Chø̀myoré tiqcé mè kàshvbóng

12 Nov 23 Nár (32)

Yalvban rø v-du we Gvray móngkàciqri
(1) Kàshvgøp 6;12-16
(2)1 Timoti 4;13-18
(3) Mati 25:1-13 

Hkristu vdòng taq vpø' íwe pèmè vnvmchvngmaq, Yalvban nø tiqnøng vdòng àngwa Nár (34) nár vl yv'ngkèní (32) lvban wà lvban svng gòng bø'shà we íe.

Vpø' íwe vnvmchvngmaq, Catholic shvngømré meò, zida Calendar ku, vrá (21) ni vlévm mèpvng nø 2023 nøngò Noqngøm rvtø lvngdøm béá:mì we íe. Wervt vpø íwe pèmè vnvmchvngmaq, Pvlàcè Kvmnønt tvrà dvpvt  tiqnøng vdòng dvzaq dvgvngshàì we taq 
mvjòrlvm pvnrì mvmè vhø'm vdù na íe. Vkvtdø mvjòrlvm pvnrì mvmè vdòng kèní dvzaqshì vdù we íni gø nøngmaq taqø pàgø màlíng wàì nø nønt cvmlvmrì búng sháshìe,  vl gø vl vdù we íe. Íni gø nøngmaq taqø pàgø wádvngò pè Gvray gvsang vl rvt, vdá irvt Nønt cv'mlvm ra mà-vl.

Pàwàlvm wàni nøngmaq gø'vrv'm dvzaq dvgvngshàì nø wàì we, dvnúng íwe shvla we bvnlìrì shvngbe svng Gvrayí nø yv'nglúnò e, walòng svng dvdvm nø Pvlàcè Kvmnønt tvrà taq mà-nøn dø dvtut dvzaq dvgvngshì nø nònggùn kūnga lùshì laqlúni.

Dèniò Gvray dvbùshang mongkà taq, kūngashaqrì, síngràl nyan vzàm rì mvnønshìlvm dvpvt Gvray gvsang ínø nònggùn kūnga vzàm rì zì we íe. Yalvban rø v-du we Mati 25:1-13 ciq vdòng yv'ngø chømyoré (10) me ínø lvngàshvr pè svng yaqdø'ng mvlunghøqshaq àngmaq svmigwì dvzitshì nø shosho wace cāò e wàe. Íni gø vkvtdø cāò taqsórí àngmaq svmigwì yøtì rì bēa lú:ngà we mvdvm vzíngkéòmaq nø vzíng sórí cā mvzvnò nø udø udø yøpyø dvzí nø yøpá:mì. Àngmaq yv'ngkèní síngràl nyan vl we chømyoré (5) me mvng nø angmaq nvng tiqdø chúng taq yøtì lvngshìe.

Àngmaq Shvngbeí mà-dvdvmò rvtø taqø lvngàshvr pè nø tuqlúngì nø, svmigwì dvpvt yøtì luqdø langshì we, dvgø'shì we síngràl nyan vl we chømyoré (5) mè íwā lvngàshvr pè tuqlúngì dvgvp shosho wace dvbù sórí vto lúnò we mvdvm, lvngàshvr pè nvng tiqdø Zvmi shvzøngkung kaq svng góng lún yangà we dang yv'nglún shìe. Síngràl nønt mà-vl we chømyoré (5) me ínø lvngàshvr pè nvng tiqdø gònglvm dvgvngshì we íni gø àngmaq taqø yøtì béàò rvt wè shvrà yv'ngø nøngmaq ngvmshì bø'ì.

Vpø' íwe pèmè vnvmchvngmaq, Jø'ngjø'ng Gvray gvsang ínø nøngmaq rvzvngcerì gø'vrvm kaq svng Gvray àng móngdàn gónglúnlvm dvpvt vmìng vkang talen rì zì we mvdvm, nøngmaq gø' vrvmò lvpat yv'ng svng gø vkvtdø dì ra nø Kà rvtlvm vlē, walòng svng gø dvdvm dvzvrè.

Íni gø yadø íwe vmìng vkang ri kadø íwe rvtø taq kadø ku kadang kèní tuq ra we tvlu zun màshvla rvt àngdeò ni vrvm Cúnshàì we lvpat nvng Pvlàcè lvpat dvpvt tvlu shvlá vtv'ng ídø nònggùn kūnga vzàm taqkèní dvcøp dvgø'shì nø dvzaqshì laqlúni. Gvray kaq Vlømshì e walòng nø shvlá vtv'ng íe , walòng svng dvdvm nø Gvray gvsang yv'ngkèní tiqdvtvng Kvmnønt Pvlàcè nònggùn kūnga lùshì laqlúni.. wvng dvshat nø nònggùn zí mvyøngè.