Dvrá svrarìí Yesu vlø:tnò we

Dvrá svrarìí Yesu vlø:tnò we ( Marko 12:28-34 )

Vpø íwe pèmè vnvmchvngmaq, dèni Pvlàcè nònggùn lùshì lvm Gvray dvbùshang mongkà nø Marko (12:28-34 ciq vdòng) taqkèní íe .Dvrá svrarìí Yesu vlø:tnò we ; Vpø íwe pèmè vnvmchvngmaq, Pvn vrvm taq vjú vra ìshøt igvn vwá:ngà we vlē. Nà í ewàò we bvnlì tiqlòng lòng yv'ngkèní Na mvdvmø vjú vra zílún we íe. Wervt dvshá zā lún we vnē, mvré zā sha we vnēí yv'ng elúnò nìnø rvgaqtøm taqø "Nà " wàwe tiqgø'dø wā vl vdùe.

" Tiqdvng Vsvng wànø, " ewàò we bvnlì, dvdvm gvsvt we shvngbe nø "nà" mvdvmø ìshøt igvn rì vwvngà lvm vlē. Tiqdvng Vsvng kaq Nønt zā dø ewàò nìnø nà àngde tiqgóng Nønt zā lvm vlē. Tiqdvng Vsvng kaq shóngshì lòng nø àngde tiqgóng svng shóngshì lòng íe. Tiqdvng Vsvng kaq mèwá:mshì mèshóngshì lòng nø àngde tiqgóng svng mèshóngshì lòng nvng vbóngè. Tiqdvng Vsvng kaq zíshì lòng nø Nàí ìshøt igvn vtoshì elúnò lòng íe. Tiqdvng Vsvng yv'ngkèní Nàí mvdìng mvmàn dø mvdøng mvdaq ètø'lá:mō nø èrøtshì lòng nø nà dvpvt krvtcø'm gvba tiqlòng íe. Wervt Vkangpè Yesu Hkristu ínø àngde nvng nítvp gø' " Tiqdvng Vsvng" kaq shóngshì lvm rvt ( Marko 12:31 ) vdòng taq gø vkvtdø dvkvme. 

28 Angmaq wedø tasv̀ng vzø̀ng lā:ngí dvrá svra tiq pè dì ráì nø, Yesuí werì svng vdu vbóng dø tv̀ng bǿà we svng yv̀ng bǿà kvt a:ngí Yesu svng, “Gvray dvkv́mkà shvngbe kèní ring vtv̄ng ciq nø kāciq íe ma?” wa rø:tnòe. lm 29 Yesuí vtá:nò nø, “‘Israel dvcì cèrìé, ètá dánøng! Vkàngpè nøngmaq Gvray nø, Ang tiq gǿ wa í pè Gvray íe. Dvkv́mkà rì shvngbe taqkèní nv̀mlat tiq í we ciq nø yaciq íe; n 30 Nà tiqnøt shvngbeí gø, nà dòngnøt shvngbeí gø, nà shánøt shvngbeí gø, nà nònggùn shvngbeí gø, Vkàngpè nà Gvray kaq shóngshì ràe,’ wa ciq íe. o 31 Vní ciq wa ciq nø, ‘Nà vdè góng svng èshóngshi dø, nà tiqdv́ng vsvng kaq shóngshì ràe,’ wa ciq íe.

Ya vní ciq mvdv̀m ring we dvkv́mkà nø màvl,” a:lòe. p 32 Wekvt dvrá svra pèí Yesu svng, “Svra pèá, gvzà vdu dø èshø̀n bǿà. Gvray nø tiq pè wa í we nvng; Ang wa mø̀í nìnø dvgá Gvray màvl. q 33 Tiqnøt shvngbeí gø, cíngrál nøt shvngbeí gø, nònggùn shvngbeí gø, Gvray kaq shóngshì rà we nvng vdè góng svng èshóngshi dø, vdè tiqdv́ng vsvng kaq shóngshì rà we nø, góngkøp wá:rò we núnglv́m nvng shvtnúngpà í dv́ngte mvdv̀mø té vpǿe,” a:lòe. r 34 Ang nø cíngrálnøt vl dø kà vtv́ngshì we Yesuí yv̀ng bǿà kvt, ang svng, “Nà nø Gvray móngdàn nvng mènàsar,” a:lòe. Wemèpvng nø, kagǿí gø Yesu svng tiq kà gø røt mvkvm bǿà. wàe.

Vpø íwe pèmè vnvmchvngmaq tálúnì we Gvray Mongkà taq, Dvrá rì Shvngbe taqkèní té vtáng dvkvmkà Dvrá nø,(1) Nà tiqnøt shvngbeí gø, nà dòngnøt shvngbeí gø, nà shánøt shvngbeí gø, nà nònggùn shvngbeí gø, Vkàngpè nà Gvray kaq shóngshì ràe,’ wa ciq ínø, (2) Vní ciq wa ciq nø, ‘Nà vdè góng svng èshóngshi dø, nà tiqdv́ng vsvng kaq svng gø shóngshì ràe,’ wa ciq íe. Ya vní ciq mvdv̀m ring we dvkv́mkà nø màvl,” wànø Vkangpè Yesuí dvrá Svra pè kaq svng shvngøt dvtúò nø vtoshì yangì. Wè dø tiqdvchá nøngmaq gø'vrvmì gø Vkangpè Yesuò lvpkà svng vpø shvring nø cvndvgøm nø mvng shvkse wáshì laqlúni. Shvngbe svng oqā.