Dvrá dvgø:mò we

Dvrá dvgø:mò we

 Ngà nø Dvrá nvng kàdvtutshú kàrurì svng catlv́m rvt dì daqì mèlv́nshàni. Ngà nø catlv́m dø̀ng dakngà we mø̀í; werì dvgø̄mlv́m rvt mv̀ng dø̀ng dakngà.  Ngàí namaq svng kàdøng v̄la:tnìni. Muqlàng rvgaq vlēvm nø dvrá lòng taq v̄l rì shvngbe køtgø̄m dvhø̄m daqò høqshaq, Dvrá lòng taqò kàru angteq tiq chv̀ngcè gø, angmvkwiq tiq lòngcè gø, màmv̄ngvm.  Wedø í rvtnø, dvkv́mkà yarì taqkèní cv́m vtv̄ng we tiq ciqcè svng mvcà:nò nø,* dvgá vsvng kaq gø welòng døni shvngø:tnò we kagǿ ínìgø, muqlàng móngdàn taq cv́m vtv̄ng gǿ tǿlv́m í longe. Iwe, dvkv́mkà yarì cv́n dvdø̄:ngò nø, dvgá vsvng kaq gø welòng døni shvngø:tnò we kagǿ ínìgø, wegǿ mv̀ng nø muqlàng móngdàn taq ring we tǿlv́m í longe.  Ngàí namaq svng v̄la:tnìni, namaq nø dvrá svrarì nvng Farisirì angmaq døngman lòng mvdv̀m mvzv́n mèdøngmannøng kvt kèní nø, kadø ínìgø namaqí muqlàng móngdàn góng mèlúnnøng.

Shv̀mná rí mvdaq we

 Cārvmàng vsvngrì kaq nø, ‘Vsvng shvt mvdaq; vsvng shvt we kagǿ ínìgø dvrá dvra we vhǿm vdū longe,’ v̄l yà:ngà kà namaqí vtáshaq íe.  Iwe, Ngàí namaq svng v̄la:tnìni; kagǿ ínìgø angnv̄m angchvng tiq gǿ svng mvtú màdá shv̀mná rí gǿ nø dvrá dvrā we vhǿm vdū longe. Kagǿ ínìgø angnv̄m angchvng kaq yv́ng mvtv̀má:mò nø, nà nø angdé èíe, wa shø̀n vsvng nø shaqré lìpòngmè taq dvrá dvra we vhǿm vdū longe. Kagǿ ínìgø angnv̄m angchvng svng dvrøq nø, ‘Angdál nà!’ wa shø̀n gǿ nø zùpvng svmi móng kèní mvlutshì long.  Wedø í rvtnø shvrúngrà yv́ng svng nàò shvrúng gønpaq nàí èlv́nga:tnò ke, nvnvm nvchvng tiq gǿgǿí nà svng shvràlv́m la v̄l we èdǿmshi lōng nìnø; nàò shvrúng gønpaq lòng nø shvrúngrà shvnvngø èlà:ngò dá:ngí, èdīvm nø nvnvm gǿ nvng shini shèrv́mshìv̄m. Wedá:ngí wā nàò shvrúng gønpaq lòng nø shèrú:ngò. Nà nvng nàkokéshì we vsvng nvng shini tvrà rāmø èdìshi dvgvp, cancan ang nvng shèrv́mshi; mø̀íni nà svng èko pèí dvrá vjì wūr taq tèlē bø nø, dvrá vjìpèí rá ang cìlcè svng tèlē bø nìnø, nà svng tūng taq èróng bø̄e.  Ngàí namaq svng jø̀ngjǿng v̄la:tnìni, bèshàn tiq gø̀mcè gø màmvzāshi høq mèwaqnø̀ng dv́ngte weyv́ng kèní mèlutshinø̀ng.