Synod vrìng kàru nv̀mlat (I) tut

Synod vrìng kàru nv̀mlat (I) tut

Shóngshø̀ngwe vnvm vchvngrì, "nøngmaq shvngbe nø pvlàcè Gvray tiqgǿ taqkèní wani tiq shagóng svng tiqløp kámshì ráshà". Yalòng nø "tiq zaqlè tvrà taq mvngu shàì we shvngø̀mré dvpvt tiqnøt tiq mvyùng wáshì we, mvngu shàì nø̀ bv̀nlì wawe, dvbù shvng mòngkà dvsher we" dvlàrì taq 2023 nǿng October 4-28 ni høqshaq shvngø̀mré lìpùngmè nv̀mlat tut svng Gvray jejú kèní wálún bǿì.

Tìløp kámshàì weò ìshøt jejú kèní nøngmaq dvhø̀ taq màbóng we dvcì vtóngrì dvhø̀ nøt mvsø̀n tiqlòng wáshàì nø mvngù shàìe. Yalòng nø shv̀nshér pvlàcèò ìshøt gø̀mpaq tiqlòng ni íe.

Mònggv̀n taq rø mvtǿmshì dángte shìwvtrì nvng mvjànrì vkǿn we rvtø̀ yadø íwe lìpùngmè svng wá vdu bǿì wegø íe. Dvshá mvhoq vsv̀ngrì, yv̀mbv̀n vsv̀ngrì, mvjàn shìwvtrì dvhø̀ taq v́l vdu we vsv̀ngrì nvng mvhøt lv́m àngpv̀n pv̀n vhǿmò we vsv̀ngrì ò rvyù rvyúngwe kàshaqrì nø nøngmaq shvngbeò nøt mvsø̀n vnà taq tálún bǿshà wegø íe.

Nøngmaqò shvngngø̀mré mè taqkèní nø tiqgǿ nvng tiqgǿ dvhø̀ taq shvrv́m shvráshì lv́m, vdu vbóng we dvrá nvng cømsaq mòngzø̀l lòng svng vrang lúnlv́m tvrà svng nøngmaq ò nøt mvsø̀n nvng vjúrøt mùngkà taq kadvgvp gø vshøp shàì we íe.

Nøngmaqò kámnøt tvrà taq nøtdøng nøt tøpwe taqkèní Gvray mòngkà svng dvsher we bv̀nlì taq dvzaqshì lv́m dvkám we St. Peter ò vya svng kámshì ráì we Svrabín koqkámpè nvng tiqdø nøngmaq ò shvngø̀mré lìpùngmè svng Roma taq wálún bǿshà wegø íe.

Vrv́m vrá we nø Gvray àngò shv̀nshér we shvngø̀mré vdòng tiqni mvdv̀m tiqni vzìng ráì wegø íe. Nøngmaq vnvm vchvngrì shvngbe nø tiqnøt tiq mvyùng wáshàì nø nøt mvsø̀m shvrv́m shvrá shàì we taqkèní v̀lì wenø vtang kèní shvla nø̀ vnvp we bv̀nlì tiqlòng ni íe.