Coqcv́n 70 gǿ svng dvzá:rò we

Coqcv́n 70 gǿ svng dvzá:rò we

 Yadv́ng pv̀n mèpvng, Vkàngpèí dvgá dø shvngøtcé gǿ rvcà:ngò nø, Ang vdè dìlv́m wa we mvrìng vrv̀m, rvgaq vrv̀m svng Ang vzv̀ngzv̀ng angmaq svng vní gǿ vní gǿ dí dvzá:ròe.  A:ngí angmaq svng yadø a:lòe, “Dvkø̄m rà we mvzí nø jø̀ngjǿng luq we, dvkømshúrì mv̀ng nø mvluq. We rvtnø, Angkàng pèí mvzí dvkø̄mlv́m vsvng ladvzá:rò dø, mvzí Angkàng pè svng èrøtnø̀ng.  Edìv́mnøng; vyitré dvhø̀ svng vyv̀ng cèrì dvzá:rò padø Ngàí namaq svng dvzá:rìe.

 Namaq nø gv̀msùng yǿngkoq gø, dv̀nggúng gø, chøpdø̀n gø mèlv́ngnøngni; tvrà rāmø kagǿ svng gø̄ pàmvrà mèwà nøngni.  Namaq kachø̀m svng góng nàduv́mnøng nìgø, ègòngv́mnø̀ng chàng, ‘Yachø̀m taq mòngzø̀l lòng laq tuq daq,’ wa nø dègǿngānøng. Wechø̀m taq mòngzø̀l lòng lún vpǿ we vsvng vl nìnø, namaqí shèmána bǿshà mòngzø̀l lòng nø wechø̀m mvdv̀m tuq daqe; màvl nìnø namaq svng vwv́ng rae. Wechø̀m taq èv̀lnøng nø, angmaqí kapv̀n èzívtnøng nìnø wepv̀n èv́m èaqnøng. Pàwálv́m wani bv̀nlì wa vsvng nø zìbè lún vpǿe. Kūchø̀m wáchø̀m svng mènàcílshìnø̀ngnī. 

Ka mvrìng taq ègòngv́mnø̀ng nìgø angmaqí natōnøng nø kapà èzívtnøng nìgø wepà èv́mnøng. Weyv́ngø zarì v̄l dv́ngte svng dèbānānøng nø, ‘Gvray móngdàn nø namaq yv́ng tvp níshì ráì,’ èv̄lnøng. Kamvrìng taq namaq svng mènàtōvtnøng nìnø nvmdø̄ng tvrà svng èbúngnøng sórí yadø èv̀lnøng: ‘Nøngmaq hí taq vyin we namaq mvrìng dvtø̀l gø namaq svng vtù we shvkse wáshìlv́m rvt namaq mv́rdv̀ngø vchaqshì ráìe. Iwe Gvray móngdàn nø tvp níshì ráì we svng namaqí jø̀ngjǿng shá ràe,’ èv̄lnøng.  Ngàí v̄la:tnìni, angnī weni taq we mvrìng taq bø̀n daq lòng nø, Sodom mvrìng mvhøt yà:ngì lòng mvdv̀m vlishi longe.”We shvngøtcé pè nø, shaqshaq wa vtv́ng ráì nø, “Vkàngpèá, Nà bø̀ng kèní nø cángrìí gø nøngmaq vmíng svng cà:nòe,” a:lòe.

 A:ngí angmaq svng a:lò we nø, “Satan nø muqcøn còngmè lap dø muqlàng kèní vjáá:mì we svng Ngàí yv̀ng bǿngà.  Etánø̀ng, vbø̀ nvng muqhèrì svng lv̄mlv́m gø, ngv̀nshà pè jórnònggùn shvngbe svng dv́ngkelv́m dvpvt gø, vmíng vkv́ng Ngàí namaq svng vzíshaq íe. Namaq svng nø kapaí gø dvlá mèlún lóngnø̀ng.  Iwe cángrì nø namaq vmíng lv̀ngpvng cv̀n rvtnø mèdebùnøngni. Namaq bø̀ngrì muqlàng taqlapmø vrūshaq íá:mì rvtnø mv̀ng dèbùnøng,” a:lòe.