Kàshvbóng ang lvjøm

Wekvt Gvrayí kà yarì shvngbe shø̀:nò nø yadø a:lòe.  “Ejip móng kèní, vshuq chø̀m kèní namaq svng shvlutshú pè nø, namaq Gvray Yehowa Ngà ni ǿngàe.  Ngà taqkèní dvgá dvmø̀ mvshá ìnvt kapà tiq pv̀n svng gø namaq noq mvdaq. Vháng muqlàngrām taq v̄lrì, mø̀íni rvgaq dv́myàng taq v̄lrì, mø̀íni lv̀ngpvng tì vdòng taq v̄lrì mv̀rshv̀m dø gø, ang hāng nà dvpvt wáshì mvdaq. Namaqí werì svng noq nø dvzø̄m mvdaq. Kadø íe wani namaq Gvray Yehowa Ngà nø nēzá sháò we Gvray ǿngà nø, Ngà svng shvngōshìrì svng nø, angkop angkàng maq mvrà rvtnø angcǿ angcèrì vshø̀m vbì mvril høq shø̄nò pè ǿngàe.  Wedø ínìgø Ngà svng shóngshì nø Ngà dvkv́mkàrì svng cv̀n vsvng rì kaq nø, angkíng mvril høq ínìgø, mvkok dvdínøt dvtanò Pè ǿngàe. Nà Gvray bø̀ng svng vwāwā dø tǿ mvdaq. Kadø íe wāni Ang bø̀ng svng vwāwā dø tǿò gǿ svng nø Yehowaí màshø̄nshaq làng daqò we mø̀í.  Narni svng shànshér dø shvgaq nø vpǿlv́m mvsøngshì ràe.  Vchuq ni høq nø namaq dèzaqshinøng nø bv̀nlì í dv́ngte wáshì ràe. Inìgø shvngøt ni wani nø, namaq Gvray Yehowaò narni íe. Weni taq nø nà nvng nà zvmì shvdv̀ngrì gø, nà vshuqpè nà vshuqmè gø, nà nìnàrì gø; namaq dvhø̀ taq vl we zaqlèrì gø, weni taq bv̀nlì wá mvdaq. i Kadø íe wani vchuq ni vdòng taq, Yehowaí muqlàng rvgaq, nvmukdvra nvng we vdòng taq vl dv́ngte shvngbe svng pv́n dv́ng bǿà nø, shvngøt ni wani taq nø Ang nārshì yàng. Wervtnø̀ Yehowaí narni weni svng shvmá:nò nø shànshér dø gaqò we angni íe.  Namaq Gvray Yehowaí èzínøng we móngdàn taq namaq lvpat yv̄ng dø cúnshì lúnlv́m dvpvt nvpè nvmè maq svng vpǿ ràe.  Vsvng shvt mvdaq. Vsvng svmā dvchap mvdaq. Kǿ mvdaq.  Nà tiqdv́ng vsvng kaq vtù nø mvdìng we shvkse wáshì mvdaq.Nà tiqdv́ng vsvng chø̀m svng map mvdaq; Nà tiqdv́ng vsvng chø̀mmè svng gø, ang vshuqpè vshuqmè svng gø, angò nungwà ngvlá nvng ang lozèdvcheq svng gø, ang vdá dv́ngte kapà svng gø map mvdaq,” wae.