Yesu zun lú:ngì we

Yesu zun lú:ngì we
 Narni vleá:mì dvgvp, Makdala Mari nvng Yaku angmè Mari nvng Salomi nø Yesu vnàng sv̀ng yøtìí vdø̄r lv́m dvpvt, ngódorcì wa:nò nø dì ráì.  Wenár nv̀mlat nií, sháng mvgágá angmaq di nø, nv̀m svr ráì dvgvp lóngdùng dvgv̀m yv́ng svng tuq ráì. Wekvt angmaq vrùng nø, “Dvgv̀m bv́ngkà lóngkø̀m chv̀ng kagǿí nøngmaq dvpvt tèríaa:tnì má?” wae.  Pàwá wani lóngkø̀m wegø̀m nø vtvngshaq tēē. Iwe angmaq kāng ngángshi yà:ngò nìnø, lóngkø̀m gø̀m nø tvri dárà we svng yv̀ng bǿà.  Lóngdùng dvgv̀m vdòng svng gòngá:mì ke, bèlaq mùng gwashi nø, vbàng paø rung da we gùchàngré tiq pè svng angmaqí yv̀ng bǿà nìnø, angmaq dvdv̄m vtiqá:mì.

 Wepèí angmaq svng, “Mèdedáshìnø̀ngni, namaqí nø wurgang taq vtaqa:pmà we, Nazaret pè Yesu svng èlánø̀ng we shángòe. Ang nø zuná:mì; ya yv́ng màvl. Ang svng vyàla:pmà yv́ng gø èyv̀ngnø̀ng le!  Namaq èdìv́mnøng nø, ‘Ang nø namaq vzv̀ngzv̀ng Galili gùrwang svng di dae, wa nø Ang coqcv́nrì svng gø, Piter svng gø dètánøng. A:ngí namaq svng èvlvpshà dø, namaqí Ang svng weyv́ngø mv̀ng èyv̀ng bǿnø̀nge,’ èvl bǿnøng,” a:lòe.  Wekvt angmaq nø, nipnip vdv̀n sórí lóngdùng dvgv̀m kèní búngá:mì. Iwe angmaq svre rvt, kagǿ svng gø angmaqí tiq kà gø màdvtáò.