Dvrá dvgø:mò we

Dvrá dvgø:mò we, Mati 5:20-26

Ngàí namaq svng v̄la:tnìni, namaq nø dvrá svrarì nvng Farisirì angmaq døngman lòng mvdv̀m mvzv́n mèdøngmannøng kvt kèní nø, kadø ínìgø namaqí muqlàng móngdàn góng mèlúnnøng.Shv̀mná rí mvdaq we21 Cārvmàng vsvngrì kaq nø, ‘Vsvng shvt mvdaq; vsvng shvt we kagǿ ínìgø dvrá dvra we vhǿm vdū longe,’ v̄l yà:ngà kà namaqí vtáshaq íe. r 22 Iwe, Ngàí namaq svng v̄la:tnìni; kagǿ ínìgø angnv̄m angchvng tiq gǿ svng mvtú màdá shv̀mná rí gǿ nø dvrá dvrā we vhǿm vdū longe. Kagǿ ínìgø angnv̄m angchvng kaq yv́ng mvtv̀má:mò nø, nà nø angdé èíe, wa shø̀n vsvng nø shaqré lìpòngmè taq dvrá dvra we vhǿm vdū longe. Kagǿ ínìgø angnv̄m angchvng svng dvrøq nø, ‘Angdál nà!’ wa shø̀n gǿ nø zùpvng svmi móng kèní mvlutshì long. s

Wedø í rvtnø shvrúngrà yv́ng svng nàò shvrúng gønpaq nàí èlv́nga:tnò ke, nvnvm nvchvng tiq gǿgǿí nà svng shvràlv́m la v̄l we èdǿmshi lōng nìnø; t 24 nàò shvrúng gønpaq lòng nø shvrúngrà shvnvngø èlà:ngò dá:ngí, èdīvm nø nvnvm gǿ nvng shini shèrv́mshìv̄m. Wedá:ngí wā nàò shvrúng gønpaq lòng nø shèrú:ngò. 25 Nà nvng nàkokéshì we vsvng nvng shini tvrà rāmø èdìshi dvgvp, cancan ang nvng shèrv́mshi; mø̀íni nà svng èko pèí dvrá vjì wūr taq tèlē bø nø, dvrá vjìpèí rá ang cìlcè svng tèlē bø nìnø, nà svng tūng taq èróng bø̄e. u 26 Ngàí namaq svng jø̀ngjǿng v̄la:tnìni, bèshàn tiq gø̀mcè gø màmvzāshi høq mèwaqnø̀ng dv́ngte weyv́ng kèní mèlutshinø̀ng.wàe.

Vpø íwe pèmè vnvmchvngmaq tá lúnì we Gvray gvsang Mongkà taq àngdeò shvrúng gønpaq lòng mvdvmø  àngde nvng nàkoké we vsvng nvng vzàng can can shvrvm shvráshì lvm nvng mongzøl lòng dvtán lúnlvm dvpvt Gvray gvsang nø (1)taq shvrúngè walòng svng yv'nglún shìe, dvkvme.  (2) Shvrvm shvráshì lvm lòng nø nøngmaq rvzvngcerì taq nvmlat zø'ngkomuq tiqlòng gø íe. Wèlòng zø'ngkomuq mèpvng taqø té vtv'ng we ìshøt igvn vtoshì lúnlvm vlē walòng svng Dvrá Mongkà kèní yv'nglún shìe.

Wervt tiqdvr vsvng nvng Nønt vyvng kélvm angpvnpvn bung ra dvgvp tiqdvshaqí vshò nøntni shvrvm shvráshì nø Mvra vroqshì lúnlvm rvt ègo íè. Shèdømì e. Vshò we nøntni zíshìe, wàwe taq (2) pvn vlē.(1) shvla we bvnlì svng wáshìe wàwe taq  ( kashvbóng) dvshà mvhøt vhø'mō we Vsvng kaq vm-aq mvzv'ng tùbùm dvbàng shì lòng íe. (2) shvla lòng mvdvmø shvlá vtv'ng lòng svng zíshì we, àngde kaq vtù vre rì mvdvmø shóngnønt dvtan nø welvng íni àngmaq Mvrarì svng Chutnà lòng íe. Wervt vpø íwe pèmè vnvmchvngmaq Gvray gvsangí dvshá zā we , Mvra vroqā we jèjúrì svng vtoshì lúnlvm dvpvt tiqdvng Vsvng rì mvdvmø Shvrvm shvráshìe, wàwe talence taqkèní cvndvgøm nø tvle shì laqlúnì wvng dvshat nø vra shì mvyøngè. Shvngbeí Gvray mongzøl lòng vtoshì laqlúnøng. Shvngbe svng oqā.