Noqshi bø̀ng wa ríò rì

Noqshi bø̀ng wa ríò rì, Matthew 7:21,24-27

Shvngbe í Hkrismat mongzøl lòng vtoshì laqlúni. Vpø íwe pèmè vnvmchvngmaq, Dèni Dec.1.2022, nī taq Pvlàcè kvmnønt nònggùn kūngà lùshì lúnlvm Gvray gvsang Mongkà nø, ( Matthew 7:21,24-27 ) vdòng taqkèní íe.

Noqshi bø̀ng wa ríò rì ; Ngà svng, ‘Kàngpèá, Kàngpèá, wa go vsvng shvngbeí muqlàng móngdàn góng lún lú:ngò we mø̀í. Muqlàng taqlap yv́ngò Vpè Ang nøt cà:nò rìí wa góng lún lú:ngòe.’ 

Chø̀m wáshú vní pv̀n; Wervtnø̀ Ngà kà yarì táò nø cv́n dø̄ng vsvng kagǿ ínìgø, lóngtv́ng mvdv̀m taq chø̀m vrv̄ngshì we, zitnøt v̄l vsvng nvng vbónge. p 25 Shø̄ zaq nø, tì tø̀ng nø, nv̀mbø̀ng mvrù mut ra weí chø̀m wechø̀m svng vtøp ra nìgø, we chø̀m mvpv̀ng angké nø lóngtv́ng mvdv̀m taq vrv̄ngshaq í rvtnø màtūngv̄m.

Ngà kà yarì táò dá:ngí mvcà:nò gǿ nø, zishìl mvdv̀mø chø̀m vrv̄ngshì we svngdál nvng vbónge.27 Shø zaq nø, tì tø̀ng nø, nv̀mbø̀ng mvrù mut rā weí chø̀m wechø̀m svng vtit rā kvt, vtūngv̄m nø angshí vrø̀mv̄me,” a:lòe.

Vpø íwe pèmè vnvmchvngmaq ; (1) cúnshàì we lvpat, Gvray kaq noqshàì we tvrà taq, mvdvm shvle wā nònggup í vchàng nø noqshàì we laqya, Kvmnønt, shóngnønt dvrá rì svng chvk cvndvgøm we mà-vl , noqshì bøngwà ríshì lòng nø zishìl mvdvmø chøm vrvngshì we svngdál nvng vbónge, wànø dvkvme.

(2) Cúnshì we lvpat, dìngman we Gvray dvrá móngkà rì svng cvndvgøm nø vpø' shvring we rvzvngcerì, Kvmnønt, shóngnønt, vlømshì we nøn:tní shvngømré í shøl we jèjú dvrá vdòng taq noqshì nø shvzøngshì we rvzvngcerì nø lóngtv'ng mvdvmø vrvngshì we zitnøt v̄l vsvng nvng vbónge,wànø Vkangpè Yesu àngí ni vkvtdø dvkv'm we Mongkà íē.

Vrá nø, lvngdøm àngni taq 'Ngàsvng Vkangpèá Vkangpèá wa, go vsvng shvngbeí muqlàng móngdàn góng lún lú:ngò we mø̀í. Pàwálvm wàni Muqlàng taqlap yv́ngò Vpè Ang nøt cà:nò rìí wa góng lúnlvm í lúngè,' wā dvkvme.

Wervt vpø íwe vnvmchvngmaq cúnshàì we lvpat taq Vpè Gvray gvsang nvng longzape Yesu Hkristuò Dvrá Mongkà rì svng vpø shvring nø, Lvngdøm àngni høqshaq vtōshì lún bø'shà we Dìngman we Kvmnønt tvrà, Ngvngdøng we shóngnønt dvrá, shvngømré dvrá rì vdòng taqø shvzøngshì nø nøntløm løm noqshàì lòng nø tvndvgá nī  Vpè Gvrayí shvring lvm vlē nø Àng móngdàn góng lúnlvm vlē, lóngtv́ng mvdv̀m taq chø̀m vrv̄ngshì we, zitnøt v̄l vsvng nvng vbónge wànø dvkvme we Mongkà íē.

Shvngbeí Gvray mongzøl lòng vtoshì laqlúni.