Yesu dang shvkse wáshì we

Yesu dang shvkse wáshì we

Ngà nø Ngà dvpvt shvkse wv́ngshø̀ng we í nìnø, Ngà shvksekà nø mvdìng.  Ngà dvpvt shvkse wáashú nø dvgá tiq gǿ èv́lange. Ang Ngà dvpvt shvkse wáshì lòng gø dìng we Ngàí shángòe. Namaqí Yohan svng røt dèzv́r bǿshà ke, ang gø dìng lòng dvpvt shvkse wáshì bǿì.  Iwe Ngà yadø wvng we nø rvgaq tø̀m Vsàngí Ngà dvpvt shvkse wáa rà rvt wvng we mø̀í, namaq gø̀nshaq chutchv́ng lúnlv́m dvpvt lè Ngàí shø̀nò we íe.Yohan nø gá we svmigwìn tiq lòng dø í nø, namaq gø ang gálòng taq tiq chàmcè dèbù bǿshà. 
Iwe Yohaní shvkse wàò lòng mvdv̀m té ring we shvkse kà nø Ngà yv́ng v̄le. Wá dvdv́nglv́m Vpèí Ngà svng èzøng we bv̀nlì nvng Ngàí wv̀ngò bv̀nlì rìí Ngà nø Vpèí dèzv́r dakngà pè ǿngà we shvkse èwv́ngange.  Ngà svng dèzv́r dakngà pè Vpè gø Ngà dvpvt shvkse wáshì bǿì. Ang kà svng namaqí kadvgvp gø mètá dv́rnøng; Ang mv̀rshv̀m svng gø mèyv̀ng dv́rnøng.wā dvkvme.

Vpø íwe pèmè vnvmchvngmaq,
Gvray gvsangí nø nøngmaq Bāsha vsvngrì kaq svng shóngshì weí mvra tìtøm taqkèní èchvng ínø shèlut bø'shà. Íni gø dvkvm we móngdàn kaq svng bú:nglúngì tvrà taqø vsvngrì Gvray gvsang kaq vtù vre nø Satan Gvray kaq svng le noq lúngà. Yadang svng yv'nglúnò we Gvray nø vsvngrì mvdvm shvmná vcórlúngì, íni gø Moshií røtním dvbvng yangì. Kàgvp angli ban taq Moshií vjúrøtním dvbvng yangì pàdø Kàgvp àngshvr ban taq gø Vkangpè Yesuí nøngmaq dvpvt Vpè Gvray kaq svng vjúrøtním dvbvng weí dvciq lvpat gønshaq lún dèzvrìe.

Kadvngte mvhøt nø yvklvm tvrà íni gø Gvray nøngmaq svng shóngshì weí dvkv'm we móngdàn kaq góng lúnlvm, tuqlúnlvm rvt ègo íè. Nøngmaq kaq svng shóngshì we cúnshì pè Gvray gvsangí shøl we dang svng daq-vtù vpnongshì nø cvndvgøm lúnlvm rvt dvlu dvgø'shàìe ma? dvdvm nø nònggùn lùshì lvm wàì.