Bìm kùlwàng taq bv̀nlì wáshú lv̀ngzv̄ng goò we kàshvbóng

Bìm kùlwàng taq bv̀nlì wáshú lv̀ngzv̄ng goò we kàshvbóng

Shvngbe mvdvm Gvray mongzøl we jejú vdùng taq kèní vpø' íwe pèmè vnvmchvngmaq é, Yà lvban Àngwa Nár (25) lvban
wà lvban svng gòng bø'shà. Cúnshì we Gvray dvbùshang mongkà Mati 20: 1-16 taq  Muqlàng móngdàn nø bìm kùlwàng
taq bv̀nlì wáshú lv̀ngzv̄ng goò we kàshvbóng svng yánglú shìe.

Kàngpè yesu nø we kàshvbóng taq kèní vní dang dvshvt we svng yánglú shìe. Nvmlat kàshvbóng nø a:ngò kà svng cvnshì
we yudá vsvngrì dvpat íe. Vní dang taq nø rvsángcè shvngbe dvpat íe. Tiqnī rvtø taq yā Mati dvbù shvng mòngkà svng rø
vtu we rvsángcè gø' vrvm dvpat gø íe. Vsháng kèní bvnlì svng waò rìnø dvbù shvng mòngkà svng nvmlat táò we yudá
vsvngrì íe. Gvray móngdàn svng gònglvm nvmlat goòrì íe. 

Tvné vyáng rvwè taq gø, vrá dørø̀m nari vshø̀m* rvtø taq bvnlì warì nø yudá vsvng mví we dvgá wángza vsvngrì svng goò
we dang íe. Mvshøl yvnggùng taq vzvng dvtut goìe. Rvtø àng dang dang kèní gvrayò móngdàn taq tuqlvm ego shàíe.
Yudá vsvngrì nø yudá vsvng mví we dvgá wángza vsvngrì kaq Gvrayò móngdàn gònglvm go we svng vgám mvlún shì.
Jøngjøng gvrayò móngdàn kùlwàng taq bvnlì walvm vsvng dvcìpvn vrvm shvngbe svng ego shà we íe. Ang maqí mvzv́n
mvlúnò rat àngmaq nēza weí vbø̄nshìe. Angmaq vbø̄nshìlvm dvle nø dvbùà ràwe íe.

Wemvdvmø yudá vsvng mví we vsvngrì gø zibè tiq gǿí gv̀msùng talvp lúnò rat dvbúà ràe. Pàwálvm dvbú ràèmá wanì
gv̀msùng tiqlvp nø tiqciq lvpat gønshaq svng shvbó:ngò rat íe. We kà shvbóng nø shóngnøt mvdøng kèní gvrayò
móngdàn kùlwàng bvnlì svng walvm lvngdøng taq ègoshà we nøngmaq dvpat gø íe. 

Nvmlat tiq - Gvrayò móngdàn svng gònglvm ègo shà we nø kàngpèò mvréza shóngnøt ní wa íe. 

Nøngmaq shvngbe nø golvm vpø' íwe mví. Nøngmaq taq kèní shaqré tiqmaq nø lvwan dø vtoshì ràwe ínigø màvtoò.
Gvlò nø gvza mavléke tìløp Sacrament svng kámshì we shaqré rìò angcø' angcèrì svng kùlwàng taq bvnlì walvm ègo
wenø ni vrvm angshvr íwe svng dvdvm ràe. Nøngmaq nø bvnlì walvm shvngò shàì nìgø kàngpè í, bvnlì walvm rvtø
gvza màmøráì we svng dvshvt we íe. 

Vní - Gvray nø zìbè zílvm dang taq  gvza nøt gv̄m we íe.

Kàngpè nø nøngmaq svng gømpaq zílvm nø lvpat bélvm høq cālvm mví. Nøngmaq bvnlì wàì vrvm taq gømpaq èzíshàe.
Kàngpè í, zìwe gømpaq nø gvza vpø'we íe. Wervt gvrayò bvnlì taq dvzaq lúnshì we nø gvrayí nøngmaq svng zì we
gømpaq gvba tiqlùng íe. 

Lvngdøng dørøm rvtø wawe nø nøngmaq shvngbe shì we rvtø taq gvmsòng talvp zibè gømpaq èsunā daqìe. Welùng
nø tiqciq lvpat gønshaq íe. 

Gvrayò bvnlì svng shvdiq døngdø dvzaq shìwe dvzvr Polo, 

 Kadø íe wani ngà cúnshø̀ng lòng nø Kristu dvpvt í nø, shø̀ng lòng nø mvzv́n lúnlv́m dvpvt íe. Wemvdv̀mø, namaq
vjàng laqyà nø Kristu Ang Dvbùshv̀ngkà cv́n shùshv́ng dø èwáshìnøng. Yalòng nø ngà dø̄ng rāng nø namaq svng
tìna:tnì dvgvpínìgø,namaq nvng vsa:rì dvgvp ínìgø, Dvbùshv̀ngkà kv́mnøt tvrà dvpvt namaq nø Pvlàcè tiq lòng taq
rip shèngv́ngshìnøng nø, tiqnøt tiq mvyùng dèzaqshinøng we, namaq laqyà shvlá dang ngàí tá lúnlv́m dvpvt íe.
(Filipi 1: 21, 27)

Dvzvr Polo nø nøngmaq shvngbe svng gvrayò móngdàn taq kadø vllvm nvng gvrayò bvnlì svng kadøku dvzaq shìlvm
wawe nø døngmvn dø vl dvtvn we dang íe. Nøngmaq lvpat taq gvrayí zìwe bvnlì svng cøpnøt nvng kàngpè jèjú svng
oqà wa nøtní shvdiq døng weí vzvng dvtut bvnlì vrvm taq dvzaq shìlvm dvtú dvshvt we íe.