Dvrá svra tiq pèí Yesu vlø:tnò we

Dvrá svra tiq pèí Yesu vlø:tnò we

25 Tiq kvt nø, dvrá vjì tiq pè Yesu svng vløtlv́m zv̄ng rip lú:ngì nø, “Svra pèá, dvciq lvpat gø̀nshaq lúnlv́m rvt ngà kadø wáshì ràng ma?” a:lòe q26 Yesuí ang svng, “Dvrá kàru taq kadø vrū yà:ngà ma? Nàí kadø rø̄ èlú:nòe ma?” a:lòe.27 Wepèí vtà:ngò nø, “‘Nà nø nà tiq nøt shvngbeí gø, nà dòngnøt shvngbeí gø, nà nònggùn kùngà shvngbeí gø, nà shánøt shvngbeí gø, Vkàngpè nà Gvray kaq shóngshì ràe.’ Vrá, ‘Nà vdè góng svng èshóngshi dø, nà tiqdv́ng vsvng kaq shóngshì ràe,’ wa vrūe,” a:lòe. s28 Yesuí ang svng, “Nà natv́nshi kà vdūe; nà yadøni èwáshì kvtnø gø̀nshaq cúnshi èlún lú:ngòe,” a:lòe. t29 Iwe dvrá vjì wepè nø, ang nø døngman pè í we dvtanshi mvyǿ rvtnø Yesu svng, “Wedø í nìnø, ngà tiqdv́ng vsvng nø kagǿ íe ma?” wa rø:tnòe.Samari vsvng kàshvbóng30 Yesuí vtà:ngò nø, “Vsvng tiq gǿ nø Yerusalem wamà kèní Yeriko mvrìng svng shúngshì daqì ke, tø̄lv́m vsvng tiq mvdò vhǿm bǿà. Werìí ang vdá dv́ngte tø̄lá:mò nø tvnéné shì høq vdipmò dá:ngí la:ngò nø lōá:mi.31 Wekvt shvrúngshú tiq pè nø wetvrà shúngshì vdu daqì nìnø, ang svng yv̀ng bǿà kvt tiq tōngtōng ngwēò nø lø̀m vlēá:mì.32 Vrá Lewi vsvng tiq gǿ gø we zàng tuq ráì nø wepè svng yv̀ng bǿà nìnø, ang gø tiq tōngtōng ngwēò nø loá:mì.

33 Iwe tvrà di we Samari vsvng tiq gǿ gø weyv́ng tuq ráì. Ang svng yv̀ng bǿà kvt a:ngí mvré lú:ngà.34 Ang yv́ng tvp di nø ang dvmmá rì taq zanlún yøtì nvng bìmtì vdø̄:rò dá:ngí døpmāòe. Vrá, wepè svng ang lozè go taq shvrú:ngò nø, zaqlè chø̀m tiq chø̀m svng shøl bǿà nø ang svng dvzø̄:mòe.

35 Mèpvng ni taq ang búng dvgvp, ang gv̀msùng vnílvp shà:lò nø, chø̀m angkàng pè svng zíò sórí yadø a:lòe ‘Yapè svng nàcún dáò, yamvdv̀mø nàò kadv́ngte èbéāvm nìgø, ngà vtv́ng rāng dvgvp nà svng ngàí tvlelv́m íe,’ vl ráà.36 Nàí dèda:mò, we vshø̀m gǿ kèní tø̄lv́m rìí dvlá bǿà we vsvng yapè ang tiqdv́ng vsvng nø kagǿ íe ma?” a:lòe.37 Dvá vjì pèí, “Ang svng dvsházāò pè mv̀ng íe,” a:lòe. Wekvt Yesuí ang svng, “Nàí gø welòng dø tiqdvchá èwàá:mò,” a:lòe.