Pàwá kàshvbóng lá:ngò we

Pàwá kàshvbóng lá:ngò we

 Wekvt coqcv́nrì di ráì nø Ang svng, “Pàwálv́m angmaq svng Nàí kàshvbóng kèní èshø̀:nò ma?” a:lòe. Ang vtv́nshì nø angmaq svng, “Muqlàng móngdàn vmáshaq kàrì svng cínglv́m vmíng nø namaq svng vzíshaq í we, angmaq kaq nø màzíshaq íe. Kadø íe wani vdá gǿ svng nø rv̄mā daqò nø gvzà luqā lú:ngòe. Màdá gǿ yv́ng kèní nø, ang vdá dv́ngte gø vtv̀ngv́m bǿòe. 

 Pawá wani angmaqí nø dvjaqò nìgø mvyà:ngò; táò nìgø mvtáò, rál gø mvrà:lò. Wervtnø̀ Ngàí angmaq svng kàshvbóng kèní shø̀nò we íe. Yalòng nø Esaya kàdvtut kà taq, ‘Namaqí tá nø ètánøng we kadø gø mècíng lóngnøng. Namaqí yv́ng nø èyv̀ngnø̀ng we kadø gø mèmèshv́l lóngnøng. Kadø íe wani bashà yadvcì, angmaq nøt nø dér bǿà. Vnà gø nvdǿ íá:mì. Nē gø vmàná:mì. Angmaq nēí yv̀ng lú:ngò nø, vnàí gø tá lú:ngò nø, nø:tní cíng rà:lò nø vwv́ngshì ra nìnø Ngàí angmaq svng dvbānāngònøng we íe,’ wa nø shø̀n yà:ngà kà vhø̄m we íe.

 Wedø ínìgø namaqí nø nēí èyv̀ngnø̀ng nø vnàí gø ètá nǿng rvtnø ìshøt ìgv̀n èlúnnønge.  Ngàí namaq svng v̄la:tnìni, kàdvtutshúri nvng døngman vsvng mvmēí nø, namaqí èyv̀ngnø̀ng rì svng yv́ng mvyǿ nìgø yv́ng mvlún yà:ngò; namaqí ètánøng rì svng tá mvyǿ nìgø tá mvlún yà:ngò.”