Yesuí Ang coqcv́nrì nøt shvlø̀:mò we dang svng yv'nglún shìe.

Yesuí Ang coqcv́nrì nøt shvlø̀:mò we dang svng yv'nglún shìe..

Dèni tashì lúnlvm Gvray móngkà (1) ciq Dvzvr 6:1-7,taq Gvray kaq Kv'm we rvzvngcerì luq mvnshi lúngì mvdvm, Kvmnønt tvrà taq téwa mongzøl dø vshøl lvm Gvray dvbùshang móngkà svng téwa dvsher lúnlvm , gø'vrvm, mvdò vrvm Gvray bvnlì taq nø'ngnø'ng vrá dvzaqshì dvzømshì lúnlvm rvt rvcà:ng bø'à we dvzømshú rì svng shvngøt dvtúò sórí Dvzvr rì àngmaq mvdvm wur hapshì nø vjúrøtnò weí shvmvn dvgøng Kà zíò we, vtoshì lúnò we dang yv'nglún shìe. 

Yadang svng dvdvm nø, nøngmaq rvzvngcerì gø'vrvm kaq svng gø Gvrayí nø shvngømré, shølshú vgorì taqkèní Gvray gvsang bvnlìrì taq dvzømshì lvm, àng Mongkà dvshvng lvm,vpnóngshì nø dvzaqshì lvm ègo íè, talen zi we jèjúrì vtoshì lúni è. Vtoshì lúnì we jèjú talen bvnlìrì svng v-wàwà dø dvjé we mø-í lvm vpø shvring nø dvzaqshì taqsórí Pvlàcè kvmnønt nònggùn téwa lùshì lúnlvm shèdømìè. Ègo íwe Mongkà íe....

Mongkà (2)ciq ,1 Peter 2:4-9
Cv̀mré rvlìcè dø wáshì ràe, wā dvkvme. Rvtø vrvm nøngmaq taq shaqcvm lvm angpvnpvn vhø'mshì nø vlé shìlvm bungrà dvgvp Vkangpè vdòng taqø Kvmnønt shvdik nø vléshì we mvrarì svng vroqshì weí gø̀nshaq cúnshì lúnlvm, Gvrayò zaqshøp vpvt we,  koqkv́m zaqshøp vdá we, shvrúngshú dvcì, shvgaqshaq dvcì, Gvrayò Ring vtv'ng vpø vtv'ng bashà dvcì rì wáshì lúnlvm dèkvme.

John 14:1-12

Yesuí Ang coqcv́nrì nøt shvlø̀:mò we dang svng yv'nglún shìe.
1 “Namaq nøt mèdeshànøngni; Gvray kaq èkv́mnøng, Ngà svng gø èkv́mshà. a 2 Ngà Vpè chø̀m taq nø, v́lrà gvzà v̄le. Ngà nø namaq dvpvt v́lrà dvgǿa nvng longvme. 3 Ngà longvm nø namaq dvpvt v́lrà dvgǿ dv́ng bǿngò kvt, Ngà vrá tiq kvt vtv́ng dak nø, Ngà vl yv́ngø namaq gø v́l lúnlv́m dvpvt, Ngàí namaq svng lù daqìe. b 4 Ngà v̄l yv́ng tuqvm we tvrà lòng nø namaqí èshánønge,” a:lòe. 5 Tomaí Ang svng, “Vkàngpèá, Nà kayv́ng svng èdivm we dv́ng nøngmaqí mvsháì nìnø, tvrà nø kadøwa lvsháì ni?” a:lòe. 6 Yesuí ang svng, “Ngà nø tvrà nvng dìng lòng nvng gø̀nshaq ǿngàe. Ngà taqkèní wa mø̀í nìnø, Vpè yv́ng svng kagǿí gø dí mvlú:nò. c
7 Namaqí Ngà svng èsháshà rvtnø, Ngà Vpè svng gø èshánønge. Akvt kèní kukaq namaqí Ang svng vsháshaq í nø, yv́ng gø vyv́ngshaq íe,” a:lòe. 8 Filipmí vrá Ang svng, “Vkàngpèá, Vpè nøngmaq svng dètānshà, wekvt nø nøngmaq nøt shø̀:mìe,” a:lòe. 9 Yesuí vrá ang svng, “Filipmá, Ngà nø namaq nvng yadv́ngte vlé dø à:lì we, nàí Ngà svng shini mèshánga ma? Ngà svng vyv́ngshaq gǿí nø Vpè svng vyv́ngshaq íe, a:lòe.

Vpø íwe pèmè vnvmchvngmaq Vkangpè Yesu Hkristu nø shì yv'ngkèní zuná:mì mèpvng (40) ni høq Dvzvr rì mvdvmø Shànshér Pvlàcè taqkèní dì nø Pvlàcè kvmnønt tvrà taq Nønt mvcvmlvm, Nønt mvyòr lvm, Nønt shvløm nø shvngøt dvtú yangà we svng vkvtdø yv'nglún shìe. Nøngmaq gø'vrvm lvpat taqgø dvzvr Toma, Filip dø Nønt yór Nønt cv'm we màhømlvm Vkangpè Yesu àngí vrvngò we dvkvmkà, Kàgvp núngpa, Dvrá Mongkà taqkèní nøngmaq gø rvtø vrvm Pvlàcè Vmpa  kvmnønt nònggùn kūnga lùshì lúnlvm nø mvdøng gvzà vchvk nge wadang svng yv'nglún shìe. Vkvtdø Vkangpè Yesuò Kàgvp Mongkà taqkèní cúnshàì lòng nø Vpè Gvray nvng tiqdø vhøm lúnì, vl lúnì lòng gø íe, wadang svng gø dvdvm nø nònggùn lùshàì . 

Yalvban rø vdù we Gvray móngkà rì nø,
Mongkà (1) Dvzvr 6:1-7
Mongkà (2) 1 Peter 2:4-9
Dvbùshang mongkà
Yohan 14:1-12 ya Gvray Mongkàciq rì taqkèní shøl nø, rø nø Pvlàcè nònggùn kūnga lùshì lvm wàì.
Shvngbe svng oqā.