Yesu svng ngódōrcìí vdø̄:rò we

Yesu svng ngódōrcìí vdø̄:rò we

36 Farisi tiq gǿí nø Yesu svng ang nvng tiqdø v́mpà v́mlv́m gōòe. Wekvt Yesu nø Farisi pè chø̀m taq gòngá:mì nø v́mpà v́mlv́m námrunge. o

37 Wekvt wamà welòng taq mvrà wàò we svmaré tiq mè nø, Farisi pè chø̀m taq Yesu v́mpà v̄m we shá bǿà nø, ngórdōrcì zv́ngshì we lóngshú chúng tiq chv̀ng lv́nga:tnà nø;

38 mèpv̄nglap Ang hí shvnvngø rip ráì nø ngø taqsórí ang nēcìí Yesu hí svng dvshaqòe. Vrá ang vnií shøqò sórí, Ang hí svng gø vbú ma:nò nø ngórdorcìí ma:tnòe. p

39 Yesu svng gō bǿà we Farisi pèí welòng svng yv̀ng bǿà kvt, “Vsvng yapè nø kàdvtutshú í nìnø, Ang svng shupma:tnà mè nø kagǿ í we nvng kadøwa mvrà vl mè í we svng nø dǿ:mò ni we,” wa ang nøt vdòngø dvda:mòe.
40 Yesuí ang svng, “Simoná, nà svng Ngàí tiq kà shø̀nlv́m v̄le,” a:lòe. We pèí, “Svra pèá, èshø̀n lè,” a:lòe.

41 Yesuí a:lòe; “Vsvng kaq pø̀ rū:mò we tiq gǿ nø, ang svng shvrv́n vjø̄ we vní gǿ v̄l we, tiq gǿ nø Dinari pungwà yá vjø̄e; tiq gǿ nø Dinari pùngwàcé vjø̄e.

42 Angní nø tvlēlvm màdá rvtnø, a:ngí vní gǿgǿ svng jejú kèní chutnaòe. Wedø í ni yagǿní kèní ang svng tété shóngshì we nø kagǿ íe ma?” a:lòe.

43 Simoní vtà:ngò nø, “Té chutna bǿà gǿ dø̄ínī, wvng dvdv̄mòe,” a:lòe. Yesuí, “Nàí jò dø dèdvm bǿà,” a:lòe.
44 Yesu nø svmaré mè kaq svng poshì dá:ngí, Simon svng, “Svmaré yamè svng nàí èyà:ngòe ma? Nà chø̀m svng Ngà gòng rángànøng nø, nàí Ngà hí zv́lshìlv́m tì gø mèzǿnga. Iwe svmaré yamèí nø ang necìí lè Ngà hí svng dèshak nø, ang vnií èshøknge.

45 Nàí nø Ngà svng mènàbòngà; yamèí mv̀ng nø, Ngà gòng rángà lv̄ng kèní mànārnār Ngà hí svng nàbònge. r

46 Nàí nø Ngà vgo svng zanlúnyøí mènàdø̄ra; yamèí nø, Ngà hí svng ngórdorcìí nàdø̄re.

47 Wervt nø Ngàí v̄lvtnøng: Ang mvrà nø mvme luq we, vchutnashaq íá:mì; pawá wani ang shóngnøt luqe. Iwe, vrvmcè chutna lún gǿ nø vrv̄mcè wa shóngshie,” a:lòe

48 Wekvt Yesuí svmaré mè svng, “Nà mvrà chutnāng bǿngà,” a:lòe. s

49 Ang nvng tiqdø v́mpà v̄m nø námrungrì, angmaq nø angmaq vrùng lú:ngì nø, “Mvrà gø chutna lú:nò we, yapè nø kagǿ íe ma?” wa

50 A:ngí svmaré mè svng, “Nà kv́mnø:tní nà svng èchv́ng bǿì; pàmvrà èlō,” a:lòe.