Shvnshér vsvngrì ò bóy àngni

Shvngbe svng nvmlat taq pàmvrà wange. Shvngbeí Gvray mongzøl lòng vtoshì laqlúnì.

Vpø íwe pèmè vnvmchvngmaq e, Dèni November shvlá (2)ni nø nøng vrvm, mònggvn tøngtang taq vl we Catholic shvngømré me taqkèní Gvray vdòng taqø shì bø'ì we, yøp bøì we pèmè vnvmchvngmaqò Pvlàcè rì, mvra tiqdøm vdòng taqø vl vdù we,Mvra Dàmzí vhø'mō we Pvlàcè rì dvpvt chutchvng we jèjú ìshøt, dvciq lvpat gønshaq lúnlvm dvpvt mvrarì svng røtním dvbvng sórí àngmaqí lang ráà we shing vba dvtøl dvgv'mrì svng dvshérà nø vjúrøt dvbvng we, Missa Kàgvp nóng nø Noqngøm vjúrøt dvbvng we àngni tiqni gø íe. 

Vrá nø Gvray vdòng taqø shagóng dvchøngshì nø shì bø'ì we pèmè vnvmchvngmaqò Pvlàcè rì nvng vhøm nø Gvray gvsang kaq svng tiqdø Noqngømì we, vjúrøt dvbvng ké ínø Pvlàcè, kvmnønt ,shagóng ìshøt igvn nònggùn lùshàì we àngni tiqni gø íe wà kà gø shøn mvyøngè.

Vrá nø, Vpø íwe pèmè vnvmchvngmaq Gvray vdòng taqø shì bø'ì we pèmè vnvmchvngmaq Pvlàcè nvng cúnshài we rvzvngcerì tasvng tale vjúrøt dvbvng ké nø Pvlàcè ìshøt vtōshì lúnlvm rvt (2 Mahkabi) Mongkà taq gø Gvray gvsang vkvtdø dèkv'me. Vrá nø Roma 14:7-9,vdòng taqgø Hkristuí èchvng bø'shà we rvzvngcerì shvngbe nø,...vdè dvpvt wa cúnshàì we mø̀í.

Nøngmaq nø cúnshàì nìgø, Vkàngpè dvpvt lè cúnshàì we íe; nøngmaq nø shìi we ínìgø, Vkàngpè dvpvt shìi we lè íe. Wedø í rvtnø nøngmaq cúnshàì we ínìgø, shìi we ínìgø, Vkàngpè Angò wa ni íshàe. 

Kristu nø shìrì dvpvt gø, cúnshì rì dvpvt gø Angkàng wáshìlv́m rvt, Ang nø shìá:mì nø vrá zun lú:ngì,wàe. Yadang svng dvdvm nø vpø íwe pèmè vnvmchvngmaq gønshaq angkàngpè íwe Vkangpè Yesu vdòng taqø shì rì nvng cúnshài rì tasvng vjúrøt dvbvng kélvm gø mvdøng gvzà vchvk nge walòng svng yv'nglún shì we íe.

Esaya 25:6-9
Gvray gvsangí nø Kv'mì we rvzvngcerì nvng tiqdø mvr vhø'm nø vmlvm aqlvm bóy, bìmti aq bóy dvzøp dvgøò we taq dvbúlúnlvm íwe dang dvkvme.

Roma 5:5-11
Kv'm vsvngrìi lún we , ìshøt igvn rì svng dvdvm nø shaqshaq wā dvbú lúnlvm dvkv'me .

Marko 15:33-39, / 16;1-6a
Yesu shì we
33 Vyáng rvwè tiqcé vní nari kèní nv̀mtan vshø̀m nari høq nø, we móng móngkøp dø̄dv̀ng wàá:mì. j 34 Nv̀mtan vshø̀m nari taq Yesu nø shaqmèí vkiq sórí, “Eloi, Eloi, lama sabaktani?” wae. Wekà nø, “Ngà Gvrayá, Ngà Gvrayá, pàwá Ngà svng èlàngà ma?” wa kà íe. k 35 Weshvnvng rip rì tiqmaqí wekà tá bǿà nìnø, “Ku, A:ngí Eliya svng gōòe,” wae.

36 Wekvt tiq gǿ kvlv̀ngá:mì nø, mvcat tì taq tìrvmøt tiqpù zø̄:nò nø, kø̀mbàng tiqtv̀ng taq dvcaqò dá:ngí, Ang svng shvaqò sórí shø̀n we nø, “Eliya di daq nø Ang svng kā daqò má yà:ngì,” wae. l 37 Wekvt Yesu nø, shaqmèí vkiq sórí shaq dvtná:mì. 38 Wekvt Shanshér Tø̀ngnø taqò dvkøq laqtun gø, taq mvtú kèní pvng mvtú høq, talàm díngá:mì. 39 Yesu nø wedø vkiq nø shaq dvtná:mì we svng, wurgang vzv̀ng lap rip we cìlcè tiqyá øpshú dupèí yv̀ng bǿà kvt, “Yapè nø jø̀ngjǿngni Gvray Angcè tiq pè ni lví dári,” wae. 

Yesu zun lú:ngì we
161 Narni vleá:mì dvgvp, Makdala Mari nvng Yaku angmè Mari nvng Salomi nø Yesu vnàng sv̀ng yøtìí vdø̄r lv́m dvpvt, ngódorcì wa:nò nø dì ráì. a 2 Wenár nv̀mlat nií, sháng mvgágá angmaq di nø, nv̀m svr ráì dvgvp lóngdùng dvgv̀m yv́ng svng tuq ráì. 3 Wekvt angmaq vrùng nø, “Dvgv̀m bv́ngkà lóngkø̀m chv̀ng kagǿí nøngmaq dvpvt tèríaa:tnì má?” wae. 4 Pàwá wani lóngkø̀m wegø̀m nø vtvngshaq tēē. Iwe angmaq kāng ngángshi yà:ngò nìnø, lóngkø̀m gø̀m nø tvri dárà we svng yv̀ng bǿà.

5 Lóngdùng dvgv̀m vdòng svng gòngá:mì ke, bèlaq mùng gwashi nø, vbàng paø rung da we gùchàngré tiq pè svng angmaqí yv̀ng bǿà nìnø, angmaq dvdv̄m vtiqá:mì. 6 Wepèí angmaq svng, “Mèdedáshìnø̀ngni, namaqí nø wurgang taq vtaqa:pmà we, Nazaret pè Yesu svng èlánø̀ng we shángòe. Ang nø zuná:mì; ya yv́ng màvl. Ang svng vyàla:pmà yv́ng gø èyv̀ngnø̀ng le! a:loe.