Piterí Kristu vchà:ngò we

Piterí Kristu vchà:ngò we

27 Weyv́ng kèní Yesu nø Ang coqcv́nrì nvng búngá:mì nø, Kesaria Pilipi rvgaq rvwári svng gòngá:mì. Tvrà ram A:ngí Ang coqcv́nrì svng rø:tnò nø, “Ngà kagǿ ǿngà we, vsvng rìí kadø èlv́ne ma?” a:lòe. n 28 Angmaqí vtá:nò nø, “Tiløp Yohan íe, wa vsvng v̄le. Tiqmaq nø Eliya íe, gø wae. Dvgá maqí nø, Kàdvtutshúri kèní tiq gǿ íe, gø wae,” a:lòe. o 29 A:ngí angmaq svng, “Ini, namaqí nà; Ngà kagǿ íe, èlv́nshà ma?” a:lòe. Piterí vtá:nò nø Ang svng, “Nà nø Kristu* wepè ni èíe,” a:lòe. p 30 Wekvt Yesuí Ang nø Kristu í we, kagǿ svng gø màdvtálv́m angmaq svng mvgvmkaq dvká:mòe.q Yesu shì nø rá zūn long we 31 Wekvt A:ngí coqcv́nrì svng, “Vsvng Angcè pè nø, dvshàlv́m mvme pv̀n tø̄nshì nø, shaqré shaqtvng mvdò nvng shvrúngshú vjìrì nvng dvrá svrarìí ngá:lò nø, shvt bǿòe; ínìgø vshø̀m ni mèpvng vrá zun longe,” a:lòe. 32 Yesuí yadø dèdè chaqdvp shø̀n bǿà kvt Piterí Ang svng tiqtōng svng shø:lò nø ngā:nòe. 33 Inìgø, A:ngí lè nø, lv́m poshì nø Ang coqcv́nrì svng dvjaqò sórí Piter svng nga:nò nø, “Satané, Ngà yv́ng kèní èsārshi! Kadø íe wani nà nø Gvray nøt svng mènàdǿnshì, vsvng shòng lòng taq wa nàdǿnshìe,” a:lòe. 34 Wekvt vsvng loksokrì nvng Ang coqcv́nrì nø Ang yv́ng svng goò dá:ngí, Yesuí a:lò we nø, “Ngà mèpvng cv́n mvyǿ we kagǿ gø, vdè svng ngálshi nø, vdè wurgang baqshi sórí Ngà mèpvng laq cv̀n ra. 35 Pàwálv́m wani vdè gø̀nshaq shvlutshi mvyǿ we kagǿ gø, gø̀nshaq vmvngv̄me. Ngà dvpvt rvt gø, Dvbùshv̀ngkà rvt gø, vdè gø̀nshaq vmvng we kagǿ gø gø̀nshaq lutshi longe.