Chø̀myoré tiqcé mè kàshvbóng

 Vnvm vchvng rìé, lv̀ngdø̀m tiq kà nø, Gvray kaq wv́mshì dvzv́rlv́m namaqí kadøwa tvnùnglv́m í we, nøngmaq yv́ng kèní ètá bǿshà nø wedøni ècv̀nnøng dø tiqdvchá, akvt namaqí téwa cv̀nlv́m rvtnø, nøngmaqí Vkàngpè Yesu vdòng taq namaq svng rø̀:nì nø, dvshat dvzitna:tnìe.  Kadø íe wani Vkàngpè Yesu dvkv́mkà taq kèní nøngmaqí namaq svng kadø í we dvkv́mkà zí bǿshà we nø namaqí èshánønge.  Gvray Ang nøt nø yadø íe. Namaq nø shvgaqshaqrì èínøng dø mvmv́ng mvshèr we svng nànatshìnøng nø,  kagǿ gø̄ vdè góng svng shànshér dø èøpshìnøng. Vjàng laqyà taq gø vpǿlv́m dø èwáshìnøng. Vrá Gvray mvsháò we wv́ngzàrì map dø namaq mvmaplv́m nvng,  kagǿí gø angnv̄m angchvng svng màlélv́m nàyáshinøng. Namaq svng nøngmaqí dvtú shvngøtshaq dø yadv́ng pv̀n dang kèní angnv̄m angchvng svng vléò gǿ svng nø Kàngpèí tvle teq daqòe.  Kadø íe wani, Gvrayí nøngmaq svng nø, mvmv́ng mvshèr we wàlv́m rvtnø ègoì we mø̀í. Shànshér dø cúnshì lúnlv́m rvt mv̀ng ègo bǿshà we íe.  Wervtnø̀ dvkv́mkà yalòng svng màtoò gǿí nø vsvng kaq màtoò we mø̀í. Namaq svng Shànshér Pvlàcè èzínøng pè Gvray kaq màtoò we íe.

 “Wenila taq muqlàng móngdàn nø, svmigwìn lv̄ngshì sórí, lvngàshv́rpè vtō nvng svng búngv̄m we chø̀myoré tiqcé mè nvng vbóng longe. Angmaq taqkèní pùngwà mè nø dál nø; pungwà mè nø zitne.Dál mèla nø svmigwìn nø lv̄ngshì we yøtì nø mvlv̄ngshì.Zit mèlā mv̀ng nø, svmigwìn nvng tiqdø, chúngcè taq yøtì gø lv̄ngshìe.  Lvngàshv́r pè nø tø̀má:mì nø shini mvtuqra dvgvp, angmaq shvngbe nø yøpyǿ dvzì nø yøpme.  Yaqdø̀ng rvwèí, ‘Lvngàshv́r pè dì daq ìé! Ebúngnøng nø ang svng nàtov́mnøng,’ wa vkiq ráì.  Wekvt chø̀myoré wemèla shvngbe búng nø, angmaq svmihǿng rì rvsūshìe.  Dál mè laí nø zit mèlā svng, ‘Namaq yøtì cvmaq nàwv́nāshà; pawá wani nøngmaq svmigwìnrì vmaqlv́m wáshìe,’ a:lòe.  Zit mèlāí vtà:ngò nø, ‘Mvdaq, namaq svng vwv́naì kvt nø nøngmaq dvpvt gø mvluq. Namaq nø, nā:mò rì yv́ng svng èdìnøng nø èwv̄nshiv́mnøng,’ a:lòe.  Yøtì wv̄nshi nvngsvng angmaq dìá:mì dvgvp lvngàshv́rpè tuq ráì. Tvlú dvgǿshìshaq mèlā nø, ang nvng tiqdø zvmì shvzøng bóy svng gòngá:mì nø, bv́ngkà cøt bǿà.  Chø̀myoré wá mè la nø mèpvng wa tuq ráì nø, ‘Vkàngpèá, Vkàngpèá, nøngmaq svng bv́ngkà ètánāshà,’ wae.Inìgø A:ngí, ‘Ngàí namaq svng jø̀ngjǿng v̄l atnìni, namaq svng ngàí mvsháì,’ a:lòe. Wervtnø̀ pán nàshatnøng. Kadø íe wani Vsvng Angcè pè dìlv́m angni ang rvtø̀ nø namaqí mèshánøng.