Simeoní Yesu yà:ngò we

  Moshi Dvrá taq vgv̄nshaq dø dvshàn dvshérshilv́m angni gø̀ ráì dvgvp, angní nø cv̀mré pè baqò nø Gvray kaq shvrúngālv́m Yerusalem svng ngāngá:mì.  Kadø íe wani, Vkàngpè Dvrá Kàru taq, “Vlat gà:lò we lvngàré pè vrv̀m nø Vkàngpè svng shvrúnga ràe,” wa vrū yà:ngà.  Kàngpè Dvrá taq kuqcøl tiq shvgøp, mø̀íni kāø cè vní go shvrúnga ràe, wa vshǿnshaq dø tiqdvchá angníí Gvray kaq shvrúngaòe. 
Simeoní Yesu yà:ngò we
Simeon tǿò we vsvng tiq pè nø Yerusalem wamà taq v̄le. Ang nø døngman nøtlø̀m pè í nø, Israel dvcì kaq nøt shvlø̀m daqò lòng svng cāòe. Shanshér Pvlàcè gø ang nvng v̄le. Vkàngpè Ang Kristu svng mèyà:ngò dv́ngte nà nø mèshì long, wa nø Shànshér Pvlàcèí ang svng dvtáshaq í dá:rì.  Shanshér Pvlàcèí ang svng shø:lò nø noqngø̀m Tø̀ngnø taq welv̄ng ni gòng ráì. Wekvt Dvrálòng vtóng v̄l dø tiqdvchá cv̀nlv́m rvt, angpè angmè níí cv̀mré pè Yesu dvgònga:tnà ke,  Simeoní cv̀mré pè svng ang wur taq vbū:nò sórí, Gvray kaq shvrīng shvtàò nø yadø wae.  “Vkàngpèá, Nà èshø̀n dø tiqdvchá, Nà vshuqpè ngà svng akvt mòngzø̀l dø shèlōngà.  Nàí bashà dvcì rì mv́rdv̀ngø dègø̀ yà:ngà we, Nà Chutchv́ng jejú svng ngàí yv́ng lún bǿngà.  Ang nø wv́ngzà rì svng vwanalv́m gálòng í nø, Nà bashà Israel dvcì ngø̀rdvgùng gø Ang ni íe,” wae.   Yesu dāng shø̀:nò kàrì rvtnø, angpè angmèní nø dádv̀ng wae.  Simeoní angmaq svng shvmán dvgǿ:ngò nø angmè Mari svng a:lò we nø, “Eyà:ngò, cv̀mré yapè nø Israel dvcì cèrì taq, mvme gǿ vtv́llv́m dvpvt gø, mvme gǿ kungshìlv́m dvpvt gø; vrá vsvng vbø̄nshilv́m mvshv́lpvrá gø ílv́m dvpvt rvhiqshaq pè íe. Vrá, mvme gǿ nøt taq dvdā:mò rì dvtánālv́m dvpvt gø Gvrayí rvcà:ngò pè íe. Yapè rvtnø nà dòngnøt svng gø shv̀m mvsǿ:rí yaqò dø èyaqvtne,” a:lòe.
Annaí Yesu yà:ngò we
Vrá, Yasher dvcì Panuel angcè mè í we kàdvtutshú, Anna tǿò we shaqré tiq mè v̄le. Ang nø shvzø̄ngshi bǿì mèpvng shvngøt nǿng v̄l dá:ngí ang chø̀mpè shì nø,  vshvtcé vbì nǿng høqa:tnà we memà tiq mè íe. Ang nø noqngø̀m tø̀ngnø kèní màléshìshaq, v́mpà gø màv́mv́m vnatshi nø júrø:tnò weí vyáng yaqdø̀ng Gvray kaq dvzø:mò we tiq mè íe.  Wervtø̀ taqni ang gø weyv́ng gòng lú:ngì nø, Gvray kaq oqà wā taqsórí, Yerusalem rì chutchv́ng daqò we svng nøt vlǿmshi nø cā dáò rì í dv́ngte kaq cv̀mré gǿ dāng shǿn mā:nòe.Yosep nvng Mari nø Vkàngpè Dvrá dø tiq dvchá, pv̀n vrv̀m cv́n dvgø̄m bǿà dá:ngí, Galili rvgaq Nazaret mvrìng svng vtv́ngá:mì.  Cv̀mré pè nø té mv̄nshì lú:ngì nø, zitnøt rálnøt zø̀ng taqsórí, nònggùn kùngà gø kv́ng mv̄nshì lú:ngì. Vrá, Gvray Ang jejú gø Ang mvdv̀mø vhapme.