Døngmvn dø vjúvmyat zílún shìwe

Døngmvn dø vjúvmyat zílún shìwe Mati 10: 37-42, July 2-2023,

Shvngbe svng pàmvra yalvbán nø damvn lvbán (13) lvbán wawe lvbán ni taq tuqráì we íe. 

Vpø'we pèmè vnvm vchvng maq dèni røvdu we Gvray mòngka tiq tut 2koqkvm 4:8-37 taq 
Elishaí Shunem mè angcè pè dvzūnāò we svng yvnglún shìe. Elisha nø kàngpè Yesu Kristu shini mvtuq vzvng lvp (850) nøng rvtø taq kà dvtutshú tiq pè íe. Ang nø Esharael dvcìrì kaq Gvrayò mòngkà svng kà dvtutlvm dvpvt Eliaí angò døngjá svng dvle yv:ngà we íe. Elia mvdvm dālvm dø íwe lvmyit kumla rìsvng dvtvn yv:ngà we gø íe.

Shunem mènø Gvray Ang shànshér vsvng íwe døm bøà kvt ngàníí mvdv̀m dvtv̀ng yv́ng yøpkok tiq lòng wáāshò. We mèò mvréza sháò nønt rvt tiqnī taq kømzup we shvmán jèjú vtoshì lúnlvm ídaqe wanø angí màdvdvm ò. Wedø ínigø a:ngí gvza lún mvyø'we cvmré tiqgø' svng gø lún bø'à. Angcèpè nø gvlvng daq chvng vnán góng vzøm zanø shìámi, we dvgvp Elisha í, dvcùn bø'à we íe. Wedø írvt angmè dvpat tiqyá dvtvng mvdvm nønt byò dvbù bø'ì. We mvdvm angnø Gvray nvng té tvpni shìlún bø'à we íe. Yarì shvngbe nø Gvray angò Shvnshér we vsvng rìkaq vtōò dvzømò nø lúnò we vjú jèjúrì íe.

Wurlaq bvnlì wari nø angmaq kám vrvm weí vjú vmyat vlwe bvnlì taqwa angmaqò gvmsøng svng yín ní myutnvn sháòe.
 Deni røvdu we Gvray mòngka Mati 10: 37-42 taq kàngpè Yesuí nø nøngmaqò Shvnshér Pvlàcè dang vhánglvm tvrà mvdøng nø vdè nvng tvpníshì we vsvngrì kaq shóngshì rawe dang svng dvtú shaq íe. 
Tiqdv́ng vsvng kaq shóngshì nø vtoshì dvzømò we dang nø vjú vmyat gvza lúnshì we tiq dang íe. Vdè nvng tvpníshì we vsvng rìkaq vtōò dvzøm shìwe dang nø cv'm vtvng we bvnlì íe, wanø dvdvm mvdaq. Ngàí v̄la:tnìni, Ngàò coqcv́ncè yarì taqkèní cv́m vtv̄ng gǿ svng tìgwit tiq gwìncè wa shvaqò gǿ gø ang zìbè màmv́ngaò,” (Mati 10:42) taq wae. Tìgwit tiq gwincè nø màvpø' we ínigø Gvrayò angbøng taq kèní zíshì we íninø gvza vpø'we í, Muqlàng móngdàn vdúng nøngmaqò bøng nø gvlvng daq tuqāme. Kàngpè Yesu Kristu ínø nøngmaqò Pvlàcè dang vháng nø mvgàm lvm dvpvt vdè nvng tvpníshì dvzvr weí gønshaq tvrà dang svng dvgø'à we íe.

Ngànsha kaqsvng cvnwe íninø gønshaq sómlvm wa íe. Kàngpè Yesu Kristu svng vlø'mshì nø cvnì, kàngpè nø nvmlvt nøngmaq dvpat vsvk dvle shì bø'ì we íe. We dang nvng singnø dvzvr peterí shøn wenø- Vrø̀l vcat sháò we vpø̀, gv̀msùng vshéí èchvng bǿshà wenø mví. Cip màvl, shìllv́m gø màvl we Vyv̀ngcè shvwi, Kristu Ang vpǿ we shvwií nī èchv́ng bǿshà we svng èshánønge. (1 peter 1:18-19)

Jól lúnlvm dvpat vsø'm zírae.
Mònggvn taq vpø' vtvng nø kapvn íe, wanø erøt daq nøngke nøngmaqí nø yādø vtvnglvm wa íe. Tiq, nøngmaqò gønshaq, Vní, nøngmaqò chøm døngkū, wedá:ngí Vshøm taq vpø̀, nvng gv̀msùng rìgø vchvk mvdøng íe.

Ngà svng èshòng mvdv̀mø angpè angmè svng té shóngshì gǿ nø Ngàò í màpǿ. Ngà svng èshòng mvdv̀mø angcè lvngà shvdv̀ng, zvmì shvdv̀ng svng té shóngshì gǿ gø Ngàò í màpǿ.  Vdè wurgang baqshi sórí Ngà mèpvng mvcv̀n gǿ gø, Ngàò í màpǿ. Vdè gø̀nshaq svng mvpáshi gǿ nø, ang gø̀nshaq vmvngv̄me. Ngà dvpvt rvtnø ang gø̀nshaq sǿmv̄m gǿí mv̀ng nø, gø̀nshaq lá lúnlv́m íe. 
 Namaq svng nàtōnøng gǿ a:ngí nø, Ngà svng nàtòng we íe. Ngà svng nàtòng gǿ a:ngí nø, Ngà kaq dèzv́r dakngà pè Ang svng vtōò we íe.  Kàdvtutshú gǿ svng vtōò gǿ a:ngí nø, kàdvtutshúí lú:nò we zìbè lún lú:ngòe. Døngman vsvng kaq vtōò gǿ a:ngí gø, døngman vsa:ngí lú:nò we zìbè lún lú:ngòe.  Ngàí v̄la:tnìni, Ngàò coqcv́ncè yarì taqkèní cv́m vtv̄ng gǿ svng tìgwit tiq gwìncè wa shvaqò gǿ gø ang zìbè màmv́ngaò,” wae

Nøngmaq cúnshì we, chøm døngkū, vpø nvng gvmsøng yarì nø nøngmaq dvpat Gvray yvng kèní lúnshì we gømpaq rìwa íe. Gvrayò móngdàn tuqlvm dvpat yarì svng gol vduni nø gòl rae. Wervtnø tiqnī taq Gvrayò ang Shvnshér we vsvng wáshaì nø ang yá dvtvng mvdvm angkíng, ang mùn loqtvm we shvmán jèjú rì vtoshì lúnlvm dvpat Gvray bvnli taq dvzaq dvkáng shìlvm waì Wang dvtit dvle we kà svng yayvng nvlòe, shvngbe kaqsvng oqà.