"Vkangpè Yesu zúná:mì rvtø lvngcha nár (6) lvban"

"Vkangpè Yesu zúná:mì rvtø lvngcha nár (6) lvban"

Vpø íwe pèmè vnvmchvngmaq yalvban nø Paska Ladaw zuná:mì lvngcha Nár (6) lvban wà lvban svng gòng bø'shà.

Dèni rø v-du we Yohan 14;15-21 ciq vdòng taq,.. Ngà svng namaqí èshòngshà nìnø, Ngà dvkv́m kàrì namaqí ècv̀n lóngnønge. Vpèí nøt shvlǿmshú shø̀ngshang tiq gǿ namaq svng zílv́m rvt Ngàí Ang svng røtnalv́m íe. Ang nø namaq nvng dvciq lvpat vl daqe. Ang nø dìnglòng Pvlàcè íe. Rvgaqí nø Ang svng yv́ng gø mvyà:ngò, shá gø mvsháò rvtnø Ang svng vto mvngu:tnò. Iwe namaqí nø Ang svng èshánønge. Kadø íe wani Ang nø akvt namaq nvng v̄l nø, namaq vdòngø vl daqe. Ngàí namaq svng dvrvtcè dø màme ráì; namaq yv́ng svng vrá Ngà dø̄ng daknge. Tiqlvngcè kèní nø, rvgaqí Ngà svng mèyv̀ng long. Namaqí nø Ngà svng èyv̀ng lóngshàe. Ngà cúnshø̀ng rvtnø namaq gø ècúnshì lóngnønge. Weni taq, Vpè vdòng taq nø Ngà vl we, Ngà vdòng taq nø namaq èv̀lnøng we, namaq vdòng taq nø Ngà vl we svng namaqí èshá lóngnønge. Ngà dvkv́mkà svng vtoò nø̀ cv̀n gǿ nø, Ngà svng èshòng gǿ íe. Ngà svng èshòng gǿ svng nø, Vpèí gø shù:ngòe. Ngàí gø ang svng shòngò nø, Ngà vdè gø ang svng dvtánshìlv́m íe,” wàe.

Shóngshøng we pèmè vnvmchvngmaq..
(1).Vkangpè Yesuí nø Àngò dvrá mongkà rì svng vpø shvring nø cvndvgøm lúnlvm dvkvme. (2).Gvray kaq ká:mì we gø'vrvm nø Pvlàcè tvrà taq íni gø shagóng lvpat taq íni gø vháng vlún we rvzvngcerì wáshì lúnlvm dvkvme. (3).Gvray kaq Shú:ngshì shálvm, Vkangpè Yesuò shóngnønt Dvrá rì taqkèní øpshì nø tiqdvr vsvng kaq àngdeò góng dø shóngshì shálvm ègo íwe dèkv'mì we lvpkà rì íē.

Dvdvmlvm.. Nøngmaq nø vléshì sháì we Bāsha vsvngrì íshà dø tiqdvchá vlé shàì we mvrarì Gvrayí chutnàlvm lòng svng shvrúng íē. Røtním shàìe. Wekvt nøngmaqí dvbù nøntshøm lúnì we íe. Íwe àngde kaq vléshìa:trì tiqdvr ngvnshà vsvngò mvrarì svng nø nøngmaqí vroqā lvm, shóngnøntni chutnàlvm gvzà rvzaqè. Dvle dam vwáng mvyø íē. Yadang nø Vkangpè Yesuí shvngøt dvtú we Kvmnønt tvrà, Lútshì lúnlvm tvrà, shóngshì shálvm shóngnønt Dvrá rì svng mà pøí wèò vbongè wàdang svng yv'nglún shìe. Dvdvm shvla we íe.

Vrá nø, tiqdvr ngvnshà kaq nøngmaq Nønt mvshømì, Mvra chutna, vroqa mvnēshàì, mvwá:mshàì , Dam vrá tvle tèshìlvm lá ì lòng nø àngde góng svng zá dvzvrì dang gø íe. Pàwàlvm wànì, tiqdvr vsvng ngvnshà kaq vzàng zá dvzá:r lú:ngì dvgvp àngdeò góng svng vzàng zá vhø'mì rvt íē. " Dàm tvle tèshìlvm dèdvmō nìnø nà dvpvt tiqlòng nvng ngv'nshà pè dvpvt tiqlòng dvgvm vní lòng vzàng edùò," wàwe Dari Miwa dvcirìò Kà shvbóng tiqlòng vlē. Vkangpè Yesuí shvngøt dvtú we taq ngvnshà pèò mvra svng èchutnàò wàwe dvkv'mkà nø àngde tiqgóng svng lútshì lúnlvm dvpvt, àngde tiqgóng Shiqshan nø vháng vlúnlvm dvpvt, dvbù nøntshøm mongzøl lòng vtoshì lúnlvm dvpvt shvngøt dètú ì we Mongkà íē. 

Vpø íwe pèmè vnvmchvngmaq cúnshàì we lvpat, Gvrayí èzí ìwe gønshaq jèjúrì vdòng taqø
Shiqshan mongzøl weí Pvlàcè kvmnønt tvrà taq gø téwa vháng vlún nø Gvray dvgung shvring shvta møqlúnlvm Vkangpè Yesuí shvngøt dvtú we shóngnønt dvkv'mkà, lvpkà rì taqkèní mvng téwa øpshì nø, cvndvgøm nø cúnshì laqlúni.

Yalvban rø vdù we Gvray gvsang Mongkà rì nø,
(1) Dvzvr 8:5-8,14-17
(2)1 Peter 3:15-18
(3)Yohan 14;15-21
Ya Mongkà ciq rì taqkèní shøl nø, rø nø Pvlàcè nònggùn lùshì lvm wàì. Shvngbe svng oqā.