Vkangpè Yesu shì yv'ngkèní Zuná:mì nø vsvng pvn dvci ídv'ngte shvngbe svng rí:à we, talen zi we chutchvng we shóngnønt Kønpaq rì svng vtoshì lúnlvm dang pø:nàe.

" Paska Nár (6) Lvban" 
    (5 May 2024)

Dvzvr 10:25-26,34-35,44-48
1Yohan 4:7-10
Yohan 15;12-17

Mongkà tashàì we gø' vrvmì Vkangpè Yesuò mongzøl lòng vtoshì laqlúnì. Shvngbe Pàmvrà.

Ya lvban nø Zunbóy lvban (7) lvban vl yv'ngkèní (6) lvban wà lvban svng gòng bø'shà we íe.

Vpø' íwe pèmè vnvmchvngmaq, Shvngømré taqkèní tiqlvban mèpvng tiqlvban Gvray gvsang mongkà svng dvdvm vjáng lvm rvt wā dvshvng we mø-í. Vkangpè Yesu shì yv'ngkèní Zuná:mì nø vsvng pvn dvci ídv'ngte shvngbe svng rí:à we, talen zi we chutchvng we shóngnønt Kønpaq rì svng vtoshì lúnlvm dang pø:nàe.

(1) Nvmlat Nár taq, Vkangpè Yesu shì yv'ngkèní Zunámì we àngni nø nøngmaq nvng tvp v-li we svng dvtánòe. 

(2) Nár v-ní nár taq nø, àngdeò Pvlàcè nvng Shànshér Pvlàcè taqkèní zi we mongzøl Kønpaq lòng svng dvtit tvleòe.

(3) Nár Vshøm lvban wà lvban taq, Mvra kèní chutchvng lòng svng lún dvzvrè.

(4) Nár Vbi lvban taq, nøngmaq rvzvngce gø' vrvm kaq svng Vkangpè Yesuí vyvngce dø mvkok nø roqgar we dang dvtánòe.

(5) Nár Bunga lvban taq, Vkangpèò gønshaq íwe Pvlàcè gønshaq svng lvklaí dø tvleòe.

(6) Nár Vchut lvban wà lvban taq nø, dvgá Kønpaq rìò mvpvng íwe Vkangpè Yesuò shóngnønt lòng svng vtoshì lún dvzvr we lvban àngni gø íe. Dèniò Gvray gvsang Mongkà taq vbá we shvngkà nø , mònggvn taq  Nønt vtøplvm angpvnpvn vlē. Íni gø Gvray gvsangí nø Na(Ngà)svng dvpø màdá èshù:ng lòng nø dìng we íe.

Vrá nø, "Rvmnvng Rvmchvng shvlá wàwe nø nøngmaqò lvpat taq, dvsha mvhøtlvm yvklvm rvzàq vtv'ng dvja rì vhø'mshì ra dvgvp tubùm dvbvng, shú:ngnønt dvtan lún we vsvngrì " íe.. wànø Nønt dvtøp paqzi vderì í pø':nò we svng yv'nglún shìe. Shá lúnshìe.

Nøngmaq vl lúnshàì rvtø, nøngmaq shvla dø cúnshàì rvtø vhø'mì we, nøngmaq kaq svng yv'ng tvmvm dø vpø' taqsórí vtō lún gø' nø nøngmaqò Rvmnvng shvlá vtv'ng íe, wā Kagø' í shø'n lúnè mà?

Íni gø, Nøngmaq Nønt dvt Nønt yòr, dvsha mvhøt vtv'ng, Vmlvm aqlvm rvzaq vtv'ng, vlømshì ra, dvgøqshì ra màdá vhø'mshì ra dvgvp, Nønt bùm taqsórí mvré zā mvkok dvdí shóngnøntní tubùm dvbvng shì gø' mvng nø Rvmnvng shvlá íe , wànø mvsat lúnshìe.

Pàwàlvm wàni Mongkà taq, Vkangpè Yesu Hkristu dvkv'mè. Namaq tiq gǿ nø tiq gǿ vshòngké ràe. Yalòng nø Ngà dvkv́mkà íe. wàe

Wervt Vpø' íwe pèmè vnvmchvngmaq, Mònggvn Vsvngpvn dvci ídv'ngte svng chutchvng lún we, mongzøl lòng zí lún we, gønshaq zílún we Vkangpè Yesuò lvpkàrì svng Kvmnønt, shóngnøntní cvndvgøm nø Tiqdvng vsvng mvdvm Shvkse wáshì taqsórí Pvlàcè kvmnønt nònggùn kūnga lùshì laqlúnì .... wvng dvshat nø nònggùn zí mvyøngè.
Shvngbeí Gvray gvsangò shóngnønt mongzøl lòng vtoshì laqlúnì.. shvngbe oqā.

Yalvban taq rø v-du we Gvray gvsang mongkà rì nø, mvdvm taq dvtanshì we Mongkà ciqrì taqkèní rø nø shøl lvm wàì.
Shvngbe Pàmvrà.