‘Tv́n tiqlvng kèní nø namaqí Ngà svng mèyv̀ng lóngshà.

Gvray móngkà taqkèní vrá tiqkvt nònggùn vzíkelvm Móngkà ciq nø Yohan 16:16-20 ciq vdòng taqkèní íe. Mongkà vzàng rølvm wàì.

Tv́n tiqlvng kèní nø namaqí Ngà svng mèyv̀ng lóngshà. Tiqlvng mèpvng nø vrá namaqí Ngà svng èyv̀ng lóngshàe,” a:lòe. m 17 Ang coqcv́nrì tiqmaq vrùng nø, “A:ngí nøngmaq svng, ‘Tv́n tiqlvng kèní nø namaqí Ngà svng mèyv̀ng lóngshà. Tiqlvng mèpvng nø vrá namaqí Ngà svng èyv̀ng lóngshàe,’ wa nø; vrá, ‘Vpè yv́ng svng Ngà longvme,’ wa kà nø kadø wa kà í ma?” wae. 18 “A:ngí, ‘Tv́n tiqlvng kèní,’ wakà nø kadø shø̀nkà í ma? Ang kapà shøn we nøngmaqí mvsháì,” wa vrúng mvnshìe. 19 Angmaqí Ang svng røt mvyǿ we svng Yesuí sháò rvtnø, “Ngàí, ‘Tv́n tiqlvng kèní namaqí Ngà svng mèyv̀ng lóngshà. Tiqlvng mèpvng nø vrá Ngà svng èyv̀ng lóngshàe,’ wvng we yakà svng namaq nàrøtkénøng ma? 20 Ngàí kàdøng v̄la:tnìni, namaq nø rv̀ngshvng èwànø̀ng nø dèyúrshìnø̀ng ke, rvgaq nø dvbù longe. Namaq nø nøt vtv̄ng dèsha lóngnøng nìgø, namaq nøt dvshàlòng nø dvbùlv́m vpōvme, a:òe.

Vpø íwe pèmè vnvmchvngmaq tálúnì we Vkangpè Yesuò lvpkà taq,
"Tvn Tiqlvng mèpvng" wàwe Hkristu Gvrayò dvkv'm Kà svng Vkangpè Yesuò coqcvnrì taqkèní mvsíng mvràlò. Hkristu Gvray shø'n mvyø we "Tvn Tiqlvng mèpvng" wà Kà nø Vkangpè Yesu kaq tvpnø dvki vre vhø'm weí Wūrgang mvdvm hà:pm nø shvt vhø'm ràe. Íni gø Vshøm ni wàni taq shì yv'ngkèní zun daqè wàe. Dvshà mvhøt vhø'm lvm Wūrgang tvrà svng Vkangpè Yesuí nø vkvtdø 
" Tiqlvng mèpvng " wā nø dvtú we Mongkà íē. Téwa nø (3)ni (3)yaq dvgvm vdòng vyàlò we,dvbú:m we vhø'mō rvtø, wè rvtø taq Vkangpè Yesu Hkristu kaq svng lvmboqrìí Àngmaqò shagóng nē taqkèní gø yv'ng mv-lúnò pàdø, Kvmnønt nē taqkèní gø Vkangpè Yesu Hkristu kaq svng yv'nglúnlvm vzà:m mà-vl bø'ì we íe. 

Íni gø (3) nī mèpvng Cúná:mì rvtø taq Dvzvr pèla svng (3) kvt (3) boq lvmik kùmlà dvtánshì lú:ngì dvgvp Hkristu Yesu svng shagóng nē taqkèní gø, Pvlàcè kvmnønt nē taqkèní gø yv'ng lún bøā we íe.

Wervt "Tvn Tiqlvng mèpvng" Nàmaqí ngà svng yv'ng mèlún lú:ngshà wàwe nø Tvn tiqlvng mèpvng Wūrgang mvdvm yv'ng hà:pm nø gønshaq dvbø'mshì nø shìlvm dang svng shagóng lvptaqkèní yv'nglún lvm mø-í , Kvmnønt taqkèní wā yv'nglún lvm vlē wā, dvkv'm we Mongkà íē. 

Vrá nø Vpø íwe pèmè vnvmchvngmaq,
" Tiqlvng mèpvng nø vrá Ngà svng èyv̀ng lóngshàe," wà Kà nø vrá shì yv'ngkèní zunlúnlvm , Vpè móngdàn kaq ngvnglvm dang , Shànshér Pvlàcè taqkèní dìdaq nø Shànshér Pvlàcè taqkèní àngmaq nvng tiqdø kám we mvdò rìò Noqngøm rvtø taqø rvtø vrvm vhøm mv-ngúshì lúnlvm íē, wànø dvkv'm nø dvshat we dang íē. Wervt "Tv́n tiqlvng mèpvng" wā kàru chang mvdvmø lvmboqrì dø nøngmaq gø Nønt mà-dvtiqshìlvm vchvk nge. Shèdømì we mongkà íē.

Vrá nø Vkangpè Yesu Wūrgang tvrà svng ngvng nø gønshaq dvbø'mshì bø'ì dang svng hà:mwacè shagóng lvpat kèní èyvng lóngò dvgvp krvtcø'm we shaqcvmlvm tiqlòng gø íe. Íni gø wè Wūrgang mvdvmø Gvray nø jór dvgùng pòngbang dvtan lvm rvtø, Satan kaq svng jø'ngjø'ng jór lúnlvm rvtø, shìlvm lòng svng jórlún lvm, nvmlat pvngshì rvtø gø íe.. wàdang svng vkvtdø yv'nglún shìe. Nøngmaqò lvpat taqgø Vkangpè Yesu kaq svng Kvmnønt nēí yv'ng mv-lúnìhøqshaq Vkangpè Yesu nvng vcar rì we, vmàng we .... "Tvn Tiqlvngcè" wàwe rvtørì  Kvmnønt shaqcv'mì yv'ngkèní vl gø vl sháòe, vl gø vl vdù we íe. 

Vpø íwe pèmè vnvmchvngmaq Vkvtdø Shagóng lvpat shaqcvmì yv'ngkèní nøngmaq lvpat taqgø ngø'lvm, yòrlvm, vtù vre we, dvshà mvhøt vhø'mlvm rì luq lúng dvgvp vlømshì ra màdá dvyórsháìe. Vkvtdø shaqcvmlvm rì vhø'm vdù ra dvgvp "Tiqlvngcè" wàwe Vkangpè Yesuò lvpkà svng dvdvm taqsórì Pvlàcè kvmnønt nē taqkèní yvng nø, nònggùn lùshàì we taq, lvmboqrì í Vkangpè Yesu yv'ngkèní dvbù nøntshømlvm vtoshìlún yangà pàdø nøngmaq gø'vrvm taqkèní gø vtoshì lúnlvm vlē wadang svng dvdvm nø vlømshì weí  Kvmnønt Pvlàcè nònggùn kūnga lùshàì wvng dvshat nø nònggùn zí mvyøngè.

Shvngbeí Gvray mongzøl lòng vtoshì laqlúnøng. Shvngbe svng oqā.