American Damvdaq Joe Biden í Catholic Sisters rì sv̀ng shvring gømpaq zíòwe

American Damvdaq Joe Biden í Catholic Sisters rì sv̀ng shvring gømpaq zíòwe

“Nuns on the Bus’ wawe dvgùng shvring gømpaq sv̀ng Catholic Sister rì lú vpǿe. Móngzøng cèrì í shvring we vháng vtang dvgùng shvring gømpaq sv̀ng Catholic Sister tiqgǿ kaq American Damvdaq Joe Biden taqkèní tuqrawe lvbán vdòng zílvm vllonge. Simone Campbell,S.S.S, wawe nø shvnglutwe vkáng nv̀ng singnø̀ Damvdaq pèí dvgùng shvring gømpaq sv̀ng shvring lv́m íwe dang Withe House kèní vle á:mì we lvbán 5 ni taq vrìng bǿà. Sister Cambell nø bv̀nlì kèní àng shi mvnvrshì we rvtø̀ vle á:mì we nǿng høqshaq Catholic shvngø̀mré ò shvngøt dvtúwe sv̀ngpv̀n dvcì vdu vbóng we dvrá mvdò nv̀ng singnø̀ shølshú tiqgǿ wáshì bǿì.

Sister Campbell kaq sv̀ng wulaq tvrà vdu vbóng we dvrá dang, móngzøng cèrì ò shìpvn nv̀ng singwe dvrárì dang nv̀ng shiqshàn tvrà nv̀ng singwe dvrá dangrì taq vlǿm:vm vrvmwe shølshú tiqgǿ ku mvsat shvring shìwe gø íe. Yalòng dvgùng shvring gø̀mpaq nø American móngdàn ò móng vsv̀ngrì kèní dvgùng zí vpǿ we vsv̀ngrì kaq shvring we gø̀mpaq íwe dang Withe House kèní vrìng bǿà. Tuqrawe July 7 ni taqnø Withe House taq wàlv́m íwe gø̀mpaq zí bóy tvyø taq gø̀mpaq shvring lv́m íwe vsv̀ngrì 17 gǿ rì taqkèní Sister Campbell gø vbá longe. We vsv̀ngrì nø bv̀nlìrì mvdàm dvzaq dvkángshì we dvcì shóngnøt tvrà taq shvring vpǿwe nv̀ng vsv̀ngrì mvdàm mvzán dø dvgùng vlnø shvring vpǿwe vsv̀ngrì íwe dang vrìng kàru kèní dvtú we íe. Yarì nø vsv̀ngrì í vlǿmvm vrvm nø nízì bv̀nlìrì dang, nøtsun paqzí dangrì nv̀ng sv̀ngpv̀n dvsháza bv̀nlìrì mvdàm shvlawe bv̀nlìrì dvzaqshì we mvtaq tuqrawe mèpvng dvcìcèrì dvpat sv̀ngpv̀n lvpat zìdangrì vháng vlún lv́m tvrà rìtaq lvpat zíshìnø bv̀nlì wawe vsv̀ngrì íwe dang vtàn lú:ngà wegø íe.

“Sister Campbell shø̀nwe taq yadø dvgùng shvring we gø̀mpaq shv̀ng shvringā we nø nøngmaq móngdàn vdòng taq móngzø̀ng cèrì ò lvpatrì kaq svng dvhángā we tvràrì taq tubùmā we bv̀nlì nø laqni vchvk we dang tvnù:ngò we lvjøm sv̀ng gø ziwe íe wanø vtàn lú:ngà. American móngdàn ò móng lvmangrì taq bøngshv̀ngwe Sister Campbell nø 2012 – 2020 nǿng dvhø̀ National Democratic Covention taqø 2 boq høqshaq mòngkà shøn bǿì we tiqgø gø íe. Àngnø “Nuns on the Bus” wawe zaqlèwàng tvrà tiqlòng sv̀nggø wàò weí dvgá Sisters rì kaqsv̀ng móngdàn vdòng taq bønwe tvrà rì sv̀ng shá dvzv́r wegø íe.

Àngnø 2010 nǿng nv̀ng gvzà màléwe rvtø̀ taq mvsat shì bǿì we “Affordable Care Act” sv̀ngpv̀n dvcì mvkok we dvrá vl lv́m dang taq vto ò we dvsháza shóngnøt nv̀ng zø̀ngwe tiqgǿ gø íe. 2020 nǿngò American móngdàn Election taqgø President Joe Biden sv̀ng Catholic shvngø̀mré rìí mé (Vote) zílv́m dang dvzaqshì bǿì we tiqgø gø íe. We dvgùng shvring gø̀mpaq zí bóy tvyø taq vbáwe dvgá vsv̀ngrì nø Olympian Simone Biles, Covid vgám cì sv̀ng nv̀mlat túshì vløt lv́m kámshì bǿì we cì svramè Sandra Lindsay, vle á:mì nøng taq shì bǿì we bv̀nlì àngké shølshú Richard Trumka, hang vngvt lànglìpè Denzel Washington, American Oxthodox shvngø̀mré ò paqzí zíshú Father Alexander Karloutsos nv̀ng shì bǿì we American móngdàn ò lutdo gvsa (Senator) John McCain maq vbá wegø íe.