Online Shvngkà tvyø lvmvng taq mv-ngú nø Pvlàcè kvmnønt nònggùn kūnga lùshìlvm Gvray dvbùshang Mongkà

Shvngbe mvdvm Gvray mongzøl lòng laqtuqdaq! Desháng vrá online Shvngkà tvyø lvmvng taq mv-ngú nø Pvlàcè kvmnønt nònggùn kūnga lùshìlvm Gvray dvbùshang Mongkà nø Yohan 1:45-51 vdòng taqkèní íe. Gvray Mongkà vzàng rø shìlvm wàì.

 Filipmí Nataniel svng lá lún bǿà nø ang svng, “Moshií gø Dvrá lèga taq, vrá Kàdvtutshúrií gø tvnuò nø vrū yà:ngà pè, Yosep angcè, Nazaret pè Yesu svng nøngmaqí lá lún bǿshà,” a:lòe. Wekvt Natanielí ang svng, “Nazaret mvrìng kèní nø shvla we kapv̀n bung long ni ma?” a:lòe. Filipmí, “Yv̀ngv́mshò lè,” a:lòe.  Nataniel Ang yv́ng di ráì we Yesuí yv̀ng bǿà kvt ang dang tvnuò nø, “Ku, dvgoqnøt mvzvng we Israel vjø̀ng tiq pè,” wae. Natanielí Ang svng, “Nàí kayv́ng kèní ngà èshángà ma?” a:lòe. Yesuí vtà:ngò nø, “Filipmí nà svng shini mègo dvgvp, nv̀mgwè tø̀ng lv̀ngpvngø nà èvl dvgvp ni, Ngàí nà svng yv̀ng bǿngà,” a:lòe.  Natanielí Ang svng vtà:ngò nø, “Rabbiá, Nà nø Gvray Angcè pè, Israel Koqkv́m pè èíe,” a:lòe.  Yesuí ang svng, “Nv̀mgwè tø̀ng lv̀ngpvngø Ngàí nà svng yv̀ng bǿngà, wvng kà rvtnø nà èkv́me ó? Ya mvdv̀mø té ring pv̀n nàí èyv̀ng lú:ngòe,” a:lòe.  Vrá Yesuí, “Ngàí kàdøng tiqkā v̄la:tnìni, muqlàng vtánvm nø, Gvray Ang muqlàng dvzv́rrì nø, Vsvng Angcè pè mvdv̀m taq rvlv́ng mv̄nshì yøt mvnshì we svng namaqí èyv̀ng lóngnønge,” a:lòe.

Vpø íwe pèmè vnvmchvngmaq, Gvray ínø Vsvng kaq síngràl nyan nvng nē, vna,shvná rì pá:nmá:n we nø vwa wadø mø-í. Vsvngí shønò lòng svng ká:mlvm mvdvm àngdeí ni yvng nø, shú:pm nø, yalòng nø dingè , íe, vdùe ,yalòng nø mø-í wànø àngdeí rvdoq rvwàn ra we íe. Lèqla we, gundvtøp we gø mà-vl, àngde taqkèní yvng nø dakdvdvm we gø mà-vl nìnø Gvray dìngman lòng nvng vcarlvm vlē. Dèniò Gvray dvbùshang mongkà taq Natanielí Nazaret wamā kèní nø shvla we kapvn bung ra ni mà? wā sh'ønè. Yalòng nø toni kèní vkvtdø àngwa vtóng laqya ku dì i lòng íe. Nàí ni èyvng lú:ngò wànø Filipmí vdù dø shønò lòng svng yv'nglún shìe. Filipmí nø, àngí wálúnò pvn svng dvnung nø wàò dang yv'nglún shìe. Ngvmshì dangrì nø Gvray àng nvng sing rì íē. Vsvng ku Cúnshàì we rvtø àngni àng dòngce taq wá vdù lòng svng wàlvm dvpvt Gvray àng gvsat vlē. Ká shvbóng; Shvrúngshú ínø shvrúngshú bvnlì, Døngku nvng sing gø' ínø, døngku nvng sing we bvnlìrì dvnunglvm vkvtdø í rì íe. Nøngmaqí wá mv-lúni rì, mvgømkéì pvnrì nø Gvray gvsang àngí wà lú:ngòe. Bvnlìrì dvnúngshì dvgvp síngràl nyan nvng Kvmnønt vní lòng, vní pvn muqhø'm ílvm vchvkngè. Dakdvdvm síngràl nyan mà-vl mvlv'ngò we  shvngømré nø dvdóldv'ng wáshì we Kvmnønt ínø, Kvmnønt mà bá we shvngømré gø Philosophy subject mvdvmø dakdvdvm we mvluq rvt íe, wànø Shànshér pè Svrabín Koqkvm John Paul í shøn yangà. 

Wervt vpø íwe pèmè vnvmchvngmaq, àngdeò lvpat taqkèní gø chaqdvp gundvtøp we nvng Kvmnønt wàwe yà vnípvn svng dvhøm nø Natanielò Kvmnønt pàdø Gvray kaq, Yesu Hkristu kaq, Dìngman we Kvmnønt shvngømré dvrá lòng svng lálún we rvzvngcerì mvng wáshì laqlúnì, dvzaqshì laqlúnì wvng vrashì nø dvshvt weí nònggùn zí mvyøngè. Shvngbeí Gvray mongzøl lòng vtoshì laqlúnì.