Hí wūr shì vsvng dvbā:nò we mvshøl

 Mati 9;1-8 (30 Jun 2022)

Yà lvban nø, àng wa nár (13) nár lvban Vbī ni svng gòng bø'shà.Dèni pvlàcè nònggùn lushì lvm Gvray Mongkà nø, Mati 9;1-8 ciq vdòng taqkèní íe.

 

Hí wūr shì vsvng dvbā:nò we mvshøl

 

Wekvt Yesu nø kùngshí tiq gø̀m taq zv́ngshì dá:ngí kupa svng léshì nø, Ang vdè mvrìng svng tuq ráì. ab2 Ku, hí wūr vzø̀m shì vsvng tiq gǿ chà taq vyà:lò nø, Yesu yv́ng svng angmaqí baqa:tnà. Angmaq kv́mnøt svng Yesuí yv̀ng bǿà kvt hí wūr shì pè svng, “Ngàcèá, shaqshaq wa èv̄l, nà mvrà chutnāng bǿngà,” a:lòe.3 Weyv́ng dvrá svrarì tiqmaq nø angmaq nøt taq, “Yapè nø shǿn màdu we kà shø̀ne,” wa dvda:mòe. c4 Angmaqí wedø dvda:mò we svng Yesuí sháò rvt, “Namaq nøt taq pàwá mvgv̄m we dèdv̄mnønge? d

 

Nà mvrà chutnāng bǿngà,’ èa:lò kà nvng ‘Ekūngshi nø èdivm,’ èa:lò kà; yakàní kākà té shǿn yùl ma?6 Iwe vsvng Angcè pè Ngà nø rvgaq tø̀mø mvrà chutnālv́m vmíng vkv́ng vl we namaq svng shá dvzv́rlv́m íe a:lò nø, A:ngí hí wūr shì pè svng, ‘Ekungshì; nà pvlū èbaqshi nø nà chø̀m svng èlō,’” a:lòe.7 Wekvt wepè cøt kungshì nø ang chø̀m svng loá:mì.8 Vsvng loksokrìí welòng yv̀ng bǿà kvt dvdv̄m vtiqá:mì nø, vsvng kaq yadv́ngte ring we vmíng vkv́ng zi pè Gvray kaq shvrī:ngòe.

 

Vpø íwe vnvmchvngmaq;Yadang svng dvdvm nø, zā we Vsvng tiqgø' kaq svng èyvng lúngò dvgvp Cì lvjàngà nìnø zø'mè wàì nø ká:mìe.Íwe shóngnønt, vjang laqyà, nònggùn kūngà taqkèní tubūm dvzøm dvbvng we mà-vl, vpnóngshì we mà-vl nìnø zā gø' nø zø'mlvm mà-vl walòng svng yv'nglún shìe.
Jøngjø'ng ni nònggùn kūngà, vjang laqyà shóngnønt vjø'ng, vlømshìwe kvmnøntni Cì rúng, mø-í nìnø Cì svramaq kaq shøl nø lvjángshì kvtnø  zø'm we íe.

 

Wè pàdø; (1) Nøngmaqò Pvlàcè shagóng taqgø tiqkvt kvt Satani dvlit gvcvm we, shvnip shvnar we zā yv'ng dvjang zønlì rì angpvnpvn vhø'm shìe. Vkvt dø vhøm shì ra dvgvp Pàgø wá lúnò pè Gvray kaq nvmlat taq gvl nø vlømshìwe í ká:mlv'm nø gvzà vchvk ngè walòng svng shvdømè. (2) Zā gø'mvdvm kvmnønt, vlømshìwe shóngnønt, vjang laqyà rì taqkèní vpnóngshì nø dvzøm taqsórì røtním dvbvng we vjúrøt kà dang vrvm taq Gvrayí nø zø'àe. Táā è.

 

Wè vdòng taqø Vkangpè Yesu hkristu kaq svng vlømshì nø, àng bøng svng vchang nø Gvray dvgung svng shvring lúnlvm, kvmnønt pvlàcè nònggùn kūngà lùshì nø svkse wáshì lúnlvm, àng móngdàn dvsher lúnlvm shèdø'mìe. Dèká:mì we lvmik kūmlā mvshøl íe. Shvngbeí Gvray yv'ngkèní shiqshan mongzøl we jèjúrì vtōshì laqlúni. 
Shvngbe svng oqā.

Add new comment

11 + 7 =