Coqcv́nrì svng dvtánshì we

April 19, 2020

Yohan 20:19-31

Nar nv̀mlat ni weni dørø̀m taq, coqcv́nrì nø Yuda vsvng rì kaq svre rvtnø bv́ngkà kvlaqshi nø vl dvgvp, Yesu nø angmaq dvhø̀ø̄ zvng rip ráì nø, “Mòngzø̀l lòng leq lúnnøng,” a:lòe. f 20 A:ngí wedø a:lò dá:ngí, angmaq svng Ang wur nvng Ang svràm pa dvtanshìe. Wervtnø̀ coqcv́nrì nø Vkàngpè svng yv́ng lún bǿà rvt gvzà dvbù lú:ngì. g 21 Yesuí rá angmaq svng, “Mòngzø̀l lòng leq lúnnøng; Vpèí Ngà svng dèzv́r dakngà dø, Ngàí gø namaq svng dvzárìe,” a:lòe. h 22 A:ngí wedø a:lò dá:ngí, angmaq svng shaqí vhē:rò nø, “Shànshér Pvlàcè nàtōnøng. i 23 Namaqí kagǿ svng mvrà èchutnanø̀ng nìnø, ang mvrà nø vchutshaq ív̄me. Namaqí kagǿ mvrà mèzaa nø̀ng nìnø, wegǿ mvrà nø v́ldv̀ng wae,” a:lòe.j 24 Iwe Yesu weyv́ng di ráì dvgvp, tiqcé vní pè taqkèní Didimu tǿò we Toma nø angmaq nvng tiqdø màvl. k 25 Wervtnø̀ dvgá coqcv́nrìí ang kaq, “Vkàngpè svng nøngmaqí yv̀ng bǿshà,” a:lòe. A:ngí angmaq svng, “Ang wur taq shv̀mshi dv̄mmá yv̀ngò nø, dvmmá taq ngà wurhàm màrvzǿngshøng dv́ngte, Ang svràmpa dvmmá vdòng svng ngà wu:rí màmvnokngò dv́ngte nø, kadø ínìgø ngà mvkv́m,” a:lòe.l 26 Tiq nár mèpvng,* coqcv́nrì nø chø̀m vdòngø vrá mvngushi ke, Toma gø vbáe. Bv́ngkà gø kvlaqshaq yv́ngø, Yesu nø angmaq dvhø̀ø zvng rip ráì nø, “Mòngzø̀l lòng leq lúnnøng,” a:lòe. m 27 Wekvt Yesuí Toma svng, “Nà wurhàm èzúshi ra nø, Ngà wur svng èshupmà. Vrá nà wur èzúshi ra nø, Ngà svràmpa mènokngà, màkv́m mèwáshìni, èkv́m,” a:lòe. 28 Tomaí vtá:nò nø, “Ngà Vkàngpè nvng Ngà Gvrayé,” a:lòe. n 29 Wervtnø̀ Yesuí, “Nàí nø Ngà svng èyv̀ng bǿngà rvtnø wa èkv́me ma? Mvyà:ngò nìgø kv́mrì angmaq nø ìshøt ìgv̀n v̄le,” a:lòe.o 30 Ang coqcv́nrì negv̀mø Yesuí wà yà:ngà we shálv́m mvshv́lpvrá dvgá dø mvme pv̀n kàru yabok taq màrushaq rì v̄le. 31 Iwe Yesu nø Gvray Angcè pè Kristu wepè ni í we svng namaq kv́m lúnlv́m rvt nvng èkv́mnø̀ng yv́ng kèní Ang bø̀ng vdòng taq namaqí gø̀nshaq lúnlv́m dvpvt yadv́ng pv̀n vrūaì we íe.