Coqcv́n tiqcé vní pè rvcà:ngò we

Gvray Mongka tiq Tut

Wervtnø̀ namaqí Kristu Yesu svng namaq Nvkàngpè wàlv́m nàto yv̀ngshà dø tiqdvchá, Ang vdòng taq wedø cv́n dèdøngshìnøng nø;  Ang vdòng taq angrø̄ ngv̀ng dø ècaqshìnøng dá:ngí, té vháng dø nàrv̄ngshìnøng nø; namaq svng shvngøtshaq dø tiqdvchá, namaq kv́mnøt svng shèdøng shèngv́ngshìnøng taqsórí, oqà wá nøt dv̀n nàlimnøng.  Kristu Ang tvrà nvng màbóng dø, vsvng vtóng lvmàng cà:nò we, rvgaq yalòng øp we dvrá* svng cà:nò we, dakmàng gvcvt paqzí nvng yùm ra we kà vhúng kèní, namaq svng kagǿí gø lemènànùngv́m bǿnøng dø nàyáshìnøng.  Kadø íe wani Gvray Ang kø̀mgøm we Dvmø̀ nøt í dv́ngte nø, Kristu vdòng taq angkè vl we íe.  Ang nø vgo zǿmshú gàmzø̀rì nvng vmíng vkv́ng vl we í dv́ngteò vgo í nø, namaq gø Ang vdòng taq pv̀n vrv̀m kø̀mgøm dø ègø̀nønge.  Namaq nø, Ang vdòng taq rvmø̄lshaq èínønge. Yalòng nø, vsvng wū:rí rvmø:lò we mø̀í dø, Kristu ang rvmø̄l vtóng wa we shagóng nøt cà:nò tvrà gu:rò yv́ng kèní, namaq svng rèmøl bǿshà.  Vrá tìløp lòng taqkèní namaq svng nø Yesu nvng tiqdø èkǿm bǿshà nø; shì yv́ng kení Ang svng dvzun lú:ngà pè Gvray jórnònggùn svng namaq èkv́m bǿshà lòng taqkèní, A:ngí namaq svng Yesu nvng tiqdø dèzun bǿshà.Vzv̀ng namaq nø dvrá màdárì nvng Màrvmø̄lshaqrì èínøng nø mvrà vdòng taq èshì yv̀ngshà nìgø, akvt nø namaqí nàlénøng we mvrà shvngbe Gvrayí èchutnanø̀ng nø, namaq svng nø Yesu nvng tiqdø dèzun bǿshà. Vrá, nøngmaq svng vtù we dvrá taqò dvkv́mkàrì svng A:ngí èshøqāì dá:ngí, werì svng èlúā bǿshà nø, wurgang taq nàtaqa bǿshà. Cáng loksok vgo zǿmshú rì nvng vmíng vkv́ng v̄l rì angmaqò cìl dànkùng rì A:ngí gvyaqò nø, werì svng nø shvngbe mv́rdv̀ngø shvraq chaqò dá:ngí, wurgang tø̀ng kèní angmaq svng dv́ngke bǿà.

Luka 6:12-19

Wenila taq Yesu nø júrøtlv́m rvt mvrùl tiqyv́ng svng rvlv̀ngá:mì nø, pòyaq chapgá júrø:tnòe.  Nv̀m gá daqì dvgvp, Ang coqcv́nrì svng A:ngí goa:tnà nø, angmaq dvhø̀ kèní tiqcé vní pè rvcà:ngò dá:ngí, wepèla svng nø dvzv́r, wa bø̀ng tǿòe.We tiqcé vní pè nø, A:ngí Piter, wa tǿa:pmà pè Simon nvng angnv̄m pè Anderu, Yaku ó Yohan nvng Pilip ó Bartolemi;  Mati ó Toma nvng Alpiu Angcè pè Yaku, Zelot lv́nshi we nøtlø̀m pè Simon nvng; Yaku angcè Yuda nvng Vkàngpè svng nv̄mvmlv́m pè Iskariot vsvng Yuda gø íe. Wekvt Ang nø angmaq nvng tiqdø shúngshì daqì nø, vdv́m tiq tø̀mø dvtǿngshie. Wekvt Ang coqcv́n loksok tiq mvdò nvng Yuda rvgaq shvngbe nvng Yerusalem wamà kèní gø, nvmukdvra shvnvngø Tiru nvng Sidon móng rvgaq kèní gø dì ráì we bashà loksok tiq mvdò nø,  Ang kà tāshi sórí angmaq dvlí dvjv́ng rì dvbānā lúnlv́m rvt dì ráì. Vrá, mvmv́ng cángrìí dvkiò rì gø dvbānā lún bǿà. Vsvng loksokrì shvngbe nø Ang svng shup lúnlv́m rvsíshìe. Kadø íe wa nìnø Ang góng kèní jórnònggùn bung mv̄nshì long weí shvngbe bān mv̄nshìv̄me.