bvnli kaq vpxwe long,

2, Yesu Ang vde kaq vbxwe long,

3, Akvng pe, Ance pe, Shvnsher pe kaq noqo long ie.

Nxngmaq kvmshirii wulgang kaq ma-bx we ini nx, mv-kvm shirii nx te wa vbx lvm tvra mv-vl. Nxngmaqi wulgang kaq mv-dvtan ini nx, dvgarii dvtan lvm tvra mv-vl. Yesu nx wulgang baqshi taq sori, echut we dx tidvcha, nxngmaq gx wulgang baqshi taq sori chu:nshi nx Muqlang Mongdvn kaq dilvm ri ie.

Add new comment

9 + 10 =

Please wait while the page is loading