Yohan coqcv́nrìí Yesu svng røtna:tnà we

Yohan coqcv́nrìí Yesu svng røtna:tnà we

Yohan nø tūng taq v̄l dvgvp, Kristuí wàò bv̀nlì rì dāng tá bǿà kvt, Yesu v̄l yv́ng svng ang coqcv́nrì dvzá:rò nø, “Dìlv́m vdv́nshaq pè nø Nà èíe ma? Mø̀íni nøngmaqí dvgá tiq pè svng cāì ni ma?” wa rø:tnòe. Yesuí angmaq svng, “Edìv́mnøng nø, namaqí ètánøng rì gø, èyv̀ngnø̀ng rì gø Yohan svng dètánøng. Nemàn rìí vrá yv́ng lú:nòe; hízē rìí vrá di lú:nòe; mvnggv̄ng í rì dvshér lú:nòe; nà mvtá rìí vrá tá lú:nòe; shì rì dvzūn lú:nòe; mvshámhoq dvshà rìí gø Dvbùshv̀ngkà dvshā:ngò we tá lú:nòe. Ngà rvtnø nøt vtøplv́m màvl gǿí* mv̀ng nø, ìshøt ìgv̀n lú:nòe,” a:lòe. 

Yohan dang Yesuí dvsha:ngò we

Yohan coqcv́nrì lolv́m wáshì ke, Yohan dāng vsvng loksokrì kaq Yesuí yadø shǿn pà:ngòe. “Namaq nø kapà svng dvjaqlv́m rvgaq mvgūng svng èbúngv́mshà ma? Nv̀mbø̀:ngí vwa:tnò we gungzìsá svng dvjaq nvng èdìv́mshà ma? Namaq nø pà yv́ng nvng èbúngv́mshà ma? Shøpshøp wa we bèlaq gwāshì we tiq gǿ svng yv̀nglv́m èdìv́mshà ma? Shøpshøp wa we bèlaq gwāshì rì nø koqkv́m Tø̀ngnø rì taq lè rūnge. Ini, namaq nø pawá èbúngv́mshà ma? Kàdvtutshú svng yv̀nglv́m èdi bǿshà ma? Ngàí v̄la:tnìni; íe, Yohan nø kàdvtutshú mvdv̀mø té rīng we tiq pè íe. Kàru taq, ‘Eyv̀ngnøng, Nà mv́rdv̀ng yv́ng Ngà dvzv́r Ngàí dvzv́r dakngò nø, Nà vzv̀ngzv̀ng Nà tvrà a:ngí dècøpmā dāe’ wa vrū yà:ngà kà nø, yapè svng wa we íe. Ngàí namaq svng v̄la:tnìni, svmaréí gà:lò rì dvhø̀ taq, Tiløp Yohan mvdv̀m rīng we nø tiq gǿ gø mvbūng dv̄r. Wedø ínìgø muqlàng móngdàn taq cv́m vtv̄ng gǿ nø, ang mvdv̀mø té ringe.