Mvgàm pè nvng Lazaru

Luka 16;19-31 Mvgàm pè nvng Lazaru

Vpø íwe pèmè vnvmchvngmaq Dèni rø v-du we, dvdvm vjáng nø Pvlàcè nònggùn lùshì lvm Gvray gvsang Mongkà nø Luka 16:19-31 ciq vdòng Mvgàm pè nvng Lazaruò lvpat mvshøl taqkèní íe.

Tiq kvt nø mvgàm tiq pè v̄le. Ang nø shvmoq laqtūn nvng vzī shv́nàng belaq wā gwashi nø, tiq ni nø tiq ni v́m aq nø dòshúcè v̄le. 20 Vrá, góngkøp zøt zøt nø, Lazaru tǿò we røtnv̄m vsvng tiq gǿ nø, mvgàm pè bv́ngkà chit yv́ng shvrú:ngòe. 21 Ang nø mvgàm pè v́mjv̀m kèní vjā we v́mpàshi rì v́m mvyǿe. Vrá vgī rì dì rā weí gø, ang zøt rì lēò høq íe. j 22 Mèpvng røtnv̄m vsvng wegǿ shìá:mì nø, Abraham pøtpúm yv́ng svng muqlàng dvzv́r rìí vbūn bǿà. Vrá, mvgàm pè gø shìá:mì nø kǿm bǿà.

Iwe ang nø zùpvng dangø laqlaqni dvshà mvhøt sórí v̄l ke, ang nē ngángshì nø dvjaq lú:ngì kvt, vrúm vsār yv́ngø Abraham svng gø, ang pøtpúmø Lazaru v̄l we svng gø a:ngí yà:ngòe. 24 Ang vkiq nø, ‘Vkop Abrahamé, ngà svng dvshá èzāngà. Lazaru ang wurhàm mvsúng tì taq zønshì nø ngà pvlè leq dègwitnāng dø dèzv́rāngà. Pàwálv́m wani svmi mvlàm yalòng taq ngà laqlaqni dvshànge,’ a:lòe.

Wekvt Abrahamí vtà:ngò we nø, ‘Vcèá, nà dvpvt ìshøt ìgv̀n rì nø, nà shini ècúnshi lvpat taq èlúnv́m yà:ngà. Lazaruí nø dvshá mvhøtyv̀ng vhǿm yà:ngà we svng dvdv̄m nashat. Iwe akvt ang nø yayv́ngø nøt shvlø̀m we lú:nòe. Nà nø laqlaqni dèshàe. 26 Vrá nøngmaq nvng namaq dvhø̀ taq nø rvnaq we vkungmè tiq long dvhv́nge. Yapā kèní namaq pa svng léshì mvyǿ rì gø léshì mvlú:nò. Namaq pā kèní gø nøngmaq pā svng kagǿ gø léshì màshvla,’ a:lòe.

Mvgàm pèí, ‘Vkopmé, wedø í kvt kèní nø ngà vpè chø̀m svng nàí Lazaru svng dvzv́rālv́m ngà kórshønge. 28 Pàwálv́m wani ngà vnvm pungwà pè shini v̄le. Angmaq dvbv̄ng dvshà mvhøt we yamóng svng mvdìlv́m dvpvt angmaq svng laq dvshatná:mò,’ a:lòe. 29 Abrahamí, ‘Moshi Dvrá lòng gø, kàdvtutshúri kà gø, angmaq yv́ngø v́lāòe. Nvnvm pè la nø werì kà laq tā,’ a:lòe. k

Wepèí, ‘Mø̀íé, vkop Abrahamá; shì yv́ng kèní zūn lōng we tiq gǿ angmaq yv́ng svng vtv́ngvm kvt wa angmaq nøt língshì longe,’ wae. 31 Abrahamí ang svng, ‘Angmaq nø Moshi Dvrá nvng Kàdvtutshúri kà svng dv́ng mvtā nìnø, shì yv́ng kèní zun we tiq gǿ dèzá:rò nìgø, angmaq tā lōng we mø̀í,’” a:lòe.l

Vpø íwe pèmè vnvmchvngmaq tálúnì we Mongkà mvshøl svng dvdvm vjáng we taq, mvra wá vléshì dvzvr we (4) pvn vlē.(1) Vdòng Nønt kèní mà-shvla lòng svng dvdvm mvrøt we, vléshì dvzvr we mvra rì íē.( Sin of thought )
2) Mvdøng mvmàn dø mà-shvla dangrì svng shøn dvzvr we mvra rì íē.( Sin of word )(3) Mv-gvm mà-shvla dangrì svng sháòtaqsórí dvtan we, wá vléshì we mvra rì íē. ( Sin of action )(4) Yvngò nigø mvyvngò dø, dø'mò nigø lā mv-dømngv:tnò dø mvsháshá dvpéshì we mvra rì íē.( Sin of omission )

Wervt vpø íwe pèmè vnvmchvngmaq mvgàm peò lvpat dø svmi móngdàn kaq dvtòl we, vléshì dvzvr we mvra rì, rvgaq tømò byō lvm tvrà rì, mvdìng mvmàn we bvnlìrì taq vlín we mø-í dø, Gvray gvsangò móngdàn Abrahamò pøtpúm yv'ng mongzøl døce dvgøqshì lúnò we Lazaru dø dvgøqshì, gónglún we jèjúrì vtoshì lúnlvm rvt nònggùn lùshàì wvng dvshat nø vrashì mvyøngè, Shvngbeí Gvray mongzøl lòng vtoshì leqlúnøng.
Shvngbe svng Oqā.