Cáng dvrū vsvng dvbā:nò we

Cáng dvrū vsvng dvbā:nò we

 Wemèpvng angmaq nø, tìnúng kupa Gerasen rvgaq svng tuq ráì. a

 Kùngshí kèní Yesu léshì daqì weó, mvmv́ng cáng zv́ngshì we vsvng tiq gǿ nø lóngdùng dvgv̀m dang kèní dì ráì nø, Yesu svng vhǿma:tnà.

 Ang v́lrà nø lóngdùng dvgv̀m dang í nø, shv̀m mvngbǿ:ngí ang svng kagǿí gø dóng mvdá:ngò.

 Ang svng nø kùng nvng shv̀m mvngbǿ:ngí mvme kvt dù:ngò nìgø, mvngbǿng rì peq ra:tnò nø, kùng gø ja:pmòe. Ang svng dóng dá:ngò vsvng kagǿ gø màvl.

 Ang nø vyáng yaqdø̀ng kadvgvp gø, mvrè yv̀ng nvng dvgv̀m rvgaq taq vwúshi nø vkiq sórí, lóngra:tní angwā tutshìe.

 Vrúm kèní Yesu svng a:ngí yv̀ng bǿà kvt kvlv̀ng ráì nø, pvnciq tūshì sórí Ang svng noqò nø,

 shaqmèí vkiq sórí, “Vháng vtv̄ng Gvray Angcè pè Yesué, Nà nø ngà nvng pà singlv́m v̄le ma? Ngà svng màdvkilv́m Gvray bø̀ng taqkèní dègv́mshì wvng nø røtshø̀nge,” a:lòe. b

 Ang wedø røtshì we nø Yesuí, “Mvmv́ng cáng nà, yapè kèní èlúshi,” wa nø v̄l bǿà rvt íe.

 Yesuí ang svng, “Nà bø̀ng pà íe?” wa rø:tnò ke, wepèí rá, “Ngà bø̀ng nø Loksok ǿnge. Kadø íe wani nøngmaq nø mvme íshàe,” a:lòe.

 Vrá, angmaq svng wemóng kèní màshvlolv́m rvt Yesu svng kórshie.

 Wedvgvp mvrè yv̀ngø Waq tiqré rvnúlv̄m we,

 cángrì Yesu svng kórshì nø, “Waqré taq góng dèzv́rsha,” wae.

 Yesuí dvzv́r bǿà kvt, mvmv́ng cángrì wela:ngí lúshiá:mì nø, waqrì taq zv́ngshìá:mì. Waqré nø tvné vní kíng dv́ngte í we, tìnúng svng dv̀ngdár dangdang shvrøtshìá:mì kvt, tìnúng vdòngø tìí shø:pmò nø shiá:mì.

 Waq roq rì caqvmvng vtná:mì nø, mvrìng taq gø, gùrhøm vtv́r rvgaq gø dvshvng bǿà. Wekvt kadødø í dá:rì we svng yv̀nglv́m rvt, vsvng shvngbe dì ráì.

 Yesu yv́ng angmaq tuq ráì kvt, cáng loksok dvchøp we wepè nø, bèlaq gwashi nø mvnv̀n nøt dø vrǿng làshv̀ng rung we svng angmaqí yv̀ng bǿà kvt, angmaq svre lú:ngì.

 Vzv̀ng cá:ngí dvrūkéò pè nvng waqrì kadødø íá:mì we svng yv̀ng bǿà rìí rá angmaq svng kadødø bø̀ná:mì tvrà shvngbe dvtáòe.

 Wekvt wervgaq v̄l rìí angmaq rvgaq kèní lúshìlv́m rvt Yesu svng rø:tnòe.

 Kùngshí vdòng svng Yesu zv́ngshìá:mì dvgvp, to cá:ngí dvrū kéò pè nø, ang gø zv̀nvtnøng, wa Yesu svng røtshìe.

 Iwe Yesu mvtá nø ang svng, “Nvrì nvrvp rì yv́ng svng èlo nø, Nvkàng pèí nà dvpvt kadvngshì ring dø èwáa bǿì rì nvng, nà svng kadv́ngte mèré we tvrà angmaq svng dèshvngá:mò,” a:lòe.

20 Wekvt wepè dìá:mì nø, Yesuí ang dvpvt kadvngshì ring dø wáa bǿà rì, Dekapoli rvgaq dvsha:ngò nìnø, vsvng shvngbe dádv̀ng wae.