Vshøm gø' Tiq góng Gvray Bóy ( The Most Holy Trinity Homily )

Holy Trinity

Vshøm gø' Tiq góng Gvray Bóy

Shvngbe mvdvm Gvray mòngzøl lòng vtoshì laqlúni. Vpø'ì we vpè vmè vnvm vchvngmaq ya lvbán nø vkàngpè Gvray

Yesu tìløp kvmshì we lvbán angni íe. 

Dèni nøngmaq nø Hkrismas rvtø lvngchà svng kàngpè Yesuò tìløp kvmshì we bóy nvng dvdá:ngòe. Tuqra we lvbán

gvza mvnaq we rvtø taq v'm aq vnvt shìlvm rvtø lvngchà tuqlvm dánshìe. Pentecost shvnshér pvlacè lashì daqì we

shvngømré lvbán dvngí Holy Trinity Vshøm gø' Tiq góng Gvray bóy svng dèni waì we íe. We dvngí angwa nvr

lvbán lvngchà téloq we svng shálún shìe. Dèni nøngmaqí wàì we kàngpè Yesu tìløp kvmshì we bóy nø nøngmaq

noqngømì we nøng gøm weí nvmlvt lvbán svng tuqwe íe. Holy Trinity Vshøm gø' Tiq góng Gvray Ya bóy svng waì

wenø gvza ang lvjøm rvnaq we dang íe. Dèni røvdu we mòngkà 

1/ Dvcìrø 4: 32-40

2/ Roma 8: 14-17, Mati 28: 16-20

svng tàshàì nø nvnggùn lūshì lvm waì.

Nøngmaq kám vsvng gø'vrvm chutcháng we lúnshì lvm nvng sing nø Gvray angcø' angcèrì esòn shà wenø

tìløp kvmshì we angni kèní lvngdøm shìni høq rvtø lvngchà vrvm ang lvjøm rvnaq we nvng vbúnge.

Kwrná rvmá háng taq dvyø katvmì we dang nvng sònshì nø shvdún nì ke, noqngømì we angwa nvr lvngchà

rvtø nø dvyø wun shìwe rvtø kèní shvrat dvkømì we rvtø nvng vbúnge. Gvray ang bvnlì wawe rvtø nø shøtì

nvng nvm, nvmbøng taqkèní angtøng yo dvzvr weí angshí angwvt bø'n dvzvr we dang íe. Nøngmaqò bvnlì

rìnø kwrná rvmá háng taq shinrì shinlvm nvng Nina, Vkvng bvløng í, magvyaq shì dø mvkok roqgàr lvm ràe. 

Vdvm rvmá kwrná súnwángrì wàì rvtø tiqkvt lakvt Gvrayí nø shømvzaq dø nvmwagáng dvzvr shae.

Nøngmaq nø kadángte dvzaq dvkáng shàì we ínigø angshí yúm we rvtø rìgø v:le.

Kámnøt tvrà dang nvng sing nø nøngmaq lvpat taq angshí angwvt rì dvpat gvyaq lvm nø:tshì mvrà.

Gvrayí nø nøngmaq svng luqtvm dø angshí ang dvyø rì vzísha íe. Nøngmaq vdèdè í, pavyémvláì,

pagø timvlánì we íninø angshí mvwáshì nø vwadø kratsúm lvm wa íe. Wedø mví lvm dvpat ang

rvtø yelì nø dvzaq shìlúnlvm dvtú dvshvt we dang íe.

Kàngpè Yesu dang svng køpgøm høq kagø' ígø mvsháì.

Dvzvr Piter nø Kàngpè Yesu nvng (3) nøng cvnò nø, angò mòngkà rì táò dvngí angí dvtvnò we shálvm

mvshøl pvrárì svng gø yvngòe. Shì yvng kèní zun ráì we svng gø yvngòe. Kàngpè Yesu nø Piter

svng shvngømrémèò shølshú anggo wá dvzvrò nø shvnshér pvlacè lashì daqì we svng mòngzøl

dø vtō lúnòe. Dvzvr Piter dvngtè kàngpè Yesu dvng svng nøngmaqí mvsháì.

Wekvt Piter ang tǿrboqshi nø yadø wae. “Jø̀ngjǿngni, Gvray nø vsvng mv̀rshv̀m kaq màrvshv̀l we

akvt ngàí ràl bǿngà. Kadvcì taq ínìgø Ang svng vpǿ svre nø døngman we wàò gø svng nø A:ngí

vtōòe (Dvzvr 10:34-35).

Gvrayí Nazaret pè Yesu kaq, Shànshér Pvlàcè nvng jórnònggùn yøtìí kadøwa vdø̄r yà:ngà nø;

weyv́ng kèní Gvray nø Ang nvng vl rvtnø, Ang nø kayv́ng màyv́ng di sórí bv̀nlì shvlá wàò nø,

cá:ngí shvna:lò vsvng shvngbe kaq dvba:nòe, wa lòng shv̀ngkà namaqí gø detávpnøngni

(Dvzvr 10:38) taq Korneliu chøm vsvngrì kaq Piterí shvngøtnòe.

Koqkámrì nvng kà dvtutshúrìí nø Gvrayò bøng kèní angbvnlì walvm rìsvng yøtìí vdø̄:ràòe. 

- Solo dvle koqkám angshvr David kaqsvng Samuel taqkèní yøtìí vdø̄:ràòe (1 Samuel 16:14).

- Moshií nø Aron svng shànshér dø shvgaqlv́m rvt, ang vgo mvdv̀m taq vdø̄rlv́m yøtìí vdø̄:rò nø,

ang svng matnāòe (Lewi 8:12).

- Kàngpè Yesu nø koqkám, shvrúng shú nvng kà dvtutshú (3) pvni íe. We mvdvmø koqkám, kà

dvtutshú nvng shvrúng shú yarìò ana nø kàngpè Yesu kristu yvng kèní lúnò we íe. 

Vsvng tiqmaq mvdvmø yøtìí vdø:rò rvt Gvrayò dvbù shvng mòngkà dvshvng shúrì íe. Vpè Gvrayí nø

Kàngpè Yesu svng dvbù shvng dvshvng lvm dvpat yøtìí vdø:rà mvrà, shvnshér pvlacè taqkèní kømzøp

dvzvròe. Vsvng íwe Yesu nø mariò góng vdùng taq vsvng íráì rvtø taqkèní shvnshér pvlacè nvng

kømzøp we íe. Kàngpè Yesu tìløp kvmshì we rvtø Gvray Pvlàcè nø kāø dø Ang mvdv̀m lāshì

dvzvrò nø móng døngtáng dvshvngò we íe (Marko 1:10).

Nøngmaq rvsángcèrì gø' vrvm gø tìløp kvmshì yvng kèní shvnshér pvlacè svng vtòlún bø'shà rvt Gvrayò

angcø' angcèrì íshàe. Gvrayí nø tìløp kvmshì we gø' vrvm nø kàngpè Yesu svng shønò døni tiq dvchá

nøngmaq svng gø shøn we íe. “Nà nø Ngà Shóngshøng we Ngàcè pè èíe; Ngà nø Nà svng vtvngshaq

dvbònge,”(Marko 1:11).

Nøngmaq tìløp kvmshì wenø chøm íwe muqlàng móngdàn bángkà tánshì we nvng vbúnge. Nøngmaqò

døngjá nø shvnshér pvlacè taqkèní tvrà shøl we svng cvnshì lúnlvm dvzaq dvkáng shàì.