Gùchàngré mvgàm tiq pè dì ráì we

Gùchàngré mvgàm tiq pè dì ráì we

 Wekvt rá Ang nø tvrà dìlv́m búng daqì dvgvp, Ang yv́ng svng tiq gǿ kvlv̀ng ráì nø, bvnciq tūshì sórí Ang svng, “Shvla we svra pèá, dvciq lvpat gø̀nshaq

lúnlv́m rvt ngà kapà wá rànge ma?” wa rø:tnòe.  Yesuí ang svng, “Nàí Ngà svng pàwálv́m shvla we èvlà ma? Shvla we nø Gvray Ang tiq gǿ wa mø̀í nìnø

dvgá màvl.

 Vsvng mèshvtni; mèdèchapni; mèkø̄ni; mvdìng we shvkse mèwáshìni; vsvng dvrè mèmapni; nvpè nvmè ní svng nàpǿò, wa we dvkv́mkà rì svng nàí

gø èsháòe,” a:lòe.  Wepèí vtà:ngò nø Yesu svng, “Svra pèá, yadv́ng pv̀n shvngbe nø ngà cv̀mré kèní cv̀nò we íe,” a:lòe.

 Wekvt Yesuí ang svng shóngnø:tní dvjaqò nø, “Nà taq mvgø̄m we tiq pv̀n shini v̄le, Èlovm nø nàò vl dv́ngte ènā:mò dá:ngí mvshámhoq dvshà rì kaq èzíò.

Wekvt muqlàng taqlapmø pø̀yá pø̀nung èv́la dae. Wedá:ngí Ngà mèpvng ècv̀n ra,” a:lòe.  Vsvng wepè nø pø̀ gvzà vdá we tiq pè í rvtnø, Yesuí a:lò kà tá

bǿà kvt, ang mv̀rshv̀m shøt vlíng nø, nøt yùr sórí loá:mì.

 Yesuí gùrhøm svng yà:ngò dá:ngí Ang coqcv́nrì svng, “Pø̀ vdá rì nø Gvray móngdàn svng gònglv́m gvzà rvzaqe,” a:lòe.

Ang kà yakà rvt coqcv́nrì nø rìràá:mì. Wervt Yesuí vrá tiq kvt angmaq svng, “Cv̀mré rìé, gv̀msùng vshé svng nøt vdǿnshi rì nø Gvray móngdàn

svng gònglv́m rvzaqe. 

Mvgàm tiq gǿ Gvray móngdàn svng gònglv́m lòng nø, Golawu tiq go sungmè shvni hwáng taq léshìlv́m lòng mvdv̀mø té rvzaqe,” a:lòe.

 Wekvt Ang coqcv́nrì nø gvzà dàá:mì nø, “Wedø íni gø̀nshaq nø kagǿí lún daqe ma?” wae.

 Yesuí angmaq svng dvjaqò sórí, “Yalòng nø Vsàngí nø mvngutshi. Gvrayí nø ngu:tnòe. Gvrayí nø pà gø wá ngu:tnòe,” a:lòe.