Gvray dvbùshv̀ng bv̀nlì taq tiq zaqlè tvrà diwe shvngø̀mré Synod Report (II) tut

Gvray dvbùshv̀ng bv̀nlì taq tiq zaqlè tvrà diwe shvngø̀mré Synod Report (II) tut

Svrabín koqkámpè ò dvtú we taq Gvray àngò dvcìrì ò mvdò rì íwe Svrado àngké mvdò rì nvng tiqdø mvngushì we svng wálún shìbǿì. Svrado àngké mvdò rì nø Svrabín koqkámpè nvng gø Svrado rì dvhø̀ taqgø vzø̀m vzvpnø̀ tiq zaqlè tvrà svng diwe dang vtán we íe. We tvrà taqnø Gvray bv̀nlì dvpvt kàciq gv́lshì shaq vsv̀ngrì nvng shvngø̀mré vsv̀ngrì shvngbe mvngushì lúnlv́m tvrà svng manggá gv́lshì wegø íe. Yadø wáshì we lìpùngmè nø shvngø̀mré dvpvt mvdø̀ng vchvk we lìpùngmè tiqlòng gø íe.

Yadø shvngø̀mré lìpùngmè nv̀mlat tut svng tuqlún lv́m dvpvt rvtø̀ 2 nǿng høqshaq vle bǿì wegø íe. 2021 nǿng October 9 kèní lìpùngmè svng poqpv́ngshì bǿì we taqkèní mònggv̀n móngdànrì àng dvtàng tàng rìò mvcøngshøp rì vshøp lúnshì bǿì wegø íe. Yalòng lìpùngmè nø 2024 nǿng October shvlá taqø Synod lìpùngmè (II) tut svng vdáng høq wáshì lv́m vdu rawe ínø̀ mvcøngshøp rì shvngbe nø Svrabín koqkámpè wur svng tuqvm we gø íe.

Shvngø̀mré mèò vtóng vlwe dø tiqdvchá lìpùngmè nø shvngø̀mré ò dvtúwe dvlàrì vdòng taq wáshì wegø íe. (II) boq wa boq Vatican lìpùngmè nø rvgaq mvdàm shvngø̀mré dvhø̀ taq wun ráà we kámnøt dvyø̀ tiqlòng ni íráì. Shvngø̀mré mèò mvshǿl rì, shvshér tvrà rì Gvray paqzírì dvkø̀mwe tvrà taqkèní yó ráì we nvng témvnshì ráì we tvrà tiqlòng gø íe. We tvrà vdòng kèní pvlàcè dang síngsháì nø Gvray dvbùshv̀ng bv̀nlì taq dvzøm dvzaq shàì we tvrà tiqlòng gø íe.

Wedø ni Synod lìpùng mè taqgø téwa shvla we shvngø̀mré mè tvrà, manggárì svng dvsher lv́m Gvray í nøngmaq kaqsvng shvngø̀mré vdòng kaq mvngushì lv́m ègo ìe. Nøngmaq taqkèní wedø íwe tvrà rì bǿnlún lv́m dvpvt kàciqrì gv́lshì lv́m àng shóngshìe. Yadangrì nvng singnø̀ (Synthesis Report) taq dèni batò dvjà rì, vjúrøt shìwe tvrà rì nvng mvngushì we yv́ngkèní kàciq rì shvngbe svng mvcøng shøp shìwe gø íe.

Wervtnø̀ cø̀msaq mòngzø̀l we tvrà, tiqdá vsv̀ngrì ò kàshaqrì táā we tvrà, mòngkà dvsher we tvrà nvng vjúrøt shìwe tvràrì nø kadángte kø̀mzøp we tvrà svng svkse wáshì lúnlv́m gø ílonge. Màbóngwe tvrà, àng dvjàrì svng vtù we ku mǿí nø vsv̀ngrì ò kà, shaqrì svng gø táā we, cun dvtøp āwe nvng vdu vbóngwe tvrà taq riplv́m svng tvrà tóng dvzaqshì we gø íe.

Jø̀ng jǿng taq tìløp kámshì bøwe vsv̀ngrì, màbóngwe ìshøt jejú rì, bv̀nlì tvrà rì nvng Gvray dvbùshv̀ng bv̀nlì taq dvzømshì wenø nøngmaq dvhø taqwa mvtaq mònggv̀n dvpvt gø vchvk we dang nøngmaq taqkèní síngshá lún ìe. Dèni bat mònggv̀n dvjà taq yadø íwe tvrà svng svkse wáshì lv́m tvrà nø vzàng kaq vle bǿì we rvtø̀ rì mvdàm téwa vchvk lú:ngì. Yesu christu ò coqcv́nrì nvng nøngmaq shvngbe nø yadø íwe dvsháza shóngnøt rì dvshá mvhoq vsv̀ngrì kaq dvtānā lv́m bv̀nlì døngjá svng vtoshàì we íe.

Nøngmaq nø vdòng lvpsvng rvnaq dø cun dvtøp shàì nø lìpùngmè kaq shúshìwe àng mvtú rìsvng vtánāì we taqkèní shvlá vtangwe vjúrì svng vtoshì lúnì wegø íe. Synthsis Report nø Instrumentum Labouris ò àng mvtú rì svng àngkvt kvt vchà:ngì wegø mǿí nø̀ vchvk we àng mvtú rì svng vrá shvdøng lv́m dvpvt ni íe. Welòng nø làngdø̀m mvcøngshøp tiqlòng nø mǿí we ínìgø zv̀n dvtut wá vdu we bv̀nlì dvlà tiqlòng gø ni íráì.